Ezekiel
19 “Mo la aywilɛho yemi la kɛ kɔ Israel ganɔ ɔmɛ a he 2 nɛ́ o de ke,
‘Kɛ o nyɛ ngɛ kɛɛ? E ngɛ kaa jata yo ngɛ jatahi a kpɛti.
E buɔ si ngɛ jata wawi* nɛ a he wa a, a kpɛti nɛ e lɛɔ e bimɛ.
3 E lɛ e bi ɔ kake nɛ e ba pee jata nɛ he wa.
E kase bɔ nɛ a tsɔtslɔɔ lohwehi a mi ha,
E yeɔ nimli po.
4 Je ma amɛ nu e he nɛ a nu lɛ ngɛ a muɔ ɔ mi,
A kɛ gbowe nu lɛ kɛ ba Egipt zugba a nɔ.
5 E mlɛ hluu se e na kaa hɛnɔkami ko be hu kaa e bi ɔ maa kpale kɛ ba.
Lɔ ɔ he ɔ, e nu e bi ɔ ekpa nɛ e pee lɛ jata nɛ he wa.
6 Lɛ hu e nyɛɛɔ ngɛ jata amɛ a kpɛti nɛ e ba pee jata wayo nɛ he wa.
E kase bɔ nɛ a tsɔtslɔɔ lohwehi a mi ha, nɛ e yeɔ nimli po.
7 E nyɛɛɔ kɛ yaa kɛ baa ngɛ a mɔhi nɛ a he wa a, a kpɛti nɛ e kpata ma amɛ a hɛ mi,
Nɛ e huãmi ɔ kpe ma doku ɔ mi tsuo.
8 Je ma amɛ nɛ a ngɛ kpokpahi nɛ bɔle lɛ ɔ a nɔ ɔ ba konɛ a kɛ a ya a nɛ ba bu e nɔ,
Nɛ a nu lɛ ngɛ a muɔ ɔ mi
9 A ngɔ gbowe kɛ nu lɛ nɛ a kɛ lɛ wo daka mi nɛ a kɛ lɛ ba ha Babilon Matsɛ ɔ.
A tsi e nya ngɛ lejɛ ɔ konɛ a ko nu e gbi ngɛ Israel yoku ɔmɛ a nɔ hu.
10 O nyɛ ngɛ kaa wai tso ngɛ o muɔ mi,* wai tso nɛ a du ngɛ nyuhi a he.
E wo yiblii nɛ e gba kɔni fuu ejakaa e ná nyu babauu.
11 E tsɛ̃ kɔnihi* nɛ a he wa, nɛ́ a ma nyɛ kɛ pee nɔ yeli a matsɛ tso.
E wa nɛ e ka pe tso kpa amɛ tsuo,
Nɛ akɛnɛ e ka nɛ e bɔ kusuu he je ɔ, a na lɛ ngɛ he fɛɛ he.
12 Se a kɛ abofu hia lɛ nɛ a sake lɛ kɛ fɔ zugba,
Nɛ puje he kɔɔhiɔ gbli e yiblii ɔ.
E kɔnihi nɛ a he wa a kpɔ kɛ je e he nɛ a gbli, nɛ la sã mɛ.
13 Amlɔ nɛ ɔ, a du lɛ ngɛ nga kplanaa nɔ,
Ngɛ zugba nɛ nyu be nɔ nɛ́ e nɔ gbli ɔ nɔ.
14 La a je e kɔni ɔmɛ* a he nɛ e sã e kɔnihi nɛ a ngɛ tsɛ̃e ɔ kɛ e yiblii ɔ,
Nɛ tso kɔni nɛ he wa ko píɛ hu, eko be nɛ a kɛ maa pee matsɛ tso.
“‘Aywilɛho yemi la ji nɛ ɔ nɛ, nɛ e maa pee aywilɛho yemi la.’”