Anɛ o suɔ kaa o maa kane Baiblo ɔ, se susumihi kaa kikɛ ha nɛ o nyɛ we nɛ o kane lo? Nihi fuu susuɔ kaa Baiblo ɔ kanemi yee. Se ke o ba le kaa Baiblo ɔ ma nyɛ maa ye bua mo konɛ o ná bua jɔmi, nɛ o si himi hu maa pee kpakpa nɛɛ? Ke o yɔse kaa ní komɛ ngɛ nɛ o ma nyɛ maa pee nɛ ma ha nɛ o bua maa jɔ Baiblo ɔ kanemi he hu nɛɛ? Anɛ o maa suɔ nɛ o le bɔ nɛ Baiblo ɔ ma nyɛ maa ye bua mo ha lo?

Nihi fuu kane Baiblo ɔ nɛ e ye bua mɛ wawɛɛ. Moo hyɛ nɔ́ nɛ a ti ni komɛ de.

Niheyo ko nɛ a tsɛɛ lɛ ke Ezekiel nɛ e ye jeha 20 kɛ se ɔ de ke: “Sa a, i peeɔ ye ní kaa nɔ ko nɛ ngɛ lɔle kudɔe nɛ e li he pɔtɛɛ nɛ e yaa. Se Baiblo ɔ nɛ i kane ɔ ha nɛ ye si himi pee kpakpa. Ga womi kpakpahi ngɛ Baiblo ɔ mi nɛ ma nyɛ ma ngɔ kɛ tsu ní ngɛ ye si himi mi.”

Yiheyo ko nɛ a tsɛɛ lɛ ke Frieda nɛ lɛ hu e ye jeha 20 kɛ se ɔ de ke: “Sa a, ye tsui gbaa ye nya wawɛɛ. Se Baiblo ɔ nɛ i kane ɔ ye bua mi nɛ i nyɛɔ toɔ ye tsui si. Enɛ ɔ ha nɛ nihi nyɛɔ suu ye he. Lɔ ɔ ha nɛ amlɔ nɛ ɔ i ngɛ huɛmɛ fuu.”

Yo ko nɛ a tsɛɛ lɛ ke Eunice nɛ e ye maa pee jeha 50 kɛ se ɔ tu Baiblo ɔ he munyu ke, “Baiblo ɔ ngɛ ye si himi tsakee. E ye bua mi nɛ i ngmɛɛ su yaya komɛ a he.”

Ezekiel, Frieda, Eunice kɛ nihi ayɔhi abɔ nɛ a kane Baiblo ɔ yɔse kaa, Baiblo ɔ ma nyɛ maa ye bua wɔ nɛ wa ná bua jɔmi ngɛ si himi mi. (Yesaya 48:17, 18) Jehanɛ ɔ hu, Baiblo ɔ ma nyɛ maa ye bua mo konɛ (1) o mwɔ yi mi kpɔ nɛ da, (2) o hla huɛmɛ kpakpahi, (3) o nyɛ nɛ o da si himi mi nyagbahi a nya, kɛ (4) nɔ́ nɛ hi pe kulaa a, konɛ o le anɔkuale nɛ kɔɔ Mawu he. Ga womihi nɛ ngɛ Baiblo ɔ mi ɔ je Mawu ngɔ. Lɔ ɔ he ɔ, ke o kɛ tsu ní ɔ, e maa ye bua mo wawɛɛ ejakaa Mawu wui ga yaya.

Oti ɔ ji, moo je Baiblo ɔ kanemi sisi. Se mɛni maa ye bua mo konɛ Baiblo ɔ nɛ o maa kane ɔ sisi jemi kó ye ha mo, nɛ o bua nɛ jɔ e kanemi hu he.

Mɛni maa ye bua mo konɛ o bua nɛ jɔ Baiblo ɔ kanemi he nɛ o ná he se? Mo kadi níhi enuɔ nɛ ni komɛ pee nɛ ye bua mɛ.

To he nɛ o maa hi kɛ kane ɔ he blɔ nya. Kane Baiblo ɔ ngɛ he ko nɛ huhui be. Mo je níhi nɛ maa gbla o juɛmi kɛ je nɔ́ nɛ o ngɛ kanee ɔ nɔ ɔ kɛ je lejɛ ɔ. Moo hi he ko nɛ o maa na nɔ́ nɛ o ngɛ kanee ɔ saminya, nɛ kɔɔhiɔ kpakpa hu maa fia o he.

O kɛ juɛmi nɛ da nɛ kane. Baiblo ɔ je wa hiɔwe Tsɛ ɔ ngɔ, enɛ ɔ he ɔ, ke wa suɔ nɛ wa ná he se ɔ, e sa nɛ waa ba wa he si kaa jokuɛ nɛ e suɔ kaa e fɔlɔ nɛ tsɔɔ lɛ ní. Ke o hɛɛ susumi ko nɛ dɛ ngɛ Baiblo ɔ he ɔ, moo bɔ mɔde nɛ o ngmɛɛ susumi kaa jã a he konɛ Mawu nɛ nyɛ nɛ e tsɔse mo.​—La 25:4.

Moo sɔle loko o kane. Mawu susumi lɛ ngɛ Baiblo ɔ mi, enɛ ɔ he ɔ, wa hia e yemi kɛ buami loko wa ma nyɛ maa nu sisi. Mawu wo si kaa e maa ngɔ “mumi klɔuklɔu ɔ kɛ ha nihi nɛ biɔ lɛ ɔ.” (Luka 11:13) Mumi klɔuklɔu ɔ ma nyɛ maa ye bua mo nɛ o nu Mawu nile ɔ sisi. Bɔɔbɔɔbɔɔ ɔ, e maa ye bua mo konɛ o nu “Mawu juɛmi nɛ mi kuɔ ɔ” hu sisi.​—1 Korinto Bi 2:10.

Kane, susu he, konɛ o nu sisi. Koo kane munyu ɔmɛ kɛkɛ. Mo susu nɔ́ nɛ o ngɛ kanee ɔ he. Mo bi o he sane komɛ kaa: ‘Mɛni suhi nɛ i na ngɛ nɔ nɛ i ngɛ e he munyu kanee ɔ he? Mɛni blɔ nɔ ma ngɔ nɔ́ nɛ i ngɛ kanee ɔ kɛ tsu ni ngɛ ye si himi mi?’

Ngɔɔ oti pɔtɛɛ komɛ kɛ ma o hɛ mi. Ke o ngɛ Baiblo ɔ kanee ɔ, ngɔɔ oti komɛ kɛ ma o hɛ mi, nɛ o bɔ mɔde nɛ o su he. Jã nɛ o maa pee ɔ maa ye bua mo nɛ o si himi maa pee kpakpa. O ma nyɛ maa ngɔ otihi nɛ nyɛɛ se nɛ ɔmɛ eko kɛ ma o hɛ mi: ‘I suɔ nɛ ma kase Mawu he ní fuu.’ ‘I suɔ nɛ ma pee nɔmlɔ kpakpa, huno aloo yogbayo kpakpa.’ Lɔ ɔ se ɔ, moo kane Baiblo ɔ mi hehi nɛ maa ye bua mo konɛ o su oti nɛ ɔmɛ a he.a

Níhi enuɔ nɛ wa susu a he nɛ ɔmɛ maa ye bua mo konɛ o nyɛ nɛ o kane Baiblo ɔ. Se kɛ o maa pee kɛɛ konɛ Baiblo ɔ kanemi nɛ pee bua jɔmi? Munyu nɛ nyɛɛ se ɔ maa ye bua mo.

Anɛ o bua jɔ Baiblo ɔ kanemi he aloo o bua jɔɛ he? Ke Baiblo ɔ kanemi maa pee bua jɔmi jio, e be bua jɔmi pee jio, e daa si ngɛ bɔ nɛ o ma plɛ kɛ kane ha a nɔ. Waa hyɛ ní komɛ nɛ ke o pee ɔ, bua jɔmi nɛ o kɛ kaneɔ Baiblo ɔ mi maa wa.

Ngɔɔ Baiblo sisi tsɔɔmi nɛ da nɛ e sisi numi yi kɛ tsu ní. Ke o ngɛ womi ko kanee, nɛ e mi munyu ɔmɛ a sisi numi yee aloo a kɛ munyunguhi nɛ a kɛ tsu we ní hu ngma a, o bua be womi ɔ kanemi he jɔe. Lɔ ɔ he ɔ, mo hla Baiblo nɛ munyuhi nɛ a kɛ ngma a sisi numi yi nɛ o kane. Jã nɛ o maa pee ɔ ma ha nɛ o bua maa jɔ nɔ́ nɛ o ngɛ kanee ɔ he. Se e sa nɛ Baiblo nɛ o maa kane ɔ nɛ pee Baiblo sisi tsɔɔmi nɛ da.a

Ngɔɔ kɔmpiuta blɔ nɔ tomihi kɛ tsu ní. Mwɔnɛ ɔ, wa nyɛɔ kaneɔ Baiblo ɔ ngɛ kɔmpiuta klamahi a nɔ hulɔ. O ma nyɛ maa kane Baiblo ɔ eko ngɛ Intanɛti ɔ nɔ aloo o gbla kɛ fɔ kɔmpiuta, tablɛti, loo mobile fon nɔ nɛ o kane. Kɔmpiuta blɔ nɔ tomi komɛ haa nɛ o nyɛɔ ngɔɔ Baiblo sisi tsɔɔmi slɔɔtohi a mi munyuhi kɛ toɔ a sibi a he. Nɛ o naa ngmami kpahi nɛ tu nɔ́ nɛ o ngɛ kanee ɔ he munyu hulɔ. Ke o suɔ nɛ o fia Baiblo ɔ mi munyu ɔmɛ nɛ o bu tue ɔ, o ma nyɛ maa pee jã. Nihi peeɔ jã ke a ngɛ lɔle mi, ke a ngɛ níhi a he fɔe, aloo ke a ngɛ ní tsumi kpa ko tsue nɛ a ma nyɛ maa bu munyu tue. Moo ka níhi nɛ wa wo a ta nɛ ɔ eko nɛ o hyɛ.

Ngɔɔ Baiblo kasemi níhi kɛ tsu ní. Baiblo kasemi níhi ma nyɛ maa ye bua mo nɛ o ná nɔ́ nɛ o ngɛ kanee ɔ he se wawɛɛ. Zugba he fonihi ngɛ nɛ tsɔɔ he nɛ mahi nɛ a wo a ta ngɛ Baiblo ɔ mi ɔ ngɛ. Foni nɛ ɔmɛ maa ye bua mo nɛ o susu nɔ́ nɛ o ngɛ kanee ɔ he kɛ ya tsitsaa. Munyuhi nɛ ngɛ womi tɛtlɛɛ nɛ ɔ mi, aloo níhi nɛ ngɛ jw.org wɛbsaiti ɔ nɔ fa nɛ ji, “Baiblo Tsɔɔmihi” ma nyɛ maa ye bua mo nɛ o nu Baiblo ɔ sisi saminya.

Mo tsake blɔhi a nɔ nɛ o guɔ kɛ kaneɔ Baiblo ɔ mi. Ke e yee ha mo kaa o maa kane Baiblo ɔ kɛ je sisije kɛ ya su nyagbe ɔ, lɛɛ o ma nyɛ maa je sisi ngɛ hehi nɛ o bua jɔ munyuhi nɛ ngɛ lejɛ ɔmɛ a he ɔ. Lɔ ɔ ma ha nɛ e kanemi maa pee bua jɔmi ha mo. Ke o ngɛ hlae nɛ o le níhi fuu ngɛ nihi pɔtɛɛ komɛ nɛ Baiblo ɔ tu a he munyu ɔ a he ɔ, o ma nyɛ maa kane Baiblo ɔ fa nɛ tu jamɛ a ni ɔmɛ a he munyu. O maa na blɔ nɛ o maa gu nɔ kɛ je Baiblo ɔ kanemi sisi ngɛ daka nɛ yi ji, “Moo Kase Nihi Nɛ Baiblo ɔ Tu A He Munyu ɔ A He Ní” ɔ mi. Aloo eko ɔ, ke o bua jɔ Baiblo mi munyu ko loo sane ko nɛ ya nɔ blema a he ɔ, o ma nyɛ maa kane Baiblo ɔ fa nɛ tu jamɛ a nɔ́ ɔ he munyu. Moo ka nɛ o hyɛ.

Baiblo ɔ ji womi ko nɛ e he hia wawɛɛ. Ga womihi nɛ ngɛ mi ɔ je wa Bɔlɔ ɔ ngɔ. (2 Timoteo 3:16) E ma nyɛ ma tsake wa si himi. Baiblo ɔ de ke: “Mawu munyu hɛ ngɛ, e ngɛ he wami.” (Hebri Bi 4:12) Baiblo ɔ ma nyɛ ma tsake wa si himi ngɛ blɔhi enyɔ pɔtɛɛ komɛ a nɔ. Kekleekle ɔ, e haa wɔ blɔ tsɔɔmihi nɛ maa ye bua wɔ ngɛ wa si himi mi amlɔ nɛ ɔ. Enyɔne, e yeɔ buaa wɔ nɛ wa leɔ Mawu kɛ e si womi ɔmɛ a he ní.​—1 Timoteo 4:8; Yakobo 4:8.

E haa nɛ wa náa si himi kpakpa amlɔ nɛ ɔ. Baiblo ɔ ma nyɛ maa ye bua wɔ kɛ tsu wa nyagba amɛ a he ní. E kɛ ga womi kpakpa ha wɔ ngɛ níhi nɛ nyɛɛ se ɔmɛ a he.

• Bɔ nɛ waa kɛ ni kpahi maa hi si ha.—Efeso Bi 4:31, 32; 5:22, 25, 28, 33.

• Nɔ́ nɛ wa maa pee konɛ wa ná bua jɔmi kɛ nɔmlɔ tso mi he wami kpakpa.​—La 37:8; Abɛ 17:22.

• Bɔ nɛ e sa kaa waa ba wa jemi ha.—1 Korinto Bi 6:9, 10.

• Ní tsumi kɛ sika he blɔ nya tomi.—Abɛ 10:4; 28:19; Efeso Bi 4:28.a

Vicent kɛ Annalou nɛ a ngɛ Asia nɛ a sɛ gba si himi mi kɛ we ɔ ná ga womi nɛ Baiblo ɔ kɛ ha a he se wawɛɛ. Ke nihi sɛ gba si himi mi ehe ɔ, e yee ha mɛ kaa a maa nu a sibi sisi, nɛ ní sɛɛmi hu peeɔ dengme. Se Vicent kɛ Annalou ngɔ níhi nɛ a kane ngɛ Baiblo ɔ mi ɔ kɛ tsu ní. Mɛni se nɛ a ná? Vicent de ke: “Níhi nɛ i kane ngɛ Baiblo ɔ mi ɔ ye bua mi nɛ i kɛ suɔmi tsu nyagbahi nɛ i kɛ kpe ngɛ wa gba si himi mi ɔ he ní. Baiblo ɔ mi ga womihi nɛ wa kɛ tsu ní ɔ ha nɛ wa ná bua jɔmi ngɛ si himi mi.” Annalou hu de ke: “Nihi a nɔ hyɛmi níhi nɛ wa kane ngɛ Baiblo ɔ mi ɔ ye bua wɔ. Amlɔ nɛ ɔ, bua jɔmi ngɛ wa gba si himi ɔ mi. Nɛ wa bua jɔ otihi nɛ waa kɛ ma wa hɛ mi ɔ hu he.”

E yeɔ buaa wɔ nɛ wa leɔ Mawu he ní. Vicent kpale de ke: “Baiblo ɔ nɛ i kane ɔ ha nɛ huɛ bɔmi nɛ ngɛ i kɛ Yehowa wa kpɛti ɔ mi wa wawɛɛ.” Vicent níhi a si kpami ɔ maa nɔ mi kaa Baiblo ɔ ma nyɛ maa ye bua mo nɛ o le Mawu he ní. Ke o pee jã a, o ma ná e ga womi ɔmɛ a he se wawɛɛ nɛ o ma nyɛ maa pee e huɛ hulɔ. Jehanɛ hu, o ma ba le si himi kpakpa nɛ maa ba hwɔɔ se ɔ he ní fuu. Benɛ wa ma ná “wami nɛ ngɛ kɛ yaa neneene” ɔ. (1 Timoteo 6:19) Womi kpa ko be nɛ ma ha nɛ o le ní kpakpahi kaa jã.

Ke o je Baiblo ɔ kanemi sisi nɛ o ya nɔ nɛ o pee jã a, mo hu o ma nyɛ ma ná he se wawɛɛ. O si himi maa pee kpakpa nɛ o ma ba le Mawu he ní fuu. Ke o ngɛ Baiblo ɔ kanee ɔ, eko ɔ, o be ní komɛ a sisi nue. Ke e ba jã a, nɔ hyɛmi nɔ́ nɛ nyɛɛ se ɔ maa ye bua mo. Etiopia sɔmɔlɔ nɔkɔtɔma ko hi si maa pee jeha 2,000 nɛ be ɔ. E bɔni Baiblo kanemi, se e nui níhi nɛ e kane ɔ sisi. Benɛ Filipo nɛ e ji Yesu kaselɔ ɔ bi lɛ ke e nu níhi nɛ e ngɛ kanee ɔ sisi lo ɔ, e de ke: “Kɛ ma pee kɛɛ nɛ ma nu sisi kaa ja nɔ ko tsɔɔ mi?”b E ha nɛ Filipo ye bua lɛ ejakaa Filipo ji Baiblo tsɔɔlɔ nɛ e he be. (Bɔfo Ɔmɛ A Ní Tsumi 8:30, 31, 34) Ke mo hu o suɔ nɛ o nu Baiblo ɔ sisi saminya a, wa kpa mo pɛɛ nɛ o ngma kɛ gu Intanɛti ɔ nɔ ngɛ www.jw.org/ada, loo ngmaa kɛ ya adrɛs nɛ ngɛ womi tɛtlɛɛ nɛ ɔ mi ɔ kɛ bi nɛ a kɛ mo nɛ ba kase Baiblo ɔ. O ma nyɛ ma hla Yehowa Odasefohi nɛ a ngɛ o kpɔ ɔ mi ɔ a se blɔ, aloo yaa Matsɛ Yemi Asa ko nɛ ngɛ o kpɔ ɔ mi ɔ nɔ. Kane Baiblo ɔ, nɛ o ngɔ nɔ́ nɛ o ngɛ kanee ɔ kɛ tsu ní konɛ o si himi nɛ pee kpakpa.