Anɛ Mawu Ngɛ Lo?
Nɔ́ nɛ Baiblo ɔ de
Ee. Baiblo ɔ tsɔɔ wɔ odasehi fuu nɛ haa nɛ wa náa nɔ mi mami kaa Mawu ngɛ. Baiblo ɔ woɔ wɔ he wami kaa wa ná hemi kɛ yemi ngɛ Mawu mi, nɛ wa susu níhi a he, nɛ waa kɛ wa “juɛmi” nɛ to níhi a he, se pi nɛ wa ma he níhi nɛ jami ɔmɛ tsɔɔ ye kɛkɛ. (Roma Bi 12:1; 1 Yohane 5:20) Ha nɛ waa hyɛ ní komɛ nɛ Baiblo ɔ de nɛ haa nɛ wa náa nɔ mi mami kaa Mawu ngɛ:
Bɔ nɛ a to je ɔ he blɔ nya ha pɛpɛɛpɛ, nɛ e nyɛɔ nɛ e baa wami yi ɔ tsɔɔ kaa Bɔlɔ ko ngɛ. Baiblo ɔ de ke: “Ngɛ anɔkuale mi ɔ, we fɛɛ we ɔ, nɔ ko lɛ e ma, se nɔ nɛ e pee níhi tsuo ɔ ji Mawu.” (Hebri Bi 3:4) E ngɛ mi kaa munyu nɛ ɔ sisi numi yi mohu lɛɛ, se womi mi leli fuu naa munyu nɛ ɔ kaa e mi kuɔ.a
Kaa adesahi ɔ, wa suɔ nɛ waa le nɔ́ he je nɛ wa ngɛ wami mi. Enɛ ɔ he ɔ, ke wa nine su wa he lo nya hiami níhi a nɔ po ɔ, loloolo ɔ, wa suɔ nɛ waa le nɔ́ he je nɛ wa ngɛ wami mi. Enɛ ɔ nɛ wa suɔ nɛ waa le, kɛ suɔmi nɛ wa suɔ kaa wa maa le Mawu konɛ wa ja lɛ ɔ piɛɛ níhi nɛ Baiblo ɔ tsɛɛ ke wa ‘mumi mi hiami ní’ ɔ he. (Mateo 5:3; Kpo Jemi 4:11) Mawu bɔ kaa wa le lɛ nɛ wa ja lɛ, enɛ ɔ maa nɔ mi kaa e ngɛ nitsɛnitsɛ, nɛ e suɔ wɔ. Nɛ jehanɛ se hu ɔ, e suɔ kaa wa kɛ lɛ nɛ pee huɛ.—Mateo 4:4.
A ngma gbamihi nɛ a ngɛ Baiblo ɔ mi ɔ kɛ fɔ si momoomo loko a ba mi, nɛ a ba mi kaa bɔ nɛ a gba kɛ fɔ si ɔ pɛpɛɛpɛ. Bɔ nɛ gbami nɛ ɔmɛ ba mi pɛpɛɛpɛ ha a, ha nɛ e pee heii kaa nɔ ko nɛ́ e ngɛ he wami pe adesahi lɛ ha nɛ a gba gbami nɛ ɔmɛ.—2 Petro 1:21.
Baiblo ngmali ɔmɛ ngɛ je mi si kpami he nile nɛ́ nihi nɛ́ a kɛ mɛ hi si ngɛ jamɛ a be ɔ mi ɔ be jamɛ a nile ɔ. Kaa nɔ hyɛmi nɔ́ ɔ, blema a, nihi fuu he ye kaa lohwe ko kaa suɔ loo nga mi kpotoo ku ngua ko loo na ku ngua ko lɛ hɛɛ je ɔ. Se Baiblo ɔ de ke Mawu “ngɔ je ɔ ngɔ kpla si nɛ nɔ́ ko hɛɛ we lɛ.” (Hiob 26:7) Jã nɔuu kɛ̃ nɛ Baiblo ɔ de kaa je ɔ ngɛ “lukutuu.” (Yesaya 40:22, sisi ningma; Douay Version) Nihi fuu he ye kaa Mawu pɛ lɛ ma nyɛ ma ha nɛ Baiblo ngmali ɔmɛ nɛ́ a ngma nɔ́ ko kaa kikɛ.
Baiblo ɔ ha sane bimihi fuu nɛ a mi wa amɛ a heto. Sane bimi nɛ ɔmɛ ji sanehi nɛ ke nɔ nɛ e bi ɔ ná we heto nɛ ma ha nɛ e tsui nɛ nɔ e mi ɔ, e ma nyɛ ma ha nɛ e susu kaa Mawu be. Kaa nɔ hyɛmi nɔ́ ɔ: Ke Mawu ngɛ suɔmi, nɛ e he wa a, lɛɛ mɛni he je nɛ nɔ́ nami kɛ yi wu tso ní peepeehi pɔ he ngɛ je ɔ mi ɔ? Mɛni he je nɛ jami haa nɛ nihi peeɔ ní yayamihi mohu pe ní kpakpahi ɔ?—Tito 1:16.
a Kaa nɔ hyɛmi nɔ́ ɔ, benɛ nyumu ko nɛ a tsɛɛ lɛ ke Allan Sandage, nɛ e kaseɔ dodoehi a he ní ɔ ngɛ je mi ɔ, e de nɔ́ ko kɛ kɔ je ɔ he. E de ke: “E he wa ha mi kaa ma he ye kaa je nɛ a to níhi a he blɔ nya saminya ngɛ mi ɔ ba kɛkɛ. Nɔ ko kɛ̃ lɛ to ní nɛ ɔmɛ a he blɔ nya. I li Mawu he nɔ́ ko nɔ́ ko mohu lɛɛ, se nɔ́ nɛ ma nyɛ ma de ji kaa níhi nɛ ngɛ je nɛ ɔ mi ɔ tsɔɔ kaa bɔlɔ ko ngɛ.”