Nɔ́ He Je Nɛ Osɔfo Ko Je E Sɔlemi ɔ Mi

Wa kpa mo pɛɛ nɛ o de wɔ o jokuɛwi a si sane.

A fɔ mi ngɛ Italy ngɛ jeha 1943 ɔ mi. I kɛ ye nyɛminyumu ɔmɛ kɛ ye nyɛmiyi ɔmɛ wa ngɛ kɔpe nyafii ko mi, nɛ lejɛ ɔ nɛ ye papa a tsu ní ngɛ kaa ngmɔ hulɔ kɛ kapitɛ. Wa fɔli ɔmɛ tsɔse wɔ kɛ wo Katoliki jami ɔ mi.

Mɛni he je nɛ o suɔ kaa o ma ba pee osɔfo ɔ?

Benɛ i wɛ ɔ, i bua jɔɔ kaa ma bu osɔfo ɔmɛ tue ke a ngɛ ní tsɔɔe ngɛ sɔlemi ɔ mi. Gbi nɛ osɔfo ɔmɛ kɛ tuɔ munyu ɔ ná ye nɔ he wami wawɛɛ, jehanɛ ɔ se hu ɔ, ye bua jɔɔ níhi nɛ a peeɔ ngɛ sɔlemi ɔ mi ɔ he. Enɛ ɔ ha nɛ i suɔ wawɛɛ kaa ma pee osɔfo. Benɛ i ye jeha 13 ɔ, ye yayo kɛ mi ya sukuu ko nɛ a tsɔseɔ jokuɛ nyumuwi ngɛ konɛ a ba pee osɔfohi hwɔɔ se ɔ.

Anɛ nyɛ kase Baiblo ɔ benɛ a ngɛ nyɛ tsɔsee ɔ lo?

Wa ji blɔ nɛ́ waa pee jã. Benɛ i ye jeha 15 ɔ, ye tsɔɔli ɔmɛ a kpɛti nɔ kake ha mi womi ko nɛ tu Yesu si himi kɛ e fiɛɛmi ní tsumi ɔ he munyu, nɛ i kane womi nɛ ɔ si abɔ. Benɛ i ye jeha 18 ɔ, i ya kase ní ngɛ Rome ngɛ yunivɛsiti komɛ nɛ pope ɔ lɛ hyɛɛ nɔ ɔ. I kase Latin, Greek, history, philosophy, psychology, kɛ jamihi a he ní. E ngɛ mi kaa wa deɔ ngmami ɔ mi munyu komɛ nɛ a kaneɔ Baiblo ɔ ke wa ya sɔlemi Hɔgba mohu lɛɛ, se wa ji blɔ nɛ waa kase Baiblo ɔ tutuutu.

A pee mo nɔkɔtɔma ngɛ sukuu nɛ ɔ mi, anɛ enɛ ɔ biɔ nɛ o tsɔɔ ní lo?

Ye ní tsumi titli ji kaa ma to níhi a he blɔ nya konɛ nɔ́ fɛɛ nɔ́ nɛ ya nɔ saminya ngɛ sukuu ɔ mi. Se be komɛ hu i tsɔɔ ní.

Mɛni he je nɛ o yi mi bɔni mo enyɔɔnyɔ peemi ngɛ sɔlemi ɔ he ɔ?

Ní etɛ komɛ nɛ yaa nɔ ngɛ sɔlemi ɔ mi ɔ gbaa ye nya. Sɔlemi ɔ kɛ e he woɔ ma kudɔmi sanehi a mi. Eko hu ji kaa sɔlemi ɔ kplɛɛ ní yayamihi nɛ osɔfo ɔmɛ kɛ jami mi bi ɔmɛ pee ɔmɛ a nɔ. Jehanɛ ɔ se hu ɔ, Katoliki tsɔɔmi ɔmɛ ekomɛ kɛ nɔ́ nɛ Baiblo ɔ de ɔ kɔ we. Kaa nɔ hyɛmi nɔ́ ɔ, mɛni he je nɛ Mawu nɛ e ngɛ suɔmi ɔ maa pii nihi kɛ ya neneene ke a gbo? Jehanɛ ɔ se hu ɔ, anɛ Mawu suɔ nɛ waa ti sɔlemi kake mi si lafahi abɔ nɛ waa kɛ rosary nɛ pee jã lo?a

Mɛni o pee?

I kɛ ya fomi sɔle kɛ ha Mawu nɛ́ e tsɔɔ mi blɔ. Jehanɛ ɔ se hu ɔ, i he Catholic Jerusalem Bible nɛ a pee ngɛ Italy gbi mi kɛ we ɔ, nɛ i bɔni kanemi. Kɛkɛ nɛ ligbi ko Hɔgba mɔtu be nɛ i ngɛ ye tade nɛ i kɛ ya sɔlemi ɔ jee kɛ fɔ si ɔ, nyumuhi enyɔ komɛ ba sukuu ɔ mi. A ji Yehowa Odasefohi. Waa kɛ ngmlɛfia kake kɛ se sɛɛ ní kɛ kɔɔ Baiblo ɔ kɛ níhi nɛ e de ngɛ bɔ nɛ wa ma plɛ kɛ le anɔkuale jami ɔ he.

Mɛni lɛ o bua jɔ he ngɛ nyumu ɔmɛ nɛ a ba slaa mo ɔ a he?

I bua jɔ bɔ nɛ a kɛ nɔ mi mami tu munyu, kɛ bɔ nɛ a tsɛ ngmamihi a se ngɛ Katoliki Baiblo ɔ mi ɔ he wawɛɛ. Pee se ɔ, Odasefo no ko nɛ a tsɛɛ lɛ ke Mario ɔ ba bɔni mi slaami. E toɔ e tsui si nɛ e yeɔ e be nɔ, pu ngɛ tsoe jio, hiɔmi ngɛ nɛɛ jio, daa Hɔ mɔtu ngmlɛ nɛɛ ɔ, e baa sukuu ɔ mi.

Osɔfo kpa amɛ a bua jɔ slaami nɛ e ba hi mo slaae ɔ he lo?

I fɔ mɛ nine nɛ́ a ba piɛɛ wa he kɛ kase Baiblo ɔ, se a susu kaa e he hia we nɛ a kase Baiblo ɔ. Se imi lɛɛ, ye bua jɔ he. I ba kase ní kpakpahi fuu kɛ kɔɔ Mawu he. Eko ji nɔ́ he je nɛ Mawu ngmɛ yayami kɛ nɔ́ nami blɔ ɔ. E ji sane bimi ko nɛ gba ye juɛmi nya jehahi babauu.

Anɛ jami hɛ mi nyɛɛli ɔmɛ bɔ mɔde kaa a maa tsi o nya nɛ o ko kase Baiblo ɔ hu lo?

Ngɛ jeha 1975 ɔ mi ɔ, I ya Rome si abɔ nɛ i ya de mɛ ye susumi ngɛ nɔ́ nɛ i ngɛ kasee ɔ he. Ye nikɔtɔma amɛ bɔ mɔde kaa a ma tsake ye susumi, se a ti nɔ ko da we Baiblo ɔ nɔ kɛ pee jã. Nyagbenyagbe ɔ, ngɛ January 9, 1976 mi ɔ, I ngma sɛ womi kɛ ya Rome nɛ i de ngɛ sɛ womi ɔ mi kaa pi Katoliki no ji mi hu. Ligbi enyɔ se ɔ, i je sukuu ɔ mi nɛ i ngɔ tlee kɛ ya Yehowa Odasefohi a kpe. Jamɛ a kpe ɔ ji ye kekle kpe, nɛ e ya pee kpɔ mi kpe, nɛ nihi nɛ a ba a ji Yehowa Odasefohi nɛ a je asafo slɔɔtohi a mi. Níhi tsuo nɛ ya nɔ ngɛ lejɛ ɔ ngɛ slɔɔto kulaa ngɛ bɔ nɛ wa peeɔ wa nɔ ɔ ha a he. Odasefo no fɛɛ ko ngɛ Baiblo, nɛ ke munyu tulɔ ko tsɛ Baiblo ngmami ko se be mi nɛ e ngɛ e munyu ɔ tue ɔ, nɔ fɛɛ nɔ bli ɔ ngɛ e Baiblo ɔ mi.

Kɛ o weku li pee a ní ngɛ yi mi kpɔ nɛ o mwɔ ɔ he ha kɛɛ?

A kpɛti nihi babauu te si kɛ wo mi. Pee se ɔ, i ná le kaa ye nyɛminyumu ɔmɛ a kpɛti nɔ kake kɛ Yehowa Odasefo ɔmɛ ngɛ Baiblo ɔ kasee ngɛ Lombardy, nɛ ji ma ko nɛ ngɛ Italy woyi je ɔ. I ya slaa lɛ, nɛ Odasefo ɔmɛ nɛ a ngɛ lejɛ ɔ ye bua mi nɛ i ná ní tsumi kɛ hwɔ he. Pee se ɔ, i ha nɛ a baptisi mi kaa Yehowa Odasefo ɔmɛ a kpɛti nɔ kake.

Anɛ o pia o he lo?

Dɛbi kulaa! Amlɔ nɛ ɔ lɛɛ, i nu he kaa i hɛ kɛ su Mawu he wawɛɛ, ejakaa níhi nɛ i le kɛ kɔɔ e he ɔ tsuo je Baiblo ɔ mi, se pi adesa susumi ko, nɛ ma nyɛ ma je ye tsui mi kɛ tsɔɔ ni kpahi Mawu he ní kɛ nɔ mi mami.