NÍ KASEMI 06
Kɛ Wami Plɛ Kɛ Je Sisi Ha Kɛɛ?
“[Mawu] mi lɛ wami tsuo jeɔ kɛ baa.” (La 36:9) Anɛ o he ye lo? Ni komɛ deɔ ke pi nɛ a bɔ níhi, mohu ɔ, a ba wami mi kɛkɛ. Ke jã nɛ e ji ɔ, lɛɛ enɛ ɔ tsɔɔ kaa yi mi tomi ko be wami he mɔ. Se ke Yehowa Mawu lɛ bɔ níhi ɔ, lɛɛ lɔ ɔ tsɔɔ kaa yi mi tomi ko ngɛ wami he mɔ.a Ha nɛ wa susu níhi nɛ Baiblo ɔ de kɛ kɔ blɔ nɔ nɛ a gu kɛ bɔ wami, kɛ nɔ́ he je nɛ wa ma nyɛ ma he ye kaa e ji anɔkuale ɔ he.
1. Kɛ zugba a kɛ dodoe ɔmɛ plɛ kɛ ba kɛɛ?
Baiblo ɔ de ke: ‘Sisije ɔ, Mawu bɔ hiɔwe kɛ zugba.’ (1 Mose 1:1) Je mi si kpali fuu he ye kaa je ɔ ngɛ sisije. Kɛ Mawu plɛ kɛ bɔ je ɔ ha kɛɛ? E ngɔ e mumi klɔuklɔu ɔ, nɛ ji he wami nɛ e kɛ tsuɔ ní ɔ kɛ bɔ dodoe ɔmɛ kɛ níhi tsuo nɛ ngɛ hiɔwe kɛ zugba a nɔ ɔ.—1 Mose 1:2.
2. Mɛni he je nɛ Mawu bɔ zugba a?
Yehowa “bɔɛ [zugba a] ngɔ fɔɛ si gu nɛ e pee yaka; se e pee lɛ konɛ nimli nɛ hi nɔ.” (Yesaya 45:18) E bɔ zugba a saminya konɛ adesahi nɛ a nyɛ nɛ a hi nɔ kɛ ya neneene. (Kane Yesaya 40:28; 42:5.) Je mi si kpali tsɔɔ kaa zugba a ngɛ slɔɔto kulaa ngɛ si bɔlemi dodoe kpa amɛ a he, nɛ a tsɔɔ hu kaa zugba a nɔ pɛ ji he nɛ nimli adesahi ma nyɛ maa hi.
3. Mɛni ha adesahi ngɛ slɔɔto ngɛ lohwehi a he?
Benɛ Yehowa bɔ zugba a ta a, e bɔ níhi nɛ wami ngɛ a mi ngɛ zugba a nɔ. Kekleekle ɔ, e bɔ tsohi kɛ lohwehi ngɛ zugba a nɔ. Lɔ ɔ se ɔ, “Mawu bɔ nɔmlɔ, nɛ e pee lɛ kaa bɔ nɛ lɛ nitsɛ e ngɛ ɔ.” (Kane 1 Mose 1:27.) Mɛni ha nɛ nimli adesahi je ekpa kulaa ngɛ lohwehi a he ɔ? Akɛnɛ a bɔ wɔ ngɛ Mawu subai nɔ he je ɔ, wa ma nyɛ ma je e su komɛ kaa suɔmi kɛ dami sane yemi kpo. E bɔ wɔ konɛ wa nyɛ nɛ waa kase gbi slɔɔtohi, wa bua nɛ jɔ níhi nɛ a ngɛ fɛu a he, nɛ́ wa bua nɛ jɔ la hu he. Lohwehi be nyɛe ma sɔmɔ Mawu, se wɔ nimli adesahi lɛɛ wa ma nyɛ ma sɔmɔ Bɔlɔ ɔ nɛ waa kɛ lɛ nɛ pee huɛ.
MOO KASE BABAUU
Moo kase nɔ́ he je nɛ wa ma nyɛ ma he ye kaa a bɔ níhi, nɔ́ he je nɛ nile ngɛ nɔ́ nɛ Baiblo ɔ de ɔ mi, kɛ nɔ́ nɛ su kpakpahi nɛ adesahi jeɔ kpo ɔ tsɔɔ wɔ ngɛ Mawu he.
4. Nɔ ko lɛ e bɔ níhi
Ke adesahi tɛni adebɔ nɔ́ ko ɔ, a jeɔ a yi kaa a bɔ mɔde. Lɛɛ mɛnɔ yi nɛ e sa nɛ a je ngɛ adebɔ nɔ́ ɔ nitsɛ he? Mo je VIDEO ɔ, nɛ nyɛ susu sane bimi nɛ ɔ he.
Mɛni ji ní komɛ nɛ́ adesahi hyɛ adebɔ níhi a nɔ kɛ pee?
We fɛɛ we ɔ, nɔ ko lɛ ma. Se mɛnɔ lɛ bɔ níhi nɛ a ngɛ je ɔ mi ɔ? Nyɛɛ kane Hebri Bi 3:4, nɛ nyɛ susu sane bimihi nɛ nyɛɛ se nɛ ɔmɛ a he:
Adebɔ ní ɔmɛ a kpɛti te nɛɛ lɛ o bua jɔ he?
Anɛ nile ngɛ mi kaa wa ma he ye kaa a bɔ je ɔ kɛ níhi tsuo nɛ ngɛ mi ɔ niinɛ lo? Mɛni he je nɛ o ha heto jã a?
Anɛ o le lo?
O maa na munyuhi kɛ videohi nɛ kɔɔ ní kasemi nɛ ɔ he ngɛ jw.org ɔ nɔ. Hyɛ munyu nɛ ji “Anɛ Nɔ Ko Nɛ Bɔ Lo?” kɛ “Níhi Nɛ Nihi De Ngɛ Bɔ Nɛ Wami Plɛ Kɛ Je Sisi Ha a He.”
“Ngɛ anɔkuale mi ɔ, we fɛɛ we ɔ, nɔ ko lɛ e ma, se nɔ nɛ e pee níhi tsuo ɔ ji Mawu”
5. Nile ngɛ nɔ́ nɛ Baiblo ɔ de kaa a bɔ níhi ɔ mi
Mose Kekleekle Womi ɔ yi kake ɔ tsɔɔ bɔ nɛ zugba a plɛ kɛ ba, kɛ bɔ nɛ wami plɛ kɛ je sisi ha. Anɛ o ma nyɛ ma he nɔ́ nɛ Baiblo ɔ de ɔ ye lo, aloo e ji lakpa munyu ko kɛkɛ? Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
Anɛ Baiblo ɔ tsɔɔ kaa a bɔ zugba a kɛ níhi nɛ wami ngɛ a mi ɔ ngɛ ligbi ekpa pɛ mi lo?
Anɛ o susu kaa nile ngɛ nɔ́ nɛ Baiblo ɔ de ngɛ bɔ nɛ a bɔ níhi ha a he lo? Mɛni he je nɛ o ha heto jã a?
Nyɛɛ kane 1 Mose 1:1, nɛ nyɛ susu sane bimi nɛ ɔ he:
Je mi si kpali tsɔɔ kaa je ɔ ngɛ sisije. Anɛ nɔ́ nɛ a de ɔ kɛ Ngmami nɛ wa kane piɔ ɔ kɔ lo?
Ni komɛ susuɔ kaa eko ɔ, Mawu bɔ wami yiblii kake, nɛ e ha nɛ e bile kɛ pee ní kpahi. Nyɛɛ kane 1 Mose 1:21, 25, 27, nɛ nyɛ susu sane bimihi nɛ nyɛɛ se nɛ ɔmɛ a he:
Anɛ Baiblo ɔ tsɔɔ kaa Mawu bɔ wami yiblii, nɛ lɔ ɔ se ɔ, e ha nɛ e bile kɛ pee lohi, lohwehi, kɛ nimli lo? Aloo e bɔ “ní slɔɔtohi” nɛ́ a ngɛ wami mi ɔ?
6. Mawu je blɔ nɛ e bɔ adesahi saminya
Wa je ekpa kulaa ngɛ lohwehi nɛ Yehowa bɔ ɔmɛ a he. Nyɛɛ kane 1 Mose 1:26, nɛ nyɛ susu bimi nɛ ɔ he:
Akɛnɛ Mawu bɔ wɔ ngɛ e subai nɔ, nɛ wa nyɛɔ jeɔ su komɛ kaa suɔmi kɛ mi mi sami kpo he je ɔ, mɛni suhi nɛ Mawu hu ngɛ?
NI KOMƐ DEƆ KE: “Nɔ́ nɛ Baiblo ɔ de kaa a bɔ níhi ɔ ji lakpa.”
Kɛ mo hu o susu kɛɛ, nɛ mɛni he je nɛ o susu jã a?
NYA MWƆMI
Yehowa bɔ je ɔ kɛ níhi tsuo nɛ ngɛ mi ɔ.
Mi Nylɔmi
Mɛni Baiblo ɔ de ngɛ bɔ nɛ je ɔ plɛ kɛ ba ha a he?
Anɛ Mawu ha nɛ ní slɔɔtoslɔɔtohi nɛ ngɛ ɔ bile kɛ je wami yiblii kake ko mi, aloo e bɔ mɛ tsuo?
Mɛni lɛ ha nɛ adesahi je ekpa a?
NÍ KPAHI NƐ MAA YE BUA MO
Moo hyɛ adebɔ ní slɔɔtohi ngɛ je ɔ mi nɛ maa nɔ mi kaa bɔlɔ ko ngɛ niinɛ ɔ.
“Mɛni Lɛ Adebɔ Níhi Tsɔɔ Wɔ?” (O Hɛ Nɛ Tsɛ̃!, September 2006)
Moo hyɛ blɔ nɔ nɛ tsɛ ko ma nyɛ maa gu kɛ tsɔɔ e bi adebɔ níhi nɛ ngɛ Baiblo ɔ mi ɔ he ní.
Moo kane nɛ o hyɛ kaa nɔ́ nɛ Baiblo ɔ de, kɛ nɔ́ nɛ bilemi tsɔɔmi ɔ de ɔ tsuo ma nyɛ maa da lo.
“Anɛ Mawu Gu Bilemi Nɔ Kɛ Bɔ Ní Slɔɔtohi Nɛ Wami Ngɛ A Mi ɔ Lo?” (Munyu nɛ ɔ ngɛ Intanɛti ɔ nɔ)
Moo kane nɛ o hyɛ ke ji blema wuhi nɛ a na, kɛ níhi a mi hlamihi nɛ́ a pee ɔ maa nɔ mi kaa pe a bɔ níhi aloo pe a ba wami mi kɛkɛ.
Kɛ Wami Plɛ Kɛ Ba Kɛɛ—Sane Bimihi Enuɔ Nɛ E He Hia Nɛ Wa Bi (womiyo)
a Ní Kasemi 25 ɔ maa tsɔɔ wɔ yi mi tomi he je nɛ Mawu bɔ adesahi.