9. Kaa bɔnɛ 2 Mose 12:6 tsɔɔ ɔ, mɛni be nɛ a gbe Hetsɔmi tobi ɔ? (Hyɛ daka nɛ e yi ji, “Mɛni Be Ngɛ Ligbi ɔ Mi?” ɔ hulɔ.)

⁹ Yudabi a womi ko nɛ a tsɛɛ ke The Pentateuch and Haftorahs ɔ, tsɔɔ kaa 2 Mose 12:6 de ke, e sa nɛ a gbe tobi ɔ “gbɔkuɛ.” Baiblo sisi tsɔɔmi komɛ hu kɛ jamɛ a munyu ɔ nɔuu tsu ní. Baiblo kpahi kɛ Yudabi a womi nɛ ji Tanakh ɔ tsɔɔ jamɛ a munyu ɔ sisi ke, “benɛ diblii ngɛ woe.” Baiblo kpahi hu tsɔɔ sisi ke “benɛ du ngɛ bue,” “gbɔkuɛ nya si,” aloo “benɛ pu nɔ si.” Enɛ ɔ he ɔ, e sa nɛ a gbe tobi ɔ benɛ pu nɔ si, se diblii wui lolo. E sa nɛ a pee enɛ ɔ ngɛ Nisan 14 ɔ sisije.

10. Mɛni be ni komɛ susu kaa a gbeɔ Hetsɔmi tobi ɔ, nɛ mɛni sane enɛ ɔ ha nɛ nihi biɔ?

¹⁰ Pee se ɔ, Yudabi komɛ susu kaa tobi ɔmɛ nɛ a kɛ baa sɔlemi we ɔ a gbemi heɔ ngmlɛfia fuu. Enɛ ɔ he ɔ, a susu kaa munyu nɛ a ngma ngɛ 2 Mose 12:6 tsɔɔ kaa e sa nɛ a gbe tobi ɔmɛ ngɛ Nisan 14 ɔ nyagbe. E sa nɛ a je enɛ ɔ peemi sisi kɛ je piani pu plɛ̃plɛ̃ be mi, nɛ a gbe nya benɛ pu nɔ si. Se ke jã a ji bɔnɛ ngmami ɔ ngɛ tsɔɔe ɔ, lɛɛ mɛni be a yeɔ ní ɔ mɔ? Ní lelɔ kpanaa ko nɛ a tsɛɛ lɛ ke Jonathan Klawans, nɛ e le blema Yudabi a sanehi a he ní wawɛɛ ɔ de ke: “Yudabi a ligbi ehe jeɔ sisi benɛ pu nɔ si, enɛ ɔ he ɔ, a sãa afɔle ɔ ngɛ Nisan 14 ɔ nɔ. Jamɛ a be ɔ nɛ a jeɔ Hetsɔmi ɔ yemi sisi. Se a yeɔ niye ní ɔ ngɛ Nisan 15 ɔ nɔ. Mose Womi Nɛ Ji Enyɔ ɔ mɛ munyu nɛ ɔ nɔ mi.” E ngma hu ke: “Womihi nɛ rabi ɔmɛ ngma a tsɔɔ we bɔnɛ Israelbi ɔmɛ ye Hetsɔmi ɔ ha kɛ ba si benɛ a kpata Yerusalem hɛ mi.” A kpata Yerusalem hɛ mi ngɛ jeha 70 M.B.—Wɔ nɛ wa ma e fã ko nɔ mi.