NÍ KASEMI 34
Mɛni Wa Maa Pee Kɛ Tsɔɔ Kaa Wa Suɔ Yehowa?
Kɛ je benɛ o bɔni Baiblo ɔ kasemi nɛ ɔ, anɛ o nu he kaa o hɛ kɛ su Mawu he wawɛɛ pe sa a lo? Anɛ o suɔ kaa o maa ya nɔ nɛ́ o ha nɛ huɛ bɔmi nɛ ngɛ o kɛ Mawu nyɛ kpɛti ɔ mi nɛ wa wawɛɛ lo? Ke jã a, lɛɛ mo kai kaa ke Yehowa na kaa suɔmi nɛ o ngɛ kɛ ha lɛ ɔ mi ngɛ wae ɔ, suɔmi nɛ lɛ hu e ngɛ kɛ ha mo ɔ mi maa wa, nɛ e maa ye bua mo. Mɛni o maa pee kɛ tsɔɔ kaa o suɔ lɛ?
1. Mɛni wa maa pee konɛ Yehowa nɛ na kaa wa suɔ lɛ?
Ke wa buɔ Yehowa tue ɔ, lɔ ɔ tsɔɔ kaa wa suɔ lɛ. (Kane 1 Yohane 5:3.) E nyɛ we wa nɔ kaa waa bu lɛ tue. Mohu ɔ, e ngmɛ wa ti nɔ fɛɛ nɔ blɔ konɛ e hla kaa e maa bu lɛ tue aloo e be lɛ tue bue. Mɛni he je? Yehowa suɔ nɛ waa ‘je wa tsui mi’ kɛ bu lɛ tue. (Roma Bi 6:17) Enɛ ɔ tsɔɔ kaa e suɔ nɛ o bu lɛ tue akɛnɛ o ngɛ suɔmi kɛ ha lɛ ɔ he je, se pi kaa e sa nɛ o pee jã he je. A to womi nɛ ɔ Fã 3 kɛ 4 ɔ he blɔ nya konɛ e ye bua mo nɛ o pee níhi nɛ tsɔɔ kaa o suɔ Yehowa, kɛ gu e suɔmi nya ní nɛ o maa pee, kɛ níhi nɛ e sume nɛ o maa hiɔ ɔ nɔ.
2. Mɛni he je nɛ e he ma nyɛ maa wa ha wɔ kaa wa maa pee níhi kɛ tsɔɔ kaa wa suɔ Yehowa a?
Baiblo ɔ de ke: “Nɔ nɛ peeɔ nɔ́ nɛ da a, haomi babauu baa e nɔ.” (La 34:19) Wɔ tsuo wa yi mluku. Jehanɛ se hu ɔ, waa kɛ sika he nyagba, dami sane nɛ a yi, kɛ haomi kpahi ma nyɛ maa kpe. Ke waa kɛ nyagbahi nɛ a mi wa ngɛ kpee ɔ, e ma nyɛ maa ye ha wɔ kaa wa maa pee níhi nɛ Yehowa ngɛ hlae kaa waa pee ɔ. Ejakaa ngɛ si fɔfɔɛhi kaa jã a mi ɔ, eko ɔ, e he be wae kaa wa ma gbo Yehowa tue. Se ke o kɛ anɔkuale yemi pee níhi nɛ Yehowa ngɛ hlae kaa o pee ɔ, lɔ ɔ tsɔɔ kaa o suɔ lɛ pe nɔ́ fɛɛ nɔ́. Jã nɛ o maa pee ɔ hu tsɔɔ kaa o yeɔ lɛ anɔkuale, nɛ lɛ hu e maa ye mo anɔkuale, nɛ e “be mo sie gblegbleegble.”—Hebri Bi 13:5.
MOO KASE BABAUU
Moo kase nɔ́ he je nɛ Yehowa bua jɔɔ ke o bu lɛ tue ɔ, kɛ nɔ́ nɛ maa ye bua mo konɛ o nyɛ nɛ o bu lɛ tue ɔ he ní.
3. Sane ko nɛ kɔɔ o he
Baiblo ɔ ha nɛ wa na kaa munyu nɛ Satan tu kɛ po Hiob nya a kɔɔ nihi tsuo nɛ a suɔ kaa a ma sɔmɔ Yehowa a he. Nyɛɛ kane Hiob 1:1, 6–2:10, nɛ nyɛ susu sane bimihi nɛ nyɛɛ se nɛ ɔmɛ a he:
Ngɛ ngmami nɛ ɔ nya a, mɛni nɛ Satan de kaa lɔ ɔ he je nɛ Hiob buɔ Yehowa tue?—Hyɛ Hiob 1:9-11.
Mɛni nɛ Satan de ngɛ adesahi tsuo nɛ mo hu o piɛɛ he ɔ a he?—Hyɛ Hiob 2:4.
Nyɛɛ kane Hiob 23:11, 12, nɛ nyɛ susu sane bimi nɛ ɔ he:
Mɛni Hiob pee kɛ tsɔɔ kaa e suɔ Yehowa niinɛ?
Hiob ya nɔ nɛ e ye Yehowa anɔkuale kɛ tsɔɔ kaa e suɔ lɛ
Ke wa ya nɔ nɛ wa ye Yehowa anɔkuale ɔ, lɔ ɔ tsɔɔ kaa wa suɔ lɛ
4. Mo ha nɛ Yehowa bua nɛ jɔ
Nyɛɛ kane Abɛ 27:11, nɛ nyɛ susu sane bimihi nɛ nyɛɛ se nɛ ɔmɛ a he:
Kɛ Yehowa nuɔ he ha kɛɛ ke o pee o he ní lelɔ nɛ o buɔ lɛ tue? Mɛni he je?
5. O ma nyɛ maa ye Yehowa anɔkuale
Suɔmi nɛ wa ngɛ kɛ ha Yehowa a haa nɛ wa tsɔɔ ni kpahi e he ní. Akɛnɛ wa yeɔ Yehowa anɔkuale he je ɔ, wa tsɔɔ ni kpahi e he ní ke e he wa kaa wa maa pee jã po. Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
Anɛ e yee ha mo kaa o maa tu Yehowa he munyu kɛ tsɔɔ ni kpahi lo?
Ngɛ video ɔ mi ɔ, mɛni lɛ ye bua Grayson nɛ e ye e gbeye yemi ɔ nɔ ɔ?
Ke wa suɔ níhi nɛ Yehowa suɔ, nɛ wa hiɔ níhi nɛ e hiɔ ɔ, e be yee ha wɔ kaa wa maa ye lɛ anɔkuale. Nyɛɛ kane La 97:10, nɛ nyɛ susu sane bimihi nɛ nyɛɛ se nɛ ɔmɛ a he:
Ngɛ níhi nɛ o ba kase ɔ nya a, mɛni ji ní komɛ nɛ Yehowa suɔ? Mɛni ji ní komɛ nɛ́ e sume?
Mɛni maa ye bua mo konɛ o suɔ nɔ́ kpakpa nɛ o hiɔ nɔ́ yayami?
6. Ke wa bu Yehowa tue ɔ, wa náa he se
Yehowa tue nɛ o maa bu ɔ se be. Nyɛɛ kane Yesaya 48:17, 18, nɛ nyɛ susu sane bimihi nɛ nyɛɛ se nɛ ɔmɛ a he:
Ke o hyɛ ɔ, anɛ wa ma nyɛ ma ná nɔ mi mami kaa Yehowa le níhi nɛ hi ha wɔ be fɛɛ be lo? Mɛni he je?
Kɛ ba si amlɔ nɛ ɔ, kɛ o ná Baiblo ɔ nɛ o ngɛ kasee, kɛ Yehowa nɛ ji anɔkuale Mawu ɔ he ní nɛ o ngɛ kasee ɔ he se ha kɛɛ?
NI KOMƐ DEƆ KE: “Bɔ nɛ i peeɔ ye ní ha a he hia we Yehowa.”
Mɛni ngmami nɛ o kɛ maa tsɔɔ kaa wa ní peepee ma nyɛ ma ha nɛ Yehowa bua nɛ jɔ aloo e ma nyɛ ma ha nɛ e hao?
NYA MWƆMI
Wa tsɔɔ kaa wa suɔ Yehowa ke wa buɔ lɛ tue, nɛ wa yeɔ lɛ anɔkuale ke e he wa ha wɔ kaa wa maa pee jã po.
Mi Nylɔmi
Mɛni o kase ngɛ Hiob nɔ hyɛmi nɔ́ ɔ mi?
Mɛni o maa pee kɛ tsɔɔ kaa o suɔ Yehowa?
Mɛni maa ye bua mo konɛ o ya nɔ nɛ o ye Yehowa anɔkuale?
NÍ KPAHI NƐ MAA YE BUA MO
Moo hyɛ nɔ́ nɛ o maa pee konɛ o ye Yehowa kɛ asafo ɔ anɔkuale.
Moo kase adesahi a nya nɛ Satan po ɔ he ní babauu.
“Hiob Ya Nɔ Nɛ E Pee Nɔ́ Nɛ Da” (Mɛni Sɛ Gbi Nɛ Ngɛ Baiblo ɔ Mi? fã 6)
Moo hyɛ níhi nɛ jokuɛwi po ma nyɛ maa pee kɛ tsɔɔ kaa a suɔ Yehowa.
Ke niheyo loo yiheyo ko juami bi ngɛ e nɔ nyɛe kaa e pee nɔ́ ko nɛ dɛ ɔ, mɛni ji ní komɛ nɛ e ma nyɛ maa pee konɛ e ye Mawu anɔkuale?