• Moo Hɛ Mo Kɛ Su Mawu He Kɛ Gu Sɔlemi Nɔ
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se

    • Moo Hɛ Mo Kɛ Su Mawu He Kɛ Gu Sɔlemi Nɔ

      Anɛ o nuɔ he kaa o hia blɔ tsɔɔmi ngɛ o si himi mi lo? Anɛ o ngɛ sane bimi komɛ nɛ a he hia nɛ o suɔ kaa o ná a heto lo? Anɛ o hia bua womi lo? Anɛ o suɔ nɛ o hɛ mo kɛ su Yehowa he lo? Sɔlemi maa ye bua mo ngɛ ní nɛ ɔmɛ tsuo a blɔ fa mi. Se mɛni ji blɔ nɛ da nɛ e sa nɛ o gu nɔ kɛ sɔle? Anɛ Mawu buɔ sɔlemihi tsuo tue lo? Mɛni o maa pee konɛ o ná nɔ mi mami kaa e maa bu o sɔlemi tue? Ha nɛ waa hyɛ.

      1. Mɛnɔ e sa kaa waa sɔle kɛ ha, nɛ mɛni níhi wa ma nyɛ maa sɔle ngɛ a he?

      Yesu tsɔɔ kaa e sa nɛ waa sɔle kɛ ha wa Tsɛ nɛ ngɛ hiɔwe ɔ pɛ. Yesu nitsɛ sɔle kɛ ha Yehowa. E de ke: “Nyɛɛ sɔle kikɛ nɛ ɔ: ‘Wa Tsɛ nɛ o ngɛ hiɔwe . . .’” (Mateo 6:9) Ke wa sɔleɔ kɛ haa Yehowa a, huɛ bɔmi nɛ ngɛ waa kɛ lɛ wa kpɛti ɔ mi maa wa.

      Wa ma nyɛ maa sɔle ngɛ nɔ́ fɛɛ nɔ́ ko he. Se loko Mawu ma ha wa sɔlemi ɔ heto ɔ, e sa nɛ e kɛ e suɔmi nya ní peemi nɛ kɔ. Ngmami ɔ de ke: “Ke wa bi [Mawu] nɔ́ ko nɛ e kɛ e suɔmi nya ní peemi kɔ ɔ, e buɔ wɔ tue.” (1 Yohane 5:14) Yesu tsɔɔ ní pɔtɛɛ komɛ nɛ wa ma nyɛ maa sɔle ngɛ a he. (Kane Mateo 6:9-​13.) Ngɛ wa hiami níhi nɛ wa maa sɔle ngɛ a he ɔ tsuo se ɔ, e sa nɛ wa kai nɛ waa na Mawu si ngɛ níhi nɛ e pee ha wɔ ɔmɛ a he je, nɛ wa de lɛ nɛ e ye bua ni kpahi hulɔ.

      2. Kɛ e sa nɛ́ waa sɔle ha kɛɛ?

      Baiblo ɔ woɔ wɔ he wami kaa ‘waa fa kue ha Mawu kɛ wa tsui tsuo.’ (Kɔmɔ Yemi 2:19) Enɛ ɔ tsɔɔ kaa e sa nɛ wa sɔlemi ɔ nɛ je wa tsui mi tɔɔ. Wa ma nyɛ maa sɔle nɛ e je kpo, nɛ wa ma nyɛ maa sɔle ngɛ wa yi mi hulɔ, nɛ e sa nɛ bu nɛ hi bɔ nɛ wa maa pee wa nɔmlɔ tso ɔ ha ke wa ngɛ sɔlee ɔ hu he. Wa ma nyɛ maa sɔle be fɛɛ be, nɛ wa ma nyɛ maa sɔle ngɛ he fɛɛ he hulɔ.

      3. Mɛni blɔhi a nɔ nɛ Mawu guɔ kɛ haa wa sɔlemihi a heto?

      E peeɔ jã ngɛ blɔ slɔɔtohi a nɔ. Yehowa ha wɔ Baiblo ɔ, nɛ lɔ ɔ yeɔ bua wɔ nɛ wa náa wa sane bimi ɔmɛ a heto. Mawu Munyu ɔ kanemi ma ‘ha nɛ nɔ nɛ be níhi a si kpami ɔ po maa le ní.’ (La 19:7; kane Yakobo 1:5.) Mawu ma nyɛ ma ha nɛ wa ná tue mi jɔmi ke waa kɛ haomihi ngɛ kpee. Jehanɛ se hu ɔ, Mawu ma nyɛ maa ta e sɔmɔli a tsui he nɛ a ye bua wɔ ke wa hia yemi kɛ buami.

      MOO KASE BABAUU

      Moo kase blɔ nɔ nɛ o maa gu kɛ sɔle kɛ je o tsui mi konɛ e sa Mawu hɛ mi, kɛ bɔ nɛ sɔlemi maa ye bua mo ha.

      4. Níhi nɛ Mawu suɔ nɛ waa pee konɛ e bu wa sɔlemi tue

      Mɛni ji níhi nɛ maa tsɔɔ kaa Mawu maa bu wa sɔlemi tue aloo e be tue bue? Mo je VIDEO ɔ.

      VIDEO: Anɛ Mawu Buɔ Sɔlemihi Tsuo Tue Lo?​—Fã Ko (2:42)

      Yehowa suɔ kaa waa sɔle kɛ ha lɛ. Nyɛɛ kane La 65:2, nɛ nyɛ susu sane bimihi nɛ nyɛɛ se nɛ ɔmɛ a he:

      • Anɛ o susu kaa ‘Sɔlemi tue bulɔ’ ɔ suɔ nɛ o sɔle kɛ ha lɛ lo? Mɛni he je nɛ o de jã a?

      Ke wa suɔ nɛ́ Mawu nɛ bu wa sɔlemi tue ɔ, lɛɛ e sa nɛ waa bɔ mɔde nɛ waa ye e mlaa amɛ a nɔ. Nyɛɛ kane Mika 3:4 kɛ 1 Petro 3:12, nɛ nyɛ susu sane bimi nɛ ɔ he:

      • Mɛni e sa nɛ́ waa pee konɛ wa ná nɔ mi mami kaa Yehowa maa bu wa sɔlemi tue?

      Ke ta ba a, kuu enyɔ ɔmɛ tsuo nɛ a kɛ a sibi ngɛ ta a hwue ɔ sɔleɔ ha Mawu konɛ e ha nɛ a ye kunimi. Anɛ o susu kaa Mawu ma ha sɔlemi nɛ je kuu enyɔ nɛ ɔmɛ a ngɔ ɔ eko heto lo?

      5. E sa nɛ waa sɔle kɛ je wa tsui mi

      A tsɔɔ ni komɛ sɔlemi pɔtɛɛ komɛ, nɛ be fɛɛ be nɛ a maa sɔle ɔ, a sɔleɔ jamɛ a sɔlemi kake too ɔ nɔuu. Se anɛ jã ji bɔ nɛ Mawu suɔ nɛ waa sɔle kɛ ha lɛ lo? Nyɛɛ kane Mateo 6:7, nɛ nyɛ susu sane bimi nɛ ɔ he:

      • Mɛni o maa pee konɛ be fɛɛ be ɔ, o ‘ko hi munyu kake ɔ nɔuu mi tie si abɔ’ ngɛ o sɔlemihi a mi?

      Daa ligbi ɔ, o ma nyɛ ma susu nɔ́ pɔtɛɛ ko nɛ Yehowa pee ha mo ngɛ ligbi ɔ mi ɔ he, konɛ o na lɛ si ngɛ he. Moo ngɔ otsi kake kɛ pee enɛ ɔ, nɛ o ma ba yɔse kaa o maa sɔle ngɛ ní slɔɔtoslɔɔtohi kpaago a he nɛ́ o be munyu kake too ɔ mi tĩe.

      Jokuɛ ko nɛ e kɛ e fɔli ngɛ ní sɛɛe.

      Tsɛ kpakpa suɔ kaa e bi nɛ je e tsui mi nɛ e kɛ lɛ nɛ sɛɛ ní, jã nɔuu kɛ̃ nɛ Yehowa hu suɔ nɛ waa je wa tsui mi nɛ waa sɔle kɛ ha lɛ

      6. Sɔlemi ji nike ní nɛ e je Mawu ngɔ

      Kɛ sɔlemi maa ye bua wɔ ha kɛɛ, titli ɔ, ngɛ haomi behi a mi? Mo je VIDEO ɔ.

      VIDEO: Sɔlemi Yeɔ Bua Wɔ Nɛ Wa Nyɛɔ Fĩɔ Si (1:32)

      Baiblo ɔ wo si kaa ke wa sɔle ɔ, wa ma ná tue mi jɔmi nitsɛnitsɛ. Nyɛɛ kane Filipi Bi 4:6, 7, nɛ nyɛ susu sane bimihi nɛ nyɛɛ se nɛ ɔmɛ a he:

      • E ngɛ mi kaa pi be fɛɛ be nɛ sɔlemi jeɔ wa nyagba amɛ kɛ jeɔ mohu lɛɛ, se kɛ e yeɔ bua wɔ ha kɛɛ?

      • Mɛni ji ní komɛ nɛ o suɔ kaa o maa sɔle ngɛ a he?

      Anɛ o le lo?

      Munyungu nɛ ji “amen” ɔ sisi ji “e ba mi jã.” Kɛ je blema tɔɔ nɛ a deɔ “amen” kɛ gbeɔ sɔlemi nya.​—1 Kronika 16:36.

      7. Mo ná be kɛ sɔle

      Behi fuu ngɛ nɛ wa be deka, enɛ ɔ he ɔ, wa hɛ jeɔ nɔ kaa wa maa sɔle. Kɛ sɔlemi he hia Yesu ha kɛɛ? Nyɛɛ kane Mateo 14:23 kɛ Maako 1:35, nɛ nyɛ susu sane bimihi nɛ nyɛɛ se nɛ ɔmɛ a he:

      • Mɛni Yesu pee konɛ e ná be kɛ sɔle?

      • Mɛni be o ma nyɛ maa sɔle?

      Foni ɔmɛ: Yo ko nɛ e ngɛ sɔlee ngɛ ligbi ɔ mi, 1. benɛ e te si mɔtu. 2. e kɛ e bimɛ. 3. benɛ e ngɛ ní tsumi he. 4. benɛ e yaa ye ní.

      NI KOMƐ DEƆ KE: “E he hia we nɛ́ waa sɔle, ejakaa nɔ ko be nɛ buɔ sɔlemi tue.”

      • Ke nɔ ko de jã a, mɛni o ma de?

      NYA MWƆMI

      Ke wa sɔleɔ kɛ jeɔ wa tsui mi ɔ, e haa nɛ wa hɛɛ kɛ suɔ Mawu he, wa náa tue mi jɔmi, nɛ wa náa he wami kɛ peeɔ Yehowa suɔmi nya ní hulɔ.

      Mi Nylɔmi

      • Mɛnɔ nɛ e sa kaa waa sɔle kɛ ha?

      • Kɛ e sa kaa waa sɔle ha kɛɛ?

      • Kɛ wa náa sɔlemi he se ha kɛɛ?

      Nɔ́ Nɛ O Ma Tsu He Ní

      NÍ KPAHI NƐ MAA YE BUA MO

      Moo hyɛ sanehi nɛ nihi pɔɔ bimi kɛ kɔ sɔlemi he ɔ a hetohi.

      “Níhi Kpaago Nɛ E He Hia Nɛ O Le Ngɛ Sɔlemi He” (Hwɔɔmi Mɔ, October 1, 2010)

      Moo kase nɔ́ he je nɛ e he hia kaa o sɔle, kɛ blɔ nɔ nɛ o maa gu konɛ o ha nɛ o sɔlemi nɛ nu tso ɔ he ní.

      “Mɛni He Je Nɛ E Sa Nɛ Ma Sɔle?” (Munyu nɛ ɔ ngɛ Intanɛti ɔ nɔ)

      Moo hyɛ nɔ́ nɛ Baiblo ɔ de ngɛ nɔ nɛ e sa kaa waa sɔle kɛ ha a he.

      “Anɛ E Sa Nɛ Waa Sɔle Kɛ Ha He Tsɔli (Saints) Lo?” (Munyu nɛ ɔ ngɛ Intanɛti ɔ nɔ)

      Ngɛ video nɛ ɔ mi ɔ, moo hyɛ kaa he nɛ wa maa sɔle ngɛ, kɛ be nɛ wa maa sɔle ɔ he hia lo.

      Moo Sɔle Be Fɛɛ Be (1:22)

  • Yaa Nɔ Nɛ O Hɛ Kɛ Su Yehowa He
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se

    • 4. Yaa nɔ nɛ o kɛ o Huɛ Yehowa nɛ sɛɛ ní

      Sɔlemi nɛ o sɔleɔ kɛ Baiblo ɔ nɛ o kaseɔ ɔ ye bua mo nɛ o ba pee Yehowa huɛ. Kɛ ní enyɔ nɛ ɔmɛ nɛ o maa ya nɔ maa pee ɔ maa ye bua mo konɛ o hɛ kɛ su Yehowa he wawɛɛ ha kɛɛ?

      Nyɛɛ kane Kɔmɔ Yemi 2:​19, nɛ́ nyɛ susu sane bimi nɛ ɔ he:

      • Bɔ nɛ pee nɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa a, kɛ e sa nɛ sɔlemi nɛ o sɔleɔ ɔ nɛ hi ha kɛɛ?

      Nyɛɛ kane La 1:​2, nɛ́ nyɛ susu sane bimi nɛ ɔ he:

      • Mɛni o maa pee konɛ o ná o Baiblo kanemi ɔ he se wawɛɛ konɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa?

      Mɛni o ma nyɛ maa pee konɛ o dɛ he ní kasemi nɛ nu tso saminya? Mo je VIDEO ɔ, nɛ́ o hyɛ ní komɛ nɛ maa ye bua mo. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he.

      VIDEO: Ha O Dɛ He Ní Kasemi Nɛ Nu Tso (5:22)

      • Ga womihi nɛ a kɛ ha ngɛ video ɔ mi ɔ te nɛɛ nɛ o suɔ kaa o kɛ ma tsu ní?

      • Mɛni munyuyihi lɛ o suɔ kaa o maa kase a he ní?