NƆ́ HE JE NƐ E HE HIA KAA WAA HYƐ WA MUNYU TUTUI SAMINYA

4, 5. Mɛni Baiblo mi abɛ komɛ de ngɛ he wami nɛ wa nya mi munyu ngɛ ɔ he?

⁴ Yi mi tomi kake he je nɛ e he hia kaa waa hyɛ wa munyu tutui saminya ji kaa wa nya mi munyu ngɛ he wami. Abɛ 15:4 ɔ de ke: “Munyu blɛuu kɛ he jɔmi baa; se ke sisimi ba je mi pɛ e gbeɔ nɔ mumi.”a Bɔ nɛ nyu haa tso nɛ ngɛ gboe he wami ɔ, jã nɔuu nɛ munyu blɛuu hu haa nihi nɛ nuɔ ɔ he jɔmi. Se ke waa kɛ wa lilɛ tuɔ munyu yaya a, lɔ ɔ ma nyɛ maa ye ni kpahi awi. Niinɛ, munyuhi nɛ wa tuɔ ɔ ngɛ he wami. E ma nyɛ maa ye nɔ awi, nɛ e ma nyɛ maa wo nɔ he wami.​​—Abɛ 18:21.