Ke Nɔ Ko Gbo ɔ, Mɛni Si Fɔfɔɛ Mi E Ya Jeɔ?

Anɛ o suɔlɔ ko gbo hyɛ lo? Ngɛ si fɔfɔɛ nɛ mi wa nɛ ɔ mi ɔ, eko ɔ, o ma bi ke: ‘Ke wa gbo ɔ, mɛni si fɔfɔɛ mi wa ya jeɔ? Anɛ hɛ nɔ kami ngɛ kaa wa maa na wa suɔli nɛ a gbo ɔ ekohu lo?’ Wa maa na heto nɛ woɔ nɔ bua nɛ Baiblo ɔ kɛ ha ngɛ ní kasemi nɛ ɔ kɛ nɔ́ nɛ nyɛɛ se ɔ mi.

1. Ke nɔ ko gbo ɔ, mɛni si fɔfɔɛ mi e ya jeɔ?

Yesu ngɔ gbenɔ kɛ to mahe he. Ke nɔ ko hwɔ mahe vii ɔ, e li níhi nɛ ngɛ nɔ yae ngɛ he nɛ e ngɛ ɔ. Ngɛ mɛni blɔ nɔ nɛ gbenɔ ngɛ kaa mahe? Ke nɔ ko gbo ɔ, e nui nɔ́ yeyee he, nɛ ke e suɔ e huɛmɛ kɛ e weku li kaa mɛni po ɔ, e hɛ ja we. Baiblo ɔ de ke: ‘Ni gbogboe ɔmɛ li nɔ́ ko nɔ́ ko.’​—Kane Fiɛlɔ 9:5.

2. Ke wa le anɔkuale nɛ kɔɔ gbenɔ he ɔ, kɛ wa ma ná he se ha kɛɛ?

Nihi fuu yeɔ gbenɔ kɛ gbogboe ɔmɛ po gbeye! Se nɔ́ nɛ Baiblo ɔ de ngɛ gbenɔ he ɔ ma nyɛ maa wo o bua. Yesu de ke: “Anɔkuale ɔ ma ha nɛ nyɛ maa ye nyɛ he.” (Yohane 8:32) Jami komɛ tsɔɔ kaa nɔ́ ko ngɛ wa mi nɛ ke wa gbo ɔ, e yaa nɔ nɛ e hiɔ si. Se Baiblo ɔ tsɔɔ we jã. Ke nɔ ko gbo ɔ, e pii we. Jehanɛ ɔ se hu ɔ, akɛnɛ gbogboe ɔmɛ li nɔ́ ko nɔ́ ko he je ɔ, a be nyɛe maa ye wɔ awi. Enɛ ɔ he ɔ, e sɛ nɛ waa pee níhi kɛ sa gbogboe ɔmɛ a hɛ mi aloo wa ja mɛ, nɛ e sɛ nɛ waa sɔle ha mɛ hulɔ.

Ni komɛ deɔ ke a kɛ gbogboe ɔmɛ ma nyɛ maa tu munyu. Se enɛ ɔ be hie peemi. Kaa bɔ nɛ wa na kɛ sɛ hlami ɔ, gbogboe ɔmɛ “li nɔ́ ko nɔ́ ko.” Nihi fuu susuɔ kaa a kɛ a suɔli nɛ a gbo ɔ ma nyɛ maa tu munyu, se ngɛ anɔkuale mi ɔ, nihi nɛ a bɔɔ mɔde kaa a kɛ gbogboe ɔmɛ maa tu munyu ɔ kɛ daimoniohi nɛ a pee a he kaa nihi nɛ a gbo ɔ lɛ tuɔ munyu ɔ nɛ. Enɛ ɔ he ɔ, ke wa le anɔkuale nɛ kɔɔ gbenɔ he ɔ, e maa po wa he piɛ kɛ je daimonio ɔmɛ a he. Yehowa bɔ wɔ kɔkɔ kaa waa kɛ gbogboe ɔmɛ nɛ ko tu munyu, ejakaa e le kaa ke wa pee jã a, daimonio ɔmɛ ma nyɛ maa ye wɔ awi.​—Kane 5 Mose 18:10-12.

3. Moo kase si fɔfɔɛ tutuutu mi nɛ gbogboe ɔmɛ ngɛ

Ngɛ je ɔ mi tsuo ɔ, nihi hɛɛ susumi ekpaekpahi ngɛ si fɔfɔɛ mi nɛ gbogbo ɔmɛ ngɛ ɔ he. Ngɛ anɔkuale mi ɔ, susumi nɛ ɔmɛ tsuo be nyɛe maa pee anɔkuale.

• Mɛni nɛ nihi nɛ a ngɛ o kpɔ ɔ mi ɔ he ye kɛ kɔ si fɔfɔɛ mi nɛ gbogboe ɔmɛ ngɛ ɔ he?

VIDEO: Mɛni Si Fɔfɔɛ Mi Gbogboehi Ngɛ?​—Fã Ko (1:19)

Nyɛɛ kane Fiɛlɔ 3:20 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

• Kaa bɔ nɛ ngmami ɔ tsɔɔ, ke nɔ ko gbo ɔ, mɛni si fɔfɔɛ mi e ya jeɔ?

• Anɛ ngmami ɔ tsɔɔ kaa ke nɔ ko gbo ɔ, susuma ko ngɛ e mi nɛ e gbo we, nɛ́ e ya hiɔ si ngɛ he ko lo?

Baiblo ɔ tu Lazaro nɛ ji Yesu huɛ nɛ nyu bi ngɛ e kɛ lɛ a kpɛti ɔ gbenɔ ɔ he munyu. Ke nyɛ ngɛ Yohane 11:11-​14 kanee ɔ, mo kadi si fɔfɔɛ nɛ́ Yesu tsɔɔ kaa Lazaro ngɛ mi ɔ. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he:

• Mɛni he nɛ Yesu ngɔ gbenɔ kɛ to?

• Mɛni nɛ enɛ ɔ deɔ wɔ ngɛ si fɔfɔɛ mi nɛ gbogboe ɔmɛ ngɛ ɔ he?

• Kɛ o naa nɔ́ nɛ Baiblo ɔ de ngɛ gbenɔ he ɔ ha kɛɛ?

4. Ke wa le anɔkuale nɛ kɔɔ gbenɔ he ɔ, wa ma ná he se

Ke wa le anɔkuale nɛ kɔɔ gbenɔ he ɔ, lɔ ɔ ma ha nɛ wa be gbogboe ɔmɛ gbeye yee. Nyɛɛ kane Fiɛlɔ 9:10, nɛ nyɛ susu sane bimi nɛ ɔ he:

• Anɛ gbogboe ɔmɛ ma nyɛ maa ye wɔ awi lo?

Ke wa he anɔkuale munyu nɛ ngɛ Baiblo ɔ mi ɔ ye ɔ, lɔ ɔ be hae nɛ wa he lakpa munyuhi ye. Lakpa munyu nɛ ɔmɛ ekomɛ ji kaa e sa nɛ waa pee níhi kɛ sa gbogboe ɔmɛ a hɛ mi, aloo wa ja mɛ. Nyɛɛ kane Yesaya 8:19 kɛ Kpo Jemi 4:11 ɔ, nɛ nyɛ susu sane bimi nɛ ɔ he:

• Kɛ o susu kaa Yehowa maa nu he ha kɛɛ, ke nɔ ko jaa nɔ ko nɛ́ e gbo aloo e biɔ yemi kɛ buami ngɛ e ngɔ?

5. Anɔkuale nɛ kɔɔ gbenɔ he ɔ woɔ wa bua

A tsɔɔ nihi babauu kaa ke a gbo ɔ, a maa gbla a tue ngɛ ní yayamihi nɛ a pee kɛ be ɔmɛ a he. Se lemi nɛ wa ba le kaa a pii we nihi nɛ a gbo ɔ, ke a ji nihi nɛ a pee yayami nguahi po ɔ, woɔ wa bua wawɛɛ. Nyɛɛ kane Roma Bi 6:7 ɔ, nɛ nyɛ susu sane bimi nɛ ɔ he:

• Baiblo ɔ de ke, ke nɔ ko gbo ɔ, Mawu bui lɛ fɔ ngɛ e yayami ɔmɛ a he hu. Anɛ o susu kaa ke nɔ ko gbo ɔ, a piiɔ lɛ ngɛ yayamihi nɛ e pee kɛ be ɔmɛ a he lo?

Ke wa ya nɔ nɛ wa kase Yehowa he ní ɔ, wa ma ba le lɛ saminya, nɛ lɔ ɔ ma ha nɛ́ waa na kaa e be nihi nɛ a gbo ɔ piie kɔkɔɔkɔ. Nyɛɛ kane 5 Mose 32:4 kɛ 1 Yohane 4:8 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

• Anɛ Mawu nɛ e ngɛ suhi nɛ a wo a ta ngɛ ngmami nɛ ɔmɛ a mi ɔ ma ha nɛ a pii nihi nɛ a gbo ɔ lo?

• Ke o hyɛ ɔ, anɔkuale nɛ kɔɔ gbenɔ he ɔ woɔ nɔ bua lo? Mɛni he je?

NYA MWƆMI

Ke nɔ ko gbo ɔ, e wami se po. Gbogboe ɔmɛ pii we, nɛ a be nyɛe maa ye nihi nɛ a hɛ ngɛ ɔ awi hulɔ.

Mi Nylɔmi

• Ke nɔ ko gbo ɔ, mɛni si fɔfɔɛ mi e ya jeɔ?

• Kɛ wa náa anɔkuale nɛ kɔɔ gbenɔ he ɔ he se ha kɛɛ?

• Kɛ anɔkuale nɛ kɔɔ gbenɔ he ɔ woɔ wa bua ha kɛɛ?

NÍ KPAHI NƐ MAA YE BUA MO

Moo hyɛ nɔ́ tutuutu nɛ “klaa” aloo “susuma” ji ngɛ Baiblo ɔ mi.

“Mɛni Ji Klaa a?” (Munyu nɛ ɔ ngɛ Intanɛti ɔ nɔ)

Moo hyɛ kaa Mawu piiɔ yayami peeli ngɛ hɛl niinɛ lo.

Anɛ Hɛl Ji He Ko Nɛ A Piiɔ Nihi Ngɛ Niinɛ Lo? 3:07

Anɛ e sa nɛ waa ye gbogboe ɔmɛ gbeye lo?

Anɛ Ni Gbogbo Ɔmɛ A Mumi ɔ Ma Nyɛ Maa Ye Bua Mo Aloo A Ma Nyɛ Maa Ye Mo Awi? Anɛ A Ngɛ Niinɛ Lo? (womiyo)

Moo hyɛ bɔ nɛ nyumu ko tsui nɔ e mi ha benɛ e kase anɔkuale nɛ kɔɔ si fɔfɔɛ mi nɛ gbogbo ɔmɛ ngɛ ɔ he ní ɔ.

“Ye Bua Jɔ Hetohi Nɛ A Ngɛ Heii Nɛ Sisi Numi Ngɛ He Nɛ Baiblo ɔ Kɛ Ha a He” (Hwɔɔmi Mɔ, April 1, 2015)