Kekleekle ɔ, Ezekiel na kaa gbogboehi a wu ɔmɛ “gbli kadokado.” (Ezekiel 37:2, 11) Enɛ ɔ tsɔɔ kaa ni ɔmɛ gbo be kɛkɛɛ. Nɔ́ nɛ ji enyɔ ɔ, Ezekiel na kaa gbogboe ɔmɛ ba wami mi bɔɔbɔɔbɔɔ, se pi si kake. E nu nɛ “wu ɔmɛ bɔni a he mimiɛmi kɛ a sibi a he sami kpɛkpɛ kpɛkpɛ; nɛ wu kɛ wu tsa.” Lɔ ɔ se ɔ, e na kaa “pani kɛ lo ba ha wu ɔmɛ a he.” Nɛ he womi ba ha lo ɔmɛ a nɔ. Pee se ɔ, “mumi ba gbogboe ɔmɛ a mi; a ba pee hɛ kali.” Nyagbenyagbe ɔ, benɛ gbogboe ɔmɛ ba wami mi ekohu ɔ, Yehowa ha nɛ a ya hi mɛ nitsɛmɛ a zugba nɔ. Ní nɛ ɔmɛ tsuo ma he be.​—Ezekiel 37:7-10, 14.

Jehanɛ hu ɔ, wa na ngɛ Ezekiel nina a mi kaa Mawu we bi ɔmɛ kpale ba wami mi ekohu, nɛ bɔɔbɔɔbɔɔ ɔ, a kpɔ̃ mɛ kɛ je lakpa jami mi. Lɛɛ mɛni be enɛ ɔ je sisi, nɛ mɛni blɔ nɔ a gu kɛ pee jã? Ngɛ nina a mi ɔ, e de ke wu ɔmɛ bɔni “a sibi he sami kpɛkpɛ kpɛkpɛ.” Enɛ ɔ je sisi benɛ e piɛ jeha lafa bɔɔ komɛ nɛ nyagbe be ɔ maa su ɔ. Jamɛ a be ɔ mi ɔ, e ngɛ mi kaa lakpa tsɔɔmihi pɔ he mohu lɛɛ, se anɔkualetsɛmɛ komɛ ngɛ nɛ a suɔ kaa a maa le anɔkuale ɔ nɛ a sɔmɔ Mawu. A kase Baiblo ɔ, nɛ a bɔ mɔde wawɛɛ kaa a ma de nihi nɔ́ nɛ a ngɛ kasee ɔ. Ni komɛ hu bɔ mɔde wawɛɛ kaa a maa tsɔɔ Baiblo ɔ sisi kɛ ya gbihi nɛ nihi ma nyɛ maa nu sisi a mi.