• Mɛni Ji Mawu Matsɛ Yemi ɔ?
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se

    • Mawu Matsɛ Yemi ɔ ji nɔ́ titli nɛ Baiblo ɔ tu he munyu. Yehowa maa gu Matsɛ Yemi nɛ ɔ nɔ kɛ ha nɛ e yi mi tomi kɛ kɔ zugba a he ɔ nɛ ba mi. Mɛni ji Matsɛ Yemi nɛ ɔ? Kɛ wa plɛ kɛ le kaa e ngɛ nɔ yee amlɔ nɛ ɔ ha kɛɛ? Mɛni nɛ Matsɛ Yemi ɔ tsu momo? Nɛ mɛni nɛ e ma tsu hwɔɔ se? Ní kasemi nɛ ɔ kɛ ní kasemi enyɔ nɛ maa nyɛɛ se ɔ ma ha sane bimi nɛ ɔmɛ a heto.

      1. Mɛni ji Mawu Matsɛ Yemi ɔ, nɛ mɛnɔ ji e nya Matsɛ?

      Mawu Matsɛ Yemi ɔ ji nɔ yemi nɛ Yehowa Mawu nitsɛ to sisi. Yesu Kristo ji Matsɛ Yemi nɛ ɔ nya Matsɛ, nɛ e maa hi hiɔwe kɛ ye nɔ. (Mateo 4:17; Yohane 18:36) Baiblo ɔ de ngɛ Yesu he ke: ‘E maa ye Matsɛ kɛ maa ya neneene.’ (Luka 1:32, 33) Akɛnɛ Yesu ji Mawu Matsɛ Yemi ɔ nya Matsɛ he je ɔ, e maa ye nihi tsuo nɛ a ngɛ zugba a nɔ ɔ a nɔ.

      2. Mɛnɔmɛ nɛ a maa piɛɛ Yesu he kɛ ye Matsɛ?

      Pi Yesu pɛ nɛ e maa ye nɔ ngɛ Mawu Matsɛ Yemi ɔ mi. Nihi nɛ a je ‘wɛtso fɛɛ wɛtso kɛ lilɛ kɛ nimli kɛ je ma amɛ a mi ɔ . . . maa ye zugba a nɔ kaa matsɛmɛ.’ (Kpo Jemi 5:9, 10) Nihi enyɛmɛ nɛ a maa piɛɛ Kristo he kɛ ye nɔ? Kɛ je benɛ Yesu ba zugba a nɔ nɛ e kpale kɛ ho hiɔwe ya a, nimli ayɔhi abɔ ba pee e se nyɛɛli. Se anɛ, nimli nɛ ɔmɛ tsuo maa piɛɛ Yesu he kɛ ye nɔ lo? Dɛbi. A kpɛti nihi 144,000 pɛ nɛ a ma ya piɛɛ e he ngɛ hiɔwe kɛ ye nɔ. (Kane Kpo Jemi 14:1-4.) Kristofohi nɛ a piɛ ɔ lɛɛ a maa pee Matsɛ Yemi ɔ sisi bimɛ ngɛ zugba a nɔ.​—La 37:29.

      3. Mɛni he je nɛ Mawu Matsɛ Yemi ɔ hi pe adesahi a nɔ yemi ɔ?

      Ke adesa nɔ yeli bɔ mɔde kaa a maa pee ní kpakpahi po ɔ, a be he wami nɛ a kɛ maa pee nɔ́ fɛɛ nɔ́ nɛ a suɔ kaa a maa pee ɔ. Kɛ yaa kɛ yaa a, nɔ yeli kpahi ba yeɔ nɔ. Se nɔ yeli nɛ ɔmɛ hu ma nyɛ maa pee nihi nɛ a foɔ mɛ pɛ a nɔ́ mi nɛ́ a susuu we ni kpahi a he. Se Yesu nɛ e ji Mawu Matsɛ Yemi ɔ nya Matsɛ ɔ lɛɛ, nɔ ko nɔ ko be lɛ jee ngɛ sɛ ɔ nɔ kɔkɔɔkɔ. Ngmami ɔ de ke, Mawu “to matsɛ yemi ko sisi, nɛ e se be poe gblegbleegble.” (Daniel 2:44) Yesu maa ye je ɔ tsuo nɔ, nɛ e be ni komɛ bue kaa a he hia pe ni komɛ. Ejakaa e ngɛ suɔmi, e mi mi jɔ, nɛ e yeɔ dami sane, nɛ e maa tsɔɔ nihi ní konɛ mɛ hu a je su kpakpa nɛ ɔmɛ nɔuu kpo.​—Kane Yesaya 11:9.

      MOO KASE BABAUU

      Moo kase nɔ́ he je nɛ Mawu Matsɛ Yemi ɔ hi pe adesahi a nɔ yemi ɔ.

      Yesu Kristo nɛ e ngɛ e matsɛ sɛ ɔ mi ngɛ hiɔwe kɛ ngɛ zugba a nɔ yee. Nihi nɛ a kɛ lɛ maa ye matsɛ ɔ ngɛ e se. Yehowa hɛ mi nyami ɔ ngɛ kpɛe ngɛ a se.

      4. Mawu Matsɛ Yemi ɔ maa ye zugba a tsuo nɔ

      Yesu Kristo ngɛ he wami nɛ́ e kɛ maa ye nɔ pe adesa nɔ yeli tsuo. Nyɛɛ kane Mateo 28:18 ɔ, nɛ nyɛ susu sane bimi nɛ ɔ he:

      • Ngɛ mɛni blɔ nɔ nɛ he blɔ nɛ Yesu ngɛ ɔ nɔ kuɔ kulaa pe he blɔ nɛ adesa nɔ yeli ngɛ ɔ?

      Adesahi pɔɔ a nɔ yemi ɔmɛ tsakemi, nɛ a yeɔ ma pɔtɛɛ komɛ pɛ a nɔ hulɔ. Se Mawu Matsɛ Yemi ɔ hu nɛɛ? Nyɛɛ kane Daniel 7:14 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

      • Mɛni he je nɛ e ji bua jɔmi sane kaa Mawu Matsɛ Yemi ɔ “se be poe gblegbleegble ɔ”?

      • Mɛni he je nɛ e ji bua jɔmi sane kaa Mawu Matsɛ Yemi ɔ maa ye zugba a tsuo nɔ ɔ?

      5. Adesahi a nɔ yemi be nyɛe ma tsu wa nyagba amɛ a he ní

      Mɛni he je nɛ e sa nɛ Mawu Matsɛ Yemi ɔ nɛ ba je adesahi a nɔ yemi ɔ? Mo je VIDEO ɔ, nɛ nyɛ susu sane bimi nɛ ɔ he.

      VIDEO: Mɛni Ji Mawu Matsɛ Yemi ɔ?—Fã Ko (1:41)

      • Mɛni lɛ je adesahi a nɔ yemi mi kɛ ba?

      Nyɛɛ kane Fiɛlɔ 8:9 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

      • Anɛ o susu kaa e sa nɛ Mawu Matsɛ Yemi ɔ nɛ ba je adesa nɔ yemi kɛ je lo? Mɛni he je?

      6. Nihi nɛ a maa ye nɔ ngɛ Mawu Matsɛ Yemi ɔ mi ɔ nu wɔ sisi

      Akɛnɛ Yesu nɛ e ji wa Matsɛ ɔ ba hi si hyɛ kaa adesa he je ɔ, e ma nyɛ maa “nu wa gbɔjɔmi ɔmɛ a he ha wɔ.” (Hebri Bi 4:15) Nyumuhi kɛ yihi anɔkualetsɛmɛ 144,000 nɛ́ a maa piɛɛ Yesu he kɛ ye nɔ ɔ ji nihi nɛ Yehowa hla mɛ “kɛ je wɛtso fɛɛ wɛtso kɛ lilɛ kɛ nimli kɛ je ma” amɛ a mi.​—Kpo Jemi 5:9.

      • Anɛ lemi nɛ o le kaa Yesu kɛ nihi nɛ a maa piɛɛ e he kɛ ye nɔ ɔ le nyagbahi nɛ waa kɛ ngɛ kpee kɛ bɔ nɛ wa nuɔ he ha a woɔ o bua lo? Mɛni he je?

      Nyumuhi kɛ yihi nɛ a pɔ mɛ nu ngɛ be slɔɔtohi a mi, nɛ a je he slɔɔtoslɔɔtohi.

      Yehowa hla nihi nɛ a je ma slɔɔtohi a mi kaa a piɛɛ Yesu he kɛ ye nɔ

      7. Mawu Matsɛ Yemi ɔ ngɛ mlaahi nɛ a nɔ kuɔ pe mlaahi nɛ adesa nɔ yemihi woɔ ɔ

      Nɔ yemihi woɔ mlaahi konɛ a kɛ po a sisi bimɛ a he piɛ, nɛ́ a ná he se hulɔ. Mawu Matsɛ Yemi ɔ hu ngɛ mlaahi nɛ e sa kaa e sisi bimɛ nɛ a ye nɔ. Nyɛɛ kane 1 Korinto Bi 6:9-11 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

      • Kɛ o susu kaa je ɔ mi maa hi ha kɛɛ ke nɔ fɛɛ nɔ kɛ je mi bami he mlaahia nɛ Mawu wo ɔmɛ tsu ní?

      • Anɛ o susu kaa Yehowa ngɛ he blɔ nɛ́ e hyɛɛ blɔ kaa e Matsɛ Yemi ɔ sisi bimɛ nɛ́ a ye mlaa nɛ ɔmɛ a nɔ lo? Mɛni he je?

      • Mɛni tsɔɔ kaa nihi nɛ a bui mlaa nɛ ɔmɛ tue ɔ ma nyɛ ma tsake?​—Hyɛ kuku 11.

      Polisi ko nɛ e wa lɔlehi konɛ nihi nɛ a po blɔ ɔ mi. Nimli slɔɔtoslɔɔtohi nɛ e slo a jeha nɛ a ngɛ lɔle blɔ ɔ mi po.

      Nɔ yemihi woɔ mlaahi konɛ a kɛ po a sisi bimɛ a he piɛ, nɛ́ a ná he se hulɔ. Mawu Matsɛ Yemi ɔ ngɛ mlaahi nɛ́ a nɔ kuɔ. Mlaa nɛ ɔmɛ maa po Matsɛ Yemi ɔ sisi bimɛ ɔmɛ a he piɛ, nɛ a ma ná he se hulɔ

      NI KOMƐ DEƆ KE: “Mawu Matsɛ Yemi ɔ ngɛ wa tsui mi?”

      • Kɛ o ma ha heto kɛɛ?

      NYA MWƆMI

      Mawu Matsɛ Yemi ɔ ji nɔ yemi nitsɛnitsɛ nɛ́ e ngɛ hiɔwe, nɛ e maa ye zugba a tsuo nɔ.

      Mi Nylɔmi

      • Mɛnɔmɛ nɛ a maa ye nɔ ngɛ Mawu Matsɛ Yemi ɔ mi?

      • Mɛni he je nɛ Mawu Matsɛ Yemi ɔ nɔ kuɔ kulaa pe adesa nɔ yemihi tsuo ɔ?

      • Mɛni ji ní komɛ nɛ́ Yehowa ngɛ blɔ hyɛe kaa e Matsɛ Yemi ɔ sisi bimɛ nɛ a pee?

      Nɔ́ Nɛ O Ma Tsu He Ní

      NÍ KPAHI NƐ MAA YE BUA MO

      Moo hyɛ nɔ́ nɛ Yesu de kɛ kɔ he nɛ Mawu Matsɛ Yemi ɔ ngɛ ɔ he.

      “Anɛ Mawu Matsɛ Yemi ɔ Ngɛ O Tsui Mi Lo?” (Munyu nɛ ɔ ngɛ Intanɛti ɔ nɔ)

      Mɛni he je nɛ Yehowa Odasefohi suɔ kaa a maa ye Mawu Matsɛ Yemi ɔ anɔkuale mohu pe adesahi a nɔ yemi ɔ?

      A Fĩ Mawu Matsɛ Yemi ɔ Se (1:43)

      Moo hyɛ nɔ́ nɛ Baiblo ɔ de kɛ kɔ nimli 144,000 nɛ Yehowa hla mɛ kaa a piɛɛ Yesu he kɛ ye Matsɛ ɔ a he.

      “Mɛnɔmɛ Nɛ A Maa Ya Hiɔwe?” (Munyu nɛ ɔ ngɛ Intanɛti ɔ nɔ)

      Mɛni lɛ ha nɛ yo ko nɛ a wo lɛ tsu ɔ ná nɔ mi mami kaa Mawu pɛ lɛ ma nyɛ ma ha nɛ je nɛ a yeɔ dami sane ngɛ mi ɔ maa ba?

      “I Ba Na Nɔ́ He Je Nɛ Nihi Yi Dami Sane ɔ” (O Hɛ Nɛ Tsɛ̃!, November 2011)

      a Wa ma susu je mi bami he mlaa nɛ ɔmɛ ekomɛ a he ngɛ Fã 3 ɔ mi.

  • Nɔ́ Nɛ Mawu Matsɛ Yemi ɔ Ma Tsu
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se

    • Amlɔ nɛ ɔ, Mawu Matsɛ Yemi ɔ ngɛ nɔ yee ngɛ hiɔwe. E be kɛe nɛ́ e maa ye zugba a nɔ, nɛ e ma ha nɛ si himi ngɛ zugba a nɔ ɔ maa pee kpakpa. Ha nɛ waa hyɛ ní komɛ nɛ Matsɛ Yemi ɔ ma tsu.

      1. Ngɛ mɛni blɔ nɔ nɛ Mawu Matsɛ Yemi ɔ ma ha nɛ tue mi jɔmi kɛ dami sane yemi maa ba zugba a nɔ?

      Yesu nɛ e ji Mawu Matsɛ Yemi ɔ nya Matsɛ ɔ ma kpata yiwutsotsɛmɛ, kɛ adesa nɔ yemihi tsuo a hɛ mi ngɛ Harmagedon ta a mi. (Kpo Jemi 16:14, 16) Jamɛ a be ɔ mi ɔ, Baiblo ɔ mi si womi nɛ nyɛɛ se nɛ ɔ maa ba mi. Lɔ ɔ ji: “E piɛ bɔɔ nɛ o be yayami peeli nae hu.” (La 37:10) Yesu maa gu Matsɛ Yemi nɛ ɔ nɔ kɛ ha nɛ tue mi jɔmi kɛ dami sane yemi nɛ hi zugba a nɔ he fɛɛ he.​—Kane Yesaya 11:4.

      2. Ke a ngɛ Mawu suɔmi nya ní pee ngɛ zugba a nɔ ɔ, kɛ si himi ɔ maa hi ha kɛɛ?

      Ngɛ Mawu Matsɛ Yemi ɔ sisi ɔ, “nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.” (La 37:29) Moo po he foni kaa o ngɛ je ko nɛ nihi tsuo peeɔ nɔ́ nɛ da, nɛ́ a suɔ Yehowa kɛ a sibi ɔ mi! Nɔ ko nɔ ko be hiɔ nue hu, nɛ nɔ fɛɛ nɔ maa hi si kɛ maa ya neneene.

      3. Ke a kpata yayami peeli a hɛ mi se ɔ, mɛni Mawu Matsɛ Yemi ɔ ma tsu?

      Ke a kpata yayami peeli a hɛ mi se ɔ, Yesu maa ye nɔ kaa Matsɛ jeha 1,000. Jamɛ a be ɔ mi ɔ, Yesu kɛ nihi 144,000 nɛ a maa piɛɛ e he kɛ ye nɔ ɔ maa ye bua nihi nɛ a ngɛ zugba a nɔ ɔ konɛ a pee nihi nɛ a ye mluku nɛ yayami ko be a he. Ngɛ jeha akpe ɔ nyagbe ɔ, zugba a maa pee paradeiso, nɛ nihi nɛ a ngɛ zugba a nɔ ɔ a bua maa jɔ ejakaa a ngɛ Yehowa mlaa amɛ a nɔ yee. Lɔ ɔ se ɔ, Yesu maa ngɔ Matsɛ Yemi ɔ kɛ ha Yehowa nɛ ji e Tsɛ ɔ ekohu. A ma “tsɔ” Yehowa “biɛ ɔ he” ngɛ blɔ nɛ pe kulaa nɔ. (Mateo 6:9, 10) Jamɛ a be ɔ mi ɔ, e maa pee heii kaa Yehowa ji Nɔ Yelɔ kpakpa nɛ́ e susuɔ e sisi bimɛ a he. Lɔ ɔ se ɔ, Yehowa ma kpata Satan, daimonio ɔmɛ, kɛ nihi tsuo nɛ a teɔ si kɛ woɔ Yehowa nɔ yemi ɔ a hɛ mi. (Kpo Jemi 20:7-10) Si himi kpakpa nɛ Mawu Matsɛ Yemi ɔ maa ngɔ kɛ ba a maa hi si kɛ maa ya neneene.

      MOO KASE BABAUU

      Moo kase nɔ́ he je nɛ wa ma nyɛ ma ná nɔ mi mami kaa Mawu maa gu e Matsɛ Yemi ɔ nɔ kɛ ha nɛ e si womihi tsuo nɛ ngɛ Baiblo ɔ mi ɔ maa ba mi hwɔɔ se ɔ he ní.

      4. Mawu ma ha nɛ adesahi a nɔ yemihi tsuo se maa po

      Baiblo ɔ tsɔɔ kaa: ‘Ni komɛ ngɔɔ blɔ nya nɛ a ná a kɛ yeɔ a nyɛmimɛ awi.’ (Fiɛlɔ 8:9) Yehowa maa gu e Matsɛ Yemi ɔ nɔ kɛ ma ha nɛ dami sane nɛ a yi nɛ ɔ se maa po.

      Nyɛɛ kane Daniel 2:44 kɛ 2 Tɛsalonika Bi 1:6-8 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

      • Mɛni nɛ Yehowa kɛ e Bi Yesu maa pee adesa nɔ yeli kɛ nihi tsuo nɛ a fĩɔ a se ɔ?

      • Kɛ nɔ́ nɛ o kase ngɛ Yehowa kɛ Yesu he ɔ ha nɛ o na kaa a maa ye dami sane ngɛ nɔ́ nɛ a maa pee ɔ mi ha kɛɛ?

      Yesu nɛ e ji Matsɛ ngɛ hiɔwe nɛ e ngɛ paradeiso zugba a nɔ yee.

      5. Yesu ji Matsɛ nɛ se be

      Yesu nɛ e ji Mawu Matsɛ Yemi ɔ nya Matsɛ ɔ maa pee níhi fuu kɛ ha nihi nɛ a maa hi zugba a nɔ ɔ. Mo je VIDEO ɔ, nɛ o hyɛ bɔ nɛ níhi nɛ Yesu pee ɔ tsɔɔ kaa e suɔ nɛ e ye bua nihi ha. Jehanɛ se hu ɔ, o maa na kaa Mawu ha lɛ he wami konɛ e kɛ pee jã.

      VIDEO: Yesu Tsɔɔ Níhi Nɛ Mawu Matsɛ Yemi ɔ Maa Pee (1:13)

      Níhi nɛ Yesu pee benɛ e ngɛ zugba a nɔ ɔ tsɔɔ níhi nɛ Matsɛ Yemi ɔ ma tsu hwɔɔ se. Jɔɔmihi nɛ nyɛɛ se nɛ ɔmɛ a kpɛti te nɛɛ lɛ o ngɛ blɔ hyɛe wawɛɛ? Nyɛɛ kane ngmamihi nɛ a tsɛ se nɛ́ a tu jɔɔmi nɛ ɔmɛ a he munyu ngɛ mi ɔ.

      BENƐ YESU NGƐ ZUGBA A NƆ Ɔ . . .

      AMLƆ NƐ Ɔ NƐ YESU NGƐ HIƆWE Ɔ, E MA . . .

      • e ha nimli akpehi abɔ niye ní ngɛ nyakpɛ blɔ nɔ.​—Mateo 14:17-21.

      • ha nɛ hwɔ se maa po ngɛ je ɔ mi tsuo.​—La 72:16.

      • ha nɛ nɔ fɛɛ nɔ ma ná nɔmlɔ tso mi he wami kpakpa.​—Yesaya 33:24.

      • e tle nihi nɛ a gbo ɔ si kɛ ba wami mi.​—Luka 8:49-55.

      6. Mawu Matsɛ Yemi ɔ maa ngɔ si himi kpakpa kɛ ba hwɔɔ se

      Matsɛ Yemi ɔ ma ha nɛ yi mi nɛ Yehowa to kɛ ha adesahi ɔ maa ba mi. A maa hi si kɛ ya neneene ngɛ paradeiso zugba a nɔ. Mo je VIDEO ɔ, nɛ o hyɛ bɔ nɛ Yehowa gu e Bi Yesu nɔ kɛ ngɛ ní tsue ha konɛ e yi mi tomi ɔ nɛ ba mi.

      VIDEO: Níhi Nɛ Maa Ba Hwɔɔ Se ɔ A He Nɔ Hyɛmi Nɔ́ (4:38)

      Nyɛɛ kane La 37:4 ɔ, nɛ nyɛ susu sane bimi nɛ ɔ he:

      • Kɛ lemi nɛ o ba le kaa Yehowa “ma ha mo níhi nɛ o tsui suɔ” ɔ haa nɛ o nuɔ he ha kɛɛ?

      NI KOMƐ DEƆ KE: “Ke wɔ tsuo wa pee kake ɔ, wa ma nyɛ ma tsu nyagbahi nɛ ngɛ je ɔ mi ɔ he ní.”

      • Mɛni nyagbahi nɛ adesa nɔ yemihi nyɛ we nɛ a tsu he ní se Mawu Matsɛ Yemi ɔ lɛɛ e ma tsu a he ní?

      NYA MWƆMI

      Mawu Matsɛ Yemi ɔ ma ha nɛ Mawu yi mi tomi ɔmɛ maa ba mi. E ma ha nɛ zugba a maa pee paradeiso, nɛ nihi nɛ a ma sɔmɔ Yehowa a maa hi nɔ kɛ maa ya neneene.

      Mi Nylɔmi

      • Mɛni blɔ nɔ Mawu Matsɛ Yemi ɔ maa gu kɛ ha nɛ Yehowa biɛ ɔ he nɛ tsɔ?

      • Mɛni he je nɛ wa ma nyɛ ma he ye kaa Mawu Matsɛ Yemi ɔ ma ha nɛ si womihi nɛ ngɛ Baiblo ɔ mi ɔ maa ba mi ɔ?

      • Ní kpakpahi nɛ Mawu Matsɛ Yemi ɔ ma tsu ɔ, a kpɛti te nɛɛ nɛ o ngɛ blɔ hyɛe wawɛɛ?

      Nɔ́ Nɛ O Ma Tsu He Ní

      NÍ KPAHI NƐ MAA YE BUA MO

      Moo hyɛ nɔ́ nɛ Harmagedon tsɔɔ.

      “Mɛni Ji Harmagedon Ta a?” (Munyu nɛ ɔ ngɛ Intanɛti ɔ nɔ)

      Moo hyɛ níhi nɛ maa ya nɔ ngɛ “amanehlu ngua“ a nɛ Yesu tu he munyu ɔ mi.—Mateo 24:21.

      “Mɛni Ji Amanehlu Ngua a?” (Munyu nɛ ɔ ngɛ Intanɛti ɔ nɔ)

      Moo hyɛ bɔ nɛ wekuhi ma nyɛ ma bla kɛ susu jɔɔmihi nɛ Mawu Matsɛ Yemi ɔ kɛ maa ba hwɔɔ se ɔ he ha.

      Moo Po He Foni Kaa O Ngɛ Paradeiso ɔ Mi (1:50)

      Moo kane munyu nɛ e yi ji, “I Bi Ye He Sanehi Fuu” ɔ, nɛ o hyɛ bɔ nɛ nyumu ko nɛ e tsɔɔ atuã kɛ siɔ ma kudɔmi blɔ nya tomihi ɔ na nɔ́ nɛ e ngɛ hlae ɔ.

      “Baiblo ɔ Tsakeɔ Nihi A Si Himi” (Hwɔɔmi Mɔ, January 1, 2012)