Yesu Kristo​—Mesia Nɛ A Wo E He Si ɔ

BƆ NƐ pee nɛ wa yo Mesia a, Yehowa Mawu gu e mumi ɔ nɔ nɛ e ha Baiblo gbali fuu ngma níhi fitsofitso kɛ kɔ Kpɔlɔ nɛ a wo e he si ɔ fɔmi, e sɔmɔmi ní tsumi, kɛ e gbenɔ he. Baiblo gbami nɛ ɔmɛ tsuo ba mi ngɛ Yesu Kristo blɔ fa mi. Nɛ nyakpɛ nɔ́ ji kaa, munyu nɛ ɔmɛ da nɛ a ngɛ fitsofitso. Kaa nɔ hyɛmi nɔ́ ɔ, ha nɛ wa susu gbami komɛ nɛ tu munyu kɛ kɔ Mesia a fɔmi kɛ e jokuɛwi a si he nɛ waa hyɛ.

Gbalɔ Yesaya gba kɛ fɔ si kaa Mesia a maa pee Matsɛ David nina. (Yesaya 9:7) Nɛ ngɛ anɔkuale mi ɔ, a fɔ Yesu ngɛ David weku ɔ mi.​​—Mateo 1:1, 6-17.

Mawu gbalɔ Mika hu gba kɛ fɔ si kaa, nyagbenyagbe ɔ, bi nɛ ɔ ma ba plɛ nɔ yelɔ nɛ a ma fɔ lɛ ngɛ “Betlehem Efrata.” (Mika 5:2) Benɛ a fɔ Yesu ɔ, mahi enyɔ lɛ ngɛ Israel nɛ a tsɛɛ ke Betlehem. Kake ngɛ yiti blɔ nɛ e kɛ Nazaret he kɛ we, nɛ kake hu kɛ Yerusalem nɛ ngɛ Yuda a he kɛ we. Be ko nɛ be ɔ, a tsɛɛ Betlehem nɛ e kɛ Yerusalem he kɛ we ɔ ke Efrata. A fɔ Yesu ngɛ jamɛ a ma a mi kaa bɔ nɛ gbami ɔ de ɔ pɛpɛɛpɛ!​​—Mateo 2:1.

Baiblo gbami kpa hu tsɔɔ kaa a ma tsɛ Mawu Bi ɔ ‘kɛ je Egipt.’ Benɛ Yesu ji jokuɛ ɔ, a kɛ lɛ ya hi Egipt. A kpale lɛ kɛ ba ngɛ Herode gbenɔ se, nɛ enɛ ɔ ha gbami ɔ ba mi.​​—Hosea 11:1; Mateo 2:15.

Ngɛ daka nɛ yi ji “Gbamihi Nɛ Kɔɔ Mesia a He” ɔ mi ɔ, ngmamihi nɛ ngɛ munyuyi nɛ ji “Gbami” sisi ɔ de níhi fitsofitso kɛ kɔ Mesia a he. Wa kpa mo pɛɛ nɛ o ngɔ ngmami nɛ ɔmɛ kɛ to ngmamihi nɛ a to a nya ngɛ munyuyi nɛ ji “Mi Bami” sisi ɔ he. Ke o pee jã a, e maa wo o hemi kɛ yemi mi he wami wawɛɛ nɛ o maa na kaa Mawu Munyu ɔ ji anɔkuale.

Be mi nɛ o ngɛ ngmami nɛ ɔmɛ a mi kpae ɔ, mo kai kaa a ngma gbami nɛ ɔmɛ kɛ fɔ si jeha lafahi abɔ loko a fɔ Yesu. Yesu de ke: “Níhi tsuo nɛ a ngma ngɛ ye he ngɛ Mose mlaa a, kɛ gbali ɔmɛ, kɛ La womi ɔ a mi ɔ, ja lɛ tsuo ba mi.” (Luka 24:44) O ma nyɛ maa na ngɛ mo nitsɛ o Baiblo ɔ mi kaa gbami ɔmɛ tsuo ba mi kɛ pi si!