Yesu de nyumu ɔ ke: “Bɔ nɛ o ha heto ɔ da; ke o pee jã a, o yi ma ná wami.” Se anɛ heto nɛ jinɛ nyumu ɔ ngɛ hlae ɔ ji nɛ ɔ lo? Pi lɔ ɔ he pɛ nɛ nyumu ɔ ya Yesu ngɔ ngɛ. E ngɛ hlae nɛ “e maa bu e he bemi.” Jehanɛ hu ɔ, e ngɛ hlae nɛ Yesu nɛ ma nɔ mi ha lɛ kaa e susumihi da nɛ nɔmlɔ kpakpa ji lɛ. Enɛ ɔ he ɔ, e bi Yesu ke: “Mɛnɔ ji ye nyɛmi?” (Luka 10:28, 29) Sane nyafii nɛ ɔ nɛ nyumu ɔ bi Yesu ɔ mi kuɔ pe bɔ nɛ nyumu ɔ susu ɔ. Ngɛ mɛni blɔ nɔ?

Yuda bi ɔmɛ nu munyungu nɛ ji “nyɛmi” ɔ sisi kaa nɔ ko nɛ yeɔ Yuda bi a mlaahi a nɔ, nɛ eko ɔ, a ngɔɔ munyu nɛ ngɛ 3 Mose 19:18 ɔ kɛ fĩɔ se. Ngɛ anɔkuale mi ɔ, Yuda bi ɔmɛ susuɔ kaa “mlaa ngmɛ́ blɔ” kaa Yuda no kɛ ma je no nɛ bɔ. (Bɔfo Ɔmɛ A Ní Tsumi 10:28) Enɛ ɔ he ɔ, nyumu nɛ ɔ, kɛ Yesu kaseli ɔmɛ ekomɛ po susuɔ kaa ke a pee Yuda no kpakpa a, lɔ ɔ tsɔɔ kaa a ji dali. Se a bui ma je no kaa a “nyɛmi.”

Ngɛ anɔkuale mi ɔ, Yesu le ní tsɔɔmi saminya! Kaa Yesu de mɛ tɛɛ kaa nihi nɛ a pi Yuda bi hu ji a nyɛmimɛ ɔ, anɛ nyumu ɔ kɛ Yuda bi kpahi nɛ a ngɛ lɛ tue bue ɔ ko kplɛɛ nɔ lo? Dɛbi. Se kɛ̃ ɔ, sane kpiti nɛ ɔ nɛ Yesu de kɛ ha nyumu ɔ sane bimi nɛ ji “Mɛnɔ ji ye nyɛmi?” ɔ heto ɔ sa saminya. Nɔ tsuaa nɔ nɛ suɔ e nyɛmi nɔmlɔ nɛ e peeɔ e nyɛmi kpakpa kaa bɔ nɛ Ngmami ɔ fa wɔ ke waa pee ɔ ji wa nyɛmi nitsɛnitsɛ.