Kpititsɛmɛ nyɔngma a nɛ a tsa mɛ ɔ, a kpɛti nihi nɛɛ ho a wehi a mi ya. Se nɔ kake nɛ e ji Samaria no ɔ lɛɛ e yɛ́. Nyumu nɛ ɔ pee e juɛmi kaa e ma ya hla Yesu se blɔ. Mɛni he je? E suɔ nɛ e ma ya na Yesu si ngɛ nɔ́ nɛ e pee ha lɛ ɔ he. Enɛ ɔ he ɔ, e “je Mawu yi kɛ ngmlaa” ejakaa e yɔse kaa Mawu he wami nya nɛ a tsa lɛ ngɛ. (Luka 17:15) Benɛ e ya na Yesu ɔ, e kpla si ngɛ Yesu nane nya nɛ e na lɛ si.

Kpititsɛmɛ nyɔngma amɛ nɛ Yesu tsa a ji odase nɛ tsɔɔ kaa Yehowa Mawu piɛɛ Yesu he. Jehanɛ hu ɔ, pi tsami pɛ nɛ nyumu ɔ nɛ e ya na Yesu si ɔ ná, eko ɔ, e ma ná neneene wami hulɔ. E ngɛ mi kaa Yesu tsa we nihi ngɛ nyakpɛ blɔ nɔ ngɛ wa be nɛ ɔ mi kaa bɔ nɛ e pee blema a mohu lɛɛ, se ke wa ná hemi kɛ yemi ngɛ Yesu mi ɔ, wa ma nyɛ ma ná neneene wami. Anɛ wa jeɔ hɛsa kpo kaa bɔ nɛ Samaria no ɔ pee ɔ lo?