‘Ye kɔni tsuaa kɔni nɛ wui yiblii ɔ, [ye Tsɛ ɔ] poɔ; se nɔ́ nɛ woɔ yiblii ɔ, e sãã he, konɛ e he nɛ tsɔ, nɛ e wo yiblii pe kekle ɔ. Kaa bɔ nɛ tso kɔni be nyɛe maa wo yiblii ngɛ lɛ nitsɛ e dɛ he, se ja e mɛtɛ wai tso ɔ he ɔ, jã kɛ̃ nyɛ hu ke nyɛ hí ye mi ɔ, nyɛ be yiblii woe. Imi ji wai tso ɔ, nɛ nyɛ ji kɔni ɔmɛ.’​​—Yohane 15:2-5.

Yesu de mɛ ke: “Nɔ tsuaa nɔ nɛ hii ye mi, nɛ imi hu i hii e mi ɔ, e maa wo yiblii babauu, ejakaa ke ye he be mi ɔ, nyɛ be nɔ́ ko nɔ́ ko nyɛe ma tsu.” Kaseli anɔkualetsɛmɛ nɛ a ji tso “kɔni ɔmɛ” ɔ maa wo yiblii fuu. Enɛ ɔ tsɔɔ kaa a maa kase suhi nɛ Yesu je kpo ɔ, nɛ a maa fiɛɛ Mawu Matsɛ Yemi ɔ kɛ kã, nɛ a maa ye bua nihi babauu konɛ a ba pee Yesu kaseli. Se ke nɔ ko mɛtɛ we Yesu he, nɛ e wui yiblii hu nɛɛ? Yesu de ke: “Nɔ tsuaa nɔ nɛ mɛtɛ we ye he ɔ, a sakee lɛ fɔɔ he kaa tso kɔni, nɛ e gbliɔ.” Kɛkɛ nɛ e de kɛ tsa nɔ ke: “Ke nyɛ mɛtɛ ye he, nɛ nyɛ he ye munyu ɔmɛ ye ɔ, nɔ́ tsuaa nɔ́ nɛ nyɛ suɔ ɔ, ke nyɛ bi ɔ, a ma ha nyɛ.”​​—Yohane 15:5-7.