• Yehowa Suɔ Nihi Nɛ A Kɛ “Hɛ Mi Miami Woɔ Yiblii”
    Hwɔɔmi Mɔ (Nɔ́ Nɛ A Maa Kase)—2018 | May

    • 7. (a) Ngɛ Yesu nɔ́ he tomi nɔ́ ɔ mi ɔ, mɛnɔ ji “ngmɔ hulɔ ɔ,” mɛnɔ ji “wai tso ɔ,” nɛ mɛnɔmɛ ji “tso kɔni ɔmɛ”? (b) Mɛni sane bimi nɛ e sa kaa wa hla heto?

      7 Kane Yohane 15:1-5, 8. Mo kadi kaa Yesu de e bɔfo ɔmɛ ke: “Nɔ́ nɛ e woɔ ye Tsɛ ɔ hɛ mi nyami ji kaa nyɛ maa ya nɔ maa wo yiblii babauu nɛ nyɛ ma je nyɛ he kpo kaa ye kaseli ji nyɛ.” Yesu tsɔɔ kaa Yehowa ji “ngmɔ hulɔ ɔ,” nɛ lɛ ji “wai tso nitsɛ ɔ,” nɛ e kaseli ɔmɛ ji wai “tso kɔni ɔmɛ.”b Mɛni yiblii nɛ e sa kaa Kristo se nyɛɛli ɔmɛ nɛ a wo? Ngɛ nɔ́ he tomi nɔ́ nɛ ɔ mi ɔ, Yesu tsɔɔ we yiblii pɔtɛɛ nɛ e sa kaa a wo, se e de nɔ́ ko nɛ ma nyɛ maa ye bua wɔ konɛ waa na heto ɔ.

      8. (a) Ngɛ nɔ́ he tomi nɔ́ nɛ ɔ mi ɔ, mɛni he je nɛ yiblii ɔ be nyɛe maa pee ni hehi nɛ a ba peeɔ kaseli ɔ? (b) Mɛni wa le kaa Yehowa be bie nɛ waa pee?

      8 Yesu de ngɛ e Tsɛ ɔ he ke: “Ye kɔni fɛɛ kɔni nɛ e wui yiblii ɔ, e poɔ ngɔ fɔɔ he.” Ngɛ blɔ ko nɔ ɔ, ja wa woɔ yiblii loko Yehowa maa na wɔ kaa e sɔmɔli. (Mat. 13:23; 21:43) Se e sa nɛ wa kadi kaa ngɛ nɔ́ he tomi nɔ́ nɛ ɔ mi ɔ, yiblii nɛ e sa kaa Kristofo no fɛɛ Kristofo no nɛ e wo ɔ be nyɛe maa pee nihi nɛ e ná he blɔ kɛ ye bua mɛ nɛ a ba pee kaseli ɔ. (Mat. 28:19) Ke pi jã a, lɛɛ Odasefohi nɛ a kɛ anɔkuale yemi tsu fiɛɛmi ní tsumi ɔ hluu, se a nyɛ we nɛ a ye bua nɔ ko nɛ e ba pee kaselɔ ɔ maa pee kaa tso kɔnihi nɛ Yesu tsɔɔ kaa a wui yiblii ɔ. Se sisi numi be mi kaa nɔ ko ma susu jã! Mɛni he je? Ejakaa wa be nyɛe maa nyɛ nihi a nɔ kaa a ba pee kaseli. Enɛ ɔ he ɔ, ke wa nyɛ we nɛ waa pee nɔ ko kaselɔ, nɛ Yehowa da lɔ ɔ nɔ kɛ kua wɔ ɔ, lɔ ɔ maa gbe Yehowa suɔmi ɔ he guɛ. Yehowa be bie nɛ waa pee nɔ́ ko nɛ e le kaa wa be nyɛe maa pee.​—5 Mose 30:11-14.

      9. (a) Mɛni ní tsumi nɛ ke wa ngɛ tsue ɔ, lɔ ɔ maa tsɔɔ kaa wa ngɛ yiblii woe? (b) Mɛni nɔ́ he tomi nɔ́ nɛ wa ma susu he, nɛ mɛni he je?

      9 Lɛɛ mɛni yiblii nɛ e sa kaa waa wo mɔ? E sa nɛ yiblii ɔ nɛ e pee ní tsumi ko nɛ wa ti nɔ fɛɛ nɔ ma nyɛ ma tsu. Mɛni ní tsumi nɛ ke wa ngɛ tsue ɔ, lɔ ɔ maa tsɔɔ kaa wa ngɛ ‘yiblii woe’? Lɔ ɔ ji Mawu Matsɛ Yemi ɔ he sane kpakpa a nɛ wa ngɛ fiɛɛe ɔ nɛ.c (Mat. 24:14) Yesu nɔ́ he tomi nɔ́ nɛ kɔɔ ní dulɔ ɔ he ɔ maa nɔ mi jã. Nyɛ ha nɛ wa susu nɔ́ he tomi nɔ́ nɛ ɔ hu he nɛ waa hyɛ.