Mawu Matsɛ Yemi ɔ ji nɔ́ titli nɛ Baiblo ɔ tu he munyu. Yehowa maa gu Matsɛ Yemi nɛ ɔ nɔ kɛ ha nɛ e yi mi tomi kɛ kɔ zugba a he ɔ nɛ ba mi. Mɛni ji Matsɛ Yemi nɛ ɔ? Kɛ wa plɛ kɛ le kaa e ngɛ nɔ yee amlɔ nɛ ɔ ha kɛɛ? Mɛni nɛ Matsɛ Yemi ɔ tsu momo? Nɛ mɛni nɛ e ma tsu hwɔɔ se? Ní kasemi nɛ ɔ kɛ ní kasemi enyɔ nɛ maa nyɛɛ se ɔ ma ha sane bimi nɛ ɔmɛ a heto.

1. Mɛni ji Mawu Matsɛ Yemi ɔ, nɛ mɛnɔ ji e nya Matsɛ?

Mawu Matsɛ Yemi ɔ ji nɔ yemi nɛ Yehowa Mawu nitsɛ to sisi. Yesu Kristo ji Matsɛ Yemi nɛ ɔ nya Matsɛ, nɛ e maa hi hiɔwe kɛ ye nɔ. (Mateo 4:17; Yohane 18:36) Baiblo ɔ de ngɛ Yesu he ke: ‘E maa ye Matsɛ kɛ maa ya neneene.’ (Luka 1:32, 33) Akɛnɛ Yesu ji Mawu Matsɛ Yemi ɔ nya Matsɛ he je ɔ, e maa ye nihi tsuo nɛ a ngɛ zugba a nɔ ɔ a nɔ.

2. Mɛnɔmɛ nɛ a maa piɛɛ Yesu he kɛ ye Matsɛ?

Pi Yesu pɛ nɛ e maa ye nɔ ngɛ Mawu Matsɛ Yemi ɔ mi. Nihi nɛ a je ‘wɛtso fɛɛ wɛtso kɛ lilɛ kɛ nimli kɛ je ma amɛ a mi ɔ . . . maa ye zugba a nɔ kaa matsɛmɛ.’ (Kpo Jemi 5:9, 10) Nihi enyɛmɛ nɛ a maa piɛɛ Kristo he kɛ ye nɔ? Kɛ je benɛ Yesu ba zugba a nɔ nɛ e kpale kɛ ho hiɔwe ya a, nimli ayɔhi abɔ ba pee e se nyɛɛli. Se anɛ, nimli nɛ ɔmɛ tsuo maa piɛɛ Yesu he kɛ ye nɔ lo? Dɛbi. A kpɛti nihi 144,000 pɛ nɛ a ma ya piɛɛ e he ngɛ hiɔwe kɛ ye nɔ. (Kane Kpo Jemi 14:1-4.) Kristofohi nɛ a piɛ ɔ lɛɛ a maa pee Matsɛ Yemi ɔ sisi bimɛ ngɛ zugba a nɔ.​—La 37:29.

3. Mɛni he je nɛ Mawu Matsɛ Yemi ɔ hi pe adesahi a nɔ yemi ɔ?

Ke adesa nɔ yeli bɔ mɔde kaa a maa pee ní kpakpahi po ɔ, a be he wami nɛ a kɛ maa pee nɔ́ fɛɛ nɔ́ nɛ a suɔ kaa a maa pee ɔ. Kɛ yaa kɛ yaa a, nɔ yeli kpahi ba yeɔ nɔ. Se nɔ yeli nɛ ɔmɛ hu ma nyɛ maa pee nihi nɛ a foɔ mɛ pɛ a nɔ́ mi nɛ́ a susuu we ni kpahi a he. Se Yesu nɛ e ji Mawu Matsɛ Yemi ɔ nya Matsɛ ɔ lɛɛ, nɔ ko nɔ ko be lɛ jee ngɛ sɛ ɔ nɔ kɔkɔɔkɔ. Ngmami ɔ de ke, Mawu “to matsɛ yemi ko sisi, nɛ e se be poe gblegbleegble.” (Daniel 2:44) Yesu maa ye je ɔ tsuo nɔ, nɛ e be ni komɛ bue kaa a he hia pe ni komɛ. Ejakaa e ngɛ suɔmi, e mi mi jɔ, nɛ e yeɔ dami sane, nɛ e maa tsɔɔ nihi ní konɛ mɛ hu a je su kpakpa nɛ ɔmɛ nɔuu kpo.​—Kane Yesaya 11:9.

4. Mawu Matsɛ Yemi ɔ maa ye zugba a tsuo nɔ

Yesu Kristo ngɛ he wami nɛ́ e kɛ maa ye nɔ pe adesa nɔ yeli tsuo. Nyɛɛ kane Mateo 28:18 ɔ, nɛ nyɛ susu sane bimi nɛ ɔ he:

• Ngɛ mɛni blɔ nɔ nɛ he blɔ nɛ Yesu ngɛ ɔ nɔ kuɔ kulaa pe he blɔ nɛ adesa nɔ yeli ngɛ ɔ?

Adesahi pɔɔ a nɔ yemi ɔmɛ tsakemi, nɛ a yeɔ ma pɔtɛɛ komɛ pɛ a nɔ hulɔ. Se Mawu Matsɛ Yemi ɔ hu nɛɛ? Nyɛɛ kane Daniel 7:14 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

• Mɛni he je nɛ e ji bua jɔmi sane kaa Mawu Matsɛ Yemi ɔ “se be poe gblegbleegble ɔ”?

• Mɛni he je nɛ e ji bua jɔmi sane kaa Mawu Matsɛ Yemi ɔ maa ye zugba a tsuo nɔ ɔ?

5. Adesahi a nɔ yemi be nyɛe ma tsu wa nyagba amɛ a he ní

Mɛni he je nɛ e sa nɛ Mawu Matsɛ Yemi ɔ nɛ ba je adesahi a nɔ yemi ɔ? Mo je VIDEO ɔ, nɛ nyɛ susu sane bimi nɛ ɔ he.

VIDEO: Mɛni Ji Mawu Matsɛ Yemi ɔ?—Fã Ko (1:41)

• Mɛni lɛ je adesahi a nɔ yemi mi kɛ ba?

Nyɛɛ kane Fiɛlɔ 8:9 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

• Anɛ o susu kaa e sa nɛ Mawu Matsɛ Yemi ɔ nɛ ba je adesa nɔ yemi kɛ je lo? Mɛni he je?

6. Nihi nɛ a maa ye nɔ ngɛ Mawu Matsɛ Yemi ɔ mi ɔ nu wɔ sisi

Akɛnɛ Yesu nɛ e ji wa Matsɛ ɔ ba hi si hyɛ kaa adesa he je ɔ, e ma nyɛ maa “nu wa gbɔjɔmi ɔmɛ a he ha wɔ.” (Hebri Bi 4:15) Nyumuhi kɛ yihi anɔkualetsɛmɛ 144,000 nɛ́ a maa piɛɛ Yesu he kɛ ye nɔ ɔ ji nihi nɛ Yehowa hla mɛ “kɛ je wɛtso fɛɛ wɛtso kɛ lilɛ kɛ nimli kɛ je ma” amɛ a mi.​—Kpo Jemi 5:9.

• Anɛ lemi nɛ o le kaa Yesu kɛ nihi nɛ a maa piɛɛ e he kɛ ye nɔ ɔ le nyagbahi nɛ waa kɛ ngɛ kpee kɛ bɔ nɛ wa nuɔ he ha a woɔ o bua lo? Mɛni he je?

7. Mawu Matsɛ Yemi ɔ ngɛ mlaahi nɛ a nɔ kuɔ pe mlaahi nɛ adesa nɔ yemihi woɔ ɔ

Nɔ yemihi woɔ mlaahi konɛ a kɛ po a sisi bimɛ a he piɛ, nɛ́ a ná he se hulɔ. Mawu Matsɛ Yemi ɔ hu ngɛ mlaahi nɛ e sa kaa e sisi bimɛ nɛ a ye nɔ. Nyɛɛ kane 1 Korinto Bi 6:9-11 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

• Kɛ o susu kaa je ɔ mi maa hi ha kɛɛ ke nɔ fɛɛ nɔ kɛ je mi bami he mlaahia nɛ Mawu wo ɔmɛ tsu ní?

• Anɛ o susu kaa Yehowa ngɛ he blɔ nɛ́ e hyɛɛ blɔ kaa e Matsɛ Yemi ɔ sisi bimɛ nɛ́ a ye mlaa nɛ ɔmɛ a nɔ lo? Mɛni he je?

• Mɛni tsɔɔ kaa nihi nɛ a bui mlaa nɛ ɔmɛ tue ɔ ma nyɛ ma tsake?​—Hyɛ kuku 11.

NYA MWƆMI

Mawu Matsɛ Yemi ɔ ji nɔ yemi nitsɛnitsɛ nɛ́ e ngɛ hiɔwe, nɛ e maa ye zugba a tsuo nɔ.

Mi Nylɔmi

• Mɛnɔmɛ nɛ a maa ye nɔ ngɛ Mawu Matsɛ Yemi ɔ mi?

• Mɛni he je nɛ Mawu Matsɛ Yemi ɔ nɔ kuɔ kulaa pe adesa nɔ yemihi tsuo ɔ?

• Mɛni ji ní komɛ nɛ́ Yehowa ngɛ blɔ hyɛe kaa e Matsɛ Yemi ɔ sisi bimɛ nɛ a pee?

NÍ KPAHI NƐ MAA YE BUA MO

Moo hyɛ nɔ́ nɛ Yesu de kɛ kɔ he nɛ Mawu Matsɛ Yemi ɔ ngɛ ɔ he.

“Anɛ Mawu Matsɛ Yemi ɔ Ngɛ O Tsui Mi Lo?” (Munyu nɛ ɔ ngɛ Intanɛti ɔ nɔ)

Mɛni he je nɛ Yehowa Odasefohi suɔ kaa a maa ye Mawu Matsɛ Yemi ɔ anɔkuale mohu pe adesahi a nɔ yemi ɔ?

A Fĩ Mawu Matsɛ Yemi ɔ Se (1:43)

Moo hyɛ nɔ́ nɛ Baiblo ɔ de kɛ kɔ nimli 144,000 nɛ Yehowa hla mɛ kaa a piɛɛ Yesu he kɛ ye Matsɛ ɔ a he.

“Mɛnɔmɛ Nɛ A Maa Ya Hiɔwe?” (Munyu nɛ ɔ ngɛ Intanɛti ɔ nɔ)

Mɛni lɛ ha nɛ yo ko nɛ a wo lɛ tsu ɔ ná nɔ mi mami kaa Mawu pɛ lɛ ma nyɛ ma ha nɛ je nɛ a yeɔ dami sane ngɛ mi ɔ maa ba?

“I Ba Na Nɔ́ He Je Nɛ Nihi Yi Dami Sane ɔ” (O Hɛ Nɛ Tsɛ̃!, November 2011)

Yesu tsɔɔ kaa e sa nɛ e se nyɛɛli nɛ a pee nihi nɛ a “piɛɛ we je ɔ he.” (Yohane 15:​19) Enɛ ɔ tsɔɔ kaa waa kɛ wa he wui ma kudɔmi sanehi kɛ tahi a mi, nɛ wa fĩ we ekoeko se hulɔ. Anɔkuale sane ji, pi be fɛɛ be nɛ e ngɛ gbɔjɔɔ kaa wa maa yu wa he ngɛ ma sanehi a he, nɛ eko ɔ, nihi maa ye wa he fɛu. Mɛni wa ma nyɛ maa pee konɛ wa ko ngɔ wa he kɛ wo ma sanehi a mi, nɛ́ waa ya nɔ nɛ waa ye Yehowa Mawu anɔkuale?

1. Kɛ anɔkuale Kristofohi naa adesa nɔ yeli ha kɛɛ?

Kristofohi buɔ nɔ yeli ɔmɛ. Wa peeɔ kaa bɔ nɛ Yesu de ke waa pee ɔ, nɛ wa ‘ngɔɔ Kaisare níhi kɛ haa Kaisare.’ Enɛ ɔ tsɔɔ kaa wa yeɔ ma mlaahi nɛ ekomɛ kɔɔ tó womi he ɔ nɔ. (Maako 12:​17) Baiblo ɔ tsɔɔ kaa adesa nɔ yeli yeɔ nɔ ejakaa Yehowa lɛ ngmɛ mɛ blɔ. (Roma Bi 13:1) Enɛ ɔ he ɔ, wa le kaa he blɔ nɛ adesa nɔ yeli ngɛ ɔ sui he ko kulaa ke a kɛ mɛ to Mawu he. Waa kɛ wa hɛ fɔɔ Mawu kɛ e Matsɛ Yemi ɔ nɔ kaa e ma ba tsu adesahi a nyagbahi a he ní.

2. Mɛni wa maa pee kɛ tsɔɔ kaa waa kɛ wa he wui ma sanehi a mi?

Kaa bɔ nɛ Yesu pee ɔ, waa kɛ wa he wui ma kudɔmi sanehi a mi. Benɛ ni komɛ na nyakpɛ nɔ́ ko nɛ Yesu pee ɔ, a bɔ mɔde kaa a maa pee lɛ a matsɛ ngɛ zugba a nɔ, se e kua. (Yohane 6:​15) Mɛni he je? Ejakaa pee se ɔ, e de ke, “ye Matsɛ Yemi ɔ, pi je nɛ ɔ mi nɔ́.” (Yohane 18:​36) Akɛnɛ wa ji Yesu kaseli he je ɔ, wa yuɔ wa he ngɛ ma sanehi a he ngɛ blɔ slɔɔtohi a nɔ. Kaa nɔ hyɛmi nɔ́ ɔ, wa yɛ ta. (Kane Mika 4:3.) Wa buɔ ma okadihi, nɛ́ eko ji aflangaa, se wa nga we aflangaa, ejakaa ke wa pee jã a, lɔ ɔ tsɔɔ kaa wa ngɛ lɛ jae. (1 Yohane 5:​21) Jehanɛ hu ɔ, wa fĩ we ma kudɔmi kuu ko aloo e nya dalɔ ko se, nɛ wa ti si kɛ wui a ti nɔ ko hulɔ. Ní nɛ ɔmɛ kɛ ekpahi nɛ wa pee we ɔ tsɔɔ kaa wa fĩ Mawu Matsɛ Yemi ɔ pɛ se.

MOO KASE BABAUU

3. Anɔkuale Kristofohi piɛɛ we je ɔ he

Yesu kɛ e se nyɛɛli ɔmɛ pee nɔ hyɛmi nɔ́ ha wɔ. Nyɛɛ kane Roma Bi 13:​1, 5-7 kɛ 1 Petro 2:​13, 14. Lɔ ɔ se ɔ, mo je VIDEO ɔ nɛ nyɛ susu sane bimihi nɛ nyɛɛ se nɛ ɔmɛ a he.

VIDEO: Anɔkuale Kristofohi Kɛ A He Wui Ma Kudɔmi Sanehi A Mi​—Fã 1 (4:28)

• Mɛni he je nɛ e sa nɛ waa bu ma nɔ yeli ɔ?

• Mɛni ní komɛ wa maa pee kɛ tsɔɔ kaa wa baa wa he si kɛ haa mɛ?

Ke a ngɛ ta hwue ɔ, ma komɛ yeɔ bua mahi nɛ a ngɛ ta a hwue ɔ, se pohu a deɔ ke a fĩ we nɔ ko se. Mɛni tutuutu lɛ tsɔɔ kaa nɔ ko kɛ e he wui ma sanehi a mi? Nyɛɛ kane Yohane 17:​16. Lɔ ɔ se ɔ, mo je VIDEO ɔ nɛ nyɛ susu sane bimi nɛ nyɛɛ se ɔ he.

VIDEO: Anɔkuale Kristofohi Kɛ A He Wui Ma Kudɔmi Sanehi A Mi​—Fã 2 (3:11)

• Mɛni tsɔɔ kaa nɔ ko kɛ e he wui ma kudɔmi sanehi a mi?

Ke ma nɔ yeli suɔ nɛ o pee nɔ́ ko nɛ teɔ si kɛ woɔ Mawu mlaa a hu nɛɛ? Nyɛɛ kane Ní Tsumi 5:​28, 29. Lɔ ɔ se ɔ, mo je VIDEO ɔ nɛ nyɛ susu sane bimihi nɛ nyɛɛ se nɛ ɔmɛ a he.

VIDEO: Anɔkuale Kristofohi Kɛ A He Wui Ma Kudɔmi Sanehi A Mi​—Fã 3 (1:18)

• Ke adesahi wo mlaa ko nɛ teɔ si kɛ siɔ Mawu mlaa a, mɛnɔ mlaa nɛ e sa kaa waa ye nɔ?

• Anɛ o ma nyɛ maa tsɔɔ si fɔfɔɛ komɛ a mi nɛ Kristofohi be nyɛe maa bu ma nɔ yeli ɔmɛ tue lo?

4. Mo ha nɛ o susumi kɛ o ní peepee nɛ tsɔɔ kaa o kɛ o he wui ma sanehi a mi

Nyɛɛ kane 1 Yohane 5:​21. Lɔ ɔ se ɔ, mo je VIDEO ɔ nɛ nyɛ susu sane bimihi nɛ nyɛɛ se nɛ ɔmɛ a he.

VIDEO: Nɔ́ He Je Nɛ Anɔkuale Kristofohi Hia Kã​—Konɛ A Yu A He Ngɛ Ma Kudɔmi Sanehi A He (2:49)

• Ngɛ video ɔ mi ɔ, mɛni he je nɛ Ayenge hla kaa e be ma kudɔmi kuu ko he piɛɛe aloo e be aflangaa a ngae ɔ?

• Anɛ o susu kaa nile ngɛ yi mi kpɔ nɛ e mwɔ ɔ mi lo?

Mɛni si fɔfɔɛ kpahi lɛ ma nyɛ ma ha nɛ e he nɛ wa ha wɔ kaa wa maa yu wa he ngɛ ma sanehi a he? Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.

VIDEO: Níhi Nɛ Wa Kase Ngɛ Hwɔɔmi Mɔ ɔ Mi​—Yu O He Ngɛ Ma Kudɔmi Sanehi A He Ngɛ Je Nɛ Kake Peemi Be Mi Nɛ ɔ Mi (5:16)

• Mɛni wa maa pee kɛ tsɔɔ kaa waa kɛ wa he wui ma sanehi a mi ke nihi nɛ a je ma slɔɔtohi a nɔ ɔ kɛ a he ngɛ koli sie ngɛ fiɛmi ko mi?

• Mɛni wa maa pee kɛ tsɔɔ kaa wa fĩ we ma kudɔmi sanehi a se, ke nihi nɛ a nyɛɛ ma kudɔmi kuu ɔmɛ a hɛ mi ɔ mwɔ yi mi kpɔ ko nɛ sa wa he po?

• Ke wa pɔɔ amaniɛ bɔmihi nɛ kɔɔ ma kudɔmi sanehi a he ɔ tue bumi aloo waa kɛ nihi nɛ a pɔɔ he munyu tumi bɔɔ ɔ, kɛ lɔ ɔ ma ná wa nɔ he wami ha kɛɛ?

NYA MWƆMI

Kristofohi bɔɔ mɔde wawɛɛ kaa a ma ha nɛ a susumi, a munyu tutui kɛ a ní peepee nɛ tsɔɔ kaa a kɛ a he wui ma kudɔmi sanehi a mi.

Mi Nylɔmi

• Mɛni su nɛ e sa nɛ wa je kpo kɛ tsɔɔ nɔ yeli ɔmɛ?

• Mɛni he je nɛ waa kɛ wa he wui ma kudɔmi sanehi a mi ɔ?

• Mɛni si fɔfɔɛhi lɛ ma nyɛ ma ha nɛ e he nɛ wa ha wɔ kaa wa maa yu wa he ngɛ ma sanehi a he?

NÍ KPAHI NƐ MAA YE BUA MO

Mɛni níhi lɛ eko ɔ, e ma bi nɛ wa kɛ sã afɔle konɛ wa nyɛ nɛ waa yu wa he ngɛ ma kudɔmi sanehi a he?

Yehowa Si We Wɔ Kɔkɔɔkɔ (3:14)

Mɛni wekuhi ma nyɛ maa pee kɛ dla a he loko a kɛ kahi nɛ kɔɔ ma sanehi a he ɔ nɛ kpe?

Yu O He Ngɛ Ma Kusumihi Kɛ Ma Sanehi A He (4:25)

Mɛni he je nɛ ke nɔ ko peeɔ níhi kɛ fãa e ma he ɔ, pi lɔ ɔ nɛ tsɔɔ kaa e ná hɛ mi nyami nitsɛnitsɛ ɔ?

“Mawu Lɛɛ E Nyɛɔ Peeɔ Nɔ́ Fɛɛ Nɔ́” (5:19)

Ke o ngɛ yi mi kpɔ mwɔe ngɛ ní tsumi nɛ o ma tsu ɔ he ɔ, moo hyɛ nɔ́ nɛ o maa pee konɛ o ko piɛɛ je ɔ he.

“Nɔ Fɛɛ Nɔ Maa Tloo Lɛ Nitsɛ E Tlomi” (Hwɔɔmi Mɔ, March 15, 2006)