⁹ Ligbi ɔ nɛ Yesu ma gbo ɔ, e tsɔɔ ngɛ blɔ nɛ ngɛ bua jɔmi nɔ kaa nihi nɛ e suɔ mɛ ɔ, a si dami ngɛ Mawu jami mi he hia lɛ wawɛɛ. Moo po nɔ́ nɛ ya nɔ ɔ he foni ngɛ o juɛmi mi nɛ o hyɛ. Yesu ngɛ sɛumi tso ɔ nɔ, nɛ e ngɛ piie wawɛɛ nitsɛ. E ngɛ heii kaa loko e ma nyɛ maa wo mumu ɔ, ja e kpa e mi. Atsinyɛ jemi ko be he kaa enɛ ɔ ha nɛ e pii wawɛɛ, ejakaa e jiɔmi ɔ ha nɛ plɛɛko nɛ a ka wo e nanewɛɛ ɔmɛ a mi ɔ gbla e lo ɔ, nɛ sɛumi tso ɔ hu ngmlã e se mi pa amɛ a nɔ. Munyu tumi maa ye ha lɛ wawɛɛ nitsɛ, ejakaa ja e wo mumu loko e ma nyɛ maa tu munyu. Se kɛ̃ ɔ, loko Yesu ma gbo ɔ, e tu munyu nɛ tsɔɔ kaa e ngɛ suɔmi nɛ mi kuɔ kɛ ha e nyɛ Maria. Benɛ Yesu na Maria kɛ bɔfo Yohane nɛ a daa si ngɛ e kasa nya a, e wo e gbi nɔ bɔnɛ nihi nɛ daa si ngɛ lejɛ ɔ maa nu, nɛ e de e nyɛ ɔ ke: “Maa, o bi ji nɛ ɔ nɛ!” Kɛkɛ nɛ e de Yohane ke: “O nyɛ ji nɛ ɔ nɛ!” (Yohane 19:26, 27) Yesu le kaa pi nɛ bɔfo anɔkualetsɛ ɔ maa lɛ Maria nɛ e ma ha lɛ e helo nya níhi nɛ hia lɛ pɛ kɛkɛ, se e maa ye bua lɛ ngɛ Mawu jami mi hulɔ.b