Hwɔɔmi Mɔ INTANƐTI NƆ NITO HE

“Bua Jɔmi Kɛ Mumi Klɔuklɔu Ya Nɔ Nɛ E Hyi Kaseli Ɔmɛ Tɔ”

“Ye Mawu Matsɛ Yemi ɔ He Odase Kɛ Pi Si”
- 5. Moo tsɔɔ bɔ nɛ fiɛɛmi ngɛ́ Kipro zugba kpɔ nɛ wo bɔle lɛ ɔ nɔ ɔ ngɛ ha.
  
  ⁵ Benɛ Banaba kɛ Saulo nyɛɛ kɛ ya su Seleukia ngɛ́ lɛ si dami he nɛ ngɛ Antiokia kasa nya a, a sɛ lɛ mi kɛ ya Kipro zugba kpɔ nɛ wo bɔle lɛ ɔ nɔ, maa pee kilomita 200 blɔ nyɛɛmi.d Akɛnɛ Banaba je Kipro he je ɔ, atsinyɛ jemi ko be he kaa lɔ ɔ ha nɛ e suɔ wawɛɛ kaa e maa ngɔ sane kpakpa a kɛ ba ha e ma a mi bi ɔmɛ. Benɛ a ba su Salamis, nɛ́ ji ma nɛ ngɛ zugba kpɔ ɔ puje he je ɔ nɔ ɔ, oya nɔuu nɛ “a bɔni Mawu munyu ɔ jajemi ngɛ Yuda bi ɔmɛ a kpe he ɔmɛ.”e (Níts. 13:5) Banaba kɛ Saulo nyɛɛ kɛ kpa Kipro ma a mi tsuo, nɛ e ma nyɛ maa ba lɛ kaa a fiɛɛ ngɛ ma nguahi nɛ a na ngɛ a blɔ nyɛɛmi ɔ mi ɔ a mi. Enɛ ɔ tsɔɔ kaa a nyɛɛ maa pee kilomita 160!
  
  NGƐ YUDA BI ƆMƐ A KPE HE ƆMƐ
  
  Sisije ɔ, Yuda bi ɔmɛ kɛ munyungu nɛ ji “kpe he ɔ” tsu ní kɛ tsɔɔ nihi nɛ a bua a he nya. Pee se ɔ, a kɛ tsu ní kɛ ha he nɛ a kpeɔ ngɛ kɛ jaa Yehowa.
  
  Nihi he ye kaa benɛ Yuda bi ɔmɛ ya hi nyɔguɛ tso mi jeha 70 ngɛ Babilon ɔ, jamɛ a be ɔ mi nɛ a kɛ kpe hehi bɔni ní tsumi, aloo eko ɔ, a kɛ kpe hehi bɔni ní tsumi benɛ a je nyɔguɛ tso mi ɔ se nɔuu pɛ. A tsɔɔ nihi ní, nɛ a jaa Mawu, nɛ a kaneɔ Ngmamihi nɛ a tsɔɔ nihi Ngmami ɔ mi ngɛ kpe he ɔmɛ. Ngɛ kaseli ɔmɛ a be ɔ mi ɔ, ma fɛɛ ma ngɛ́ Palestina a ngɛ kpe he. Ma ngua amɛ ngɛ kpe hehi nɛ hiɛ pe kake, nɛ Yerusalɛm lɛɛ a ngɛ kpe hehi fuu.
  
  Se benɛ a ngmɛɛ Yuda bi ɔmɛ a he kɛ je nyɔguɛ tso mi ngɛ Babilon se ɔ, pi mɛ tsuo nɛ a kpale kɛ ba Palestina. A kpɛti nihi fuu ho ma kpahi a nɔ ya konɛ a ya tsu ní. Ngɛ jeha 400 L.F.K. jeha amɛ a sisije ɔ, Yuda bi ɔmɛ ngɛ mahi 127 nɛ a ngɛ Persia Nɔ Yemi ɔ sisi ɔ mi. (Ester 1:1; 3:8) Benɛ be ngɛ mi pue ɔ, Yuda bi ɔmɛ hi ma slɔɔtohi nɛ a ngɛ kɛ bɔle Mediterenia Wo ɔ he ɔ mi. Yuda bi nɛ ɔmɛ nɛ a gbɛ fĩa a bɔni a he nya buami ngɛ kpe hehi ngɛ hehi nɛ a ngɛ ɔmɛ.
  
  Daa Hejɔɔmi ligbi ɔ, a kaneɔ Mlaa a nɛ a tsɔɔ sisi. A daa kpoku ko nɛ ya hiɔwe ɔ nɔ nɛ a kaneɔ Mlaa a kɛ jeɔ lejɛ ɔ. A toɔ sɛhi ngɛ kpoku ɔ hɛ mi je kɛ e kasa nɔ hiɛ kɛ hiɛ. Ke Yuda bi ɔmɛ bua a he nya ngɛ Hejɔɔmi ligbi ɔ nɔ ɔ, Yuda no fɛɛ Yuda no nɛ e yeɔ Mawu gbeye nɛ e suɔ kaa e maa kane Mlaa a aloo e fiɛɛ aloo e tsɔɔ Ngmami ɔ sisi ɔ ngɛ he blɔ nɛ e peeɔ jã.

“Bua Jɔmi Kɛ Mumi Klɔuklɔu Ya Nɔ Nɛ E Hyi Kaseli Ɔmɛ Tɔ”

“Ye Mawu Matsɛ Yemi ɔ He Odase Kɛ Pi Si”
- d Ngɛ kaseli ɔmɛ a be ɔ mi ɔ, ke lɛhi ngɛ nyɛɛe ngɛ wo ɔ nɔ, nɛ kɔɔhiɔ ɔ ngɛ fiae kɛ yaa he nɛ lɛ ɔmɛ yaa a, lɛ ɔmɛ nyɛɔ nɛ a nyɛɛɔ maa pee kilomita 160 kɛ ya suu he nɛ a yaa a. Se ke kɔɔhiɔ nɛ ngɛ fiae ɔ yi bua mɛ ɔ, blɔ hiami kaa kikɛ ɔ ma nyɛ ma he be fuu.