• “Nyɛɛ Bu Ye Nya Nɛ I Ma Jemi ɔ Tue”
    “Ye Mawu Matsɛ Yemi ɔ He Odase Kɛ Pi Si”

    • 11. Mɛni blɔ tsɔɔmi nɛ nikɔtɔma amɛ kɛ ha Paulo, se mɛni nɛ jinɛ e ko pee we? (Hyɛ sisi ningma a hulɔ.)

      11 E ngɛ mi kaa munyuhi nɛ Yuda bi ɔmɛ nu ngɛ Paulo he ɔ be mi mohu lɛɛ, se loloolo ɔ munyu nɛ ɔmɛ gba a nya wawɛɛ. Enɛ ɔ he je ɔ, nikɔtɔma amɛ kɛ blɔ tsɔɔmi nɛ ɔ ha Paulo: ‘Wa ngɛ nyumuhi eywiɛ nɛ a kã kita. Ngɔɔ nyumu nɛ ɔmɛ kɛ piɛɛ o he nɛ o kɛ mɛ nɛ ya nɛ nyɛ ya tsukɔ nyɛ he ngɛ kusumi nya, nɛ o wo hiɔ nɛ a ma bɔ ɔ ha mɛ, konɛ a ha nɛ a sɛ a yi ɔmɛ. Kɛkɛ ɔ, nɔ fɛɛ nɔ maa le kaa akeake munyu nɛ a ngɛ nue ngɛ o he ɔ be mi, mohu ɔ, o ngɛ nyɛɛe pɛpɛɛpɛ, nɛ o ngɛ Mlaa a hu nɔ yee.’c​—Níts. 21:23, 24.

      12. Mɛni Paulo pee kɛ tsɔɔ kaa e suɔ nɛ e kɛ nikɔtɔma amɛ nɛ a ngɛ Yerusalɛm ɔ nɛ pee kake?

      12 Jinɛ Paulo ko nyɛ ko de ke, pi akeake munyu nɛ nihi ngɛ tue ɔ ji nyagba a tutuutu, se mohu ɔ, nɔ́ nɛ Yuda bi ɔmɛ ngɛ tsɔɔe kaa doo ɔ e sa nɛ a ye Mose Mlaa a nɔ ɔ ji nyagba a nɛ. Se kɛ̃ ɔ, e suɔ kaa e maa pee nɔ́ nɛ nikɔtɔma amɛ de lɛ ɔ, ejakaa e le kaa lɔ ɔ ti si kɛ wui Mawu sisi tomi mlaahi. Be ko nɛ be ɔ, e ngma ke: “I ba pee kaa nɔ ko nɛ e ngɛ mlaa sisi kɛ ha ni nɛmɛ nɛ a ngɛ mlaa sisi ɔ konɛ ye nine nɛ su a nɔ, pohu imi nitsɛ lɛɛ i be mlaa sisi.” (1 Kor. 9:20) Ngɛ si fɔfɔɛ nɛ ɔ mi ɔ, Paulo pee nɔ́ nɛ nikɔtɔmahi nɛ a ngɛ Yerusalɛm ɔ de lɛ ke e pee ɔ, nɛ e “ba pee kaa nɔ ko nɛ e ngɛ mlaa sisi.” Jã nɛ e pee ɔ ji nɔ hyɛmi nɔ́ kpakpa kɛ ha wɔ mwɔnɛ ɔ kaa e sa nɛ waa bu blɔ tsɔɔmi nɛ asafo mi nikɔtɔma amɛ kɛ ma ha wɔ ɔ tue nɛ wa ko hla kaa doo ɔ, e sa nɛ a pee níhi kaa bɔ nɛ wɔɔ wa suɔ.​—Heb. 13:17.

      Foni Ɔmɛ: 1. Paulo nɛ́ e ngɛ blɔ tsɔɔmi nɛ nikɔtɔma amɛ nɛ a ngɛ Yerusalɛm ɔ kɛ ha lɛ ɔ tue bue. 2. Ngɛ mwɔnɛ ɔ be mi asafo mi nikɔtɔmahi a kpe ko sisi ɔ, nyɛminyumu ɔ kake ngɛ nɔ́ ko hyɛe totooto benɛ ni kpa amɛ wo a nine nɔ ɔ.

      Paulo bu nɔ́ nɛ nikɔtɔma amɛ de lɛ ɔ tue ejakaa e ti si wui Baiblo sisi tomi mlaa. Anɛ mo hu o peeɔ jã lo?

  • “Nyɛɛ Bu Ye Nya Nɛ I Ma Jemi ɔ Tue”
    “Ye Mawu Matsɛ Yemi ɔ He Odase Kɛ Pi Si”

    • c Baiblo he ní leli komɛ tsɔɔ kaa nyumu nɛ ɔmɛ kã Nazir no peemi kita. (4 Mose 6:1-21) Ngɛ anɔkuale mi ɔ, Mose Mlaa a nya lɛ nihi kãa kita nɛ ɔ ngɛ, se Mlaa nɛ ɔ be be. Paulo ma nyɛ ma susu kaa, tɔmi ko be he kaa nyumu nɛ ɔmɛ maa ye kita nɛ a kã Yehowa a nɔ. Enɛ ɔ he ɔ, tɔmi be he kaa e kɛ mɛ maa ya nɛ́ e wo hiɔ nɛ a ma bɔ ɔ kɛ ha mɛ. Wa li kita tutuutu nɛ nyumu nɛ ɔmɛ kã a mohu lɛɛ, se kaa bɔ nɛ wa le ɔ, behi fuu ɔ, nihi nɛ a kãa Nazir no peemi kita a ngɔɔ lohwehi kɛ ba sãa afɔle konɛ a kɛ tsu a he ngɛ a yayami he, nɛ wa le kaa Paulo be afɔle nɛ́ a kɛ lohwehi maa sã a se fĩe, ejakaa benɛ Yesu ngɔ e nɔmlɔ tso nɛ ye mluku ɔ kɛ sã afɔle ɔ, lɔ ɔ po lohwehi nɛ a kɛ sãa afɔle konɛ a kɛ kpata yayami ɔ se. Wa li níhi tsuo nɛ Paulo pee ɔ mohu lɛɛ, se wa le kaa e be nɔ́ ko pee nɛ ma ha nɛ e he nile nɛ bu lɛ fɔ.