“Mi Mi Himi Nɛ E Se Be” (Ní Tsumi 28:1-10)

18-20. Mɛni nɛ nihi nɛ a ngɛ Malta a pee kɛ je “mi mi himi nɛ e se be” kpo, nɛ mɛni nyakpɛ nɔ́ nɛ Mawu pee kɛ gu Paulo nɔ?

¹⁸ E ya ba mi kaa nihi nɛ a yi ná wami ɔ ya je Malta zugba kpɔ nɛ wo bɔle lɛ ɔ nɔ ngɛ Sisili woyi je. (Hyɛ daka nɛ ji “Malta​—Jije E Ngɛ?”) Nihi nɛ a tuɔ ma se gbi ngɛ zugba kpɔ nɛ ɔ nɔ ɔ je “mi mi himi nɛ e se be” kpo kɛ tsɔɔ mɛ. (Níts. 28:2) A slɛ la kɛ ha nibwɔ ɔmɛ nɛ́ a ba a zugba kpɔ ɔ nɔ ɔ, ejakaa hiɔmi ɔ nɛ́ ngɛ nɛe ɔ ha nɛ mɛ tsuo a pɔ. E ngɛ mi kaa fĩɛ ngɛ yee nɛ hiɔmi ngɛ nɛe mohu lɛɛ, se la nɛ a slɛ ha mɛ ɔ ha nɛ a he mi pee kulɔɔ. Enɛ ɔ hu ha nɛ nyakpɛ nɔ́ ko ya nɔ.