3. Moo hyɛ o nɔmlɔ tso ɔ kɛ o wami nɔ saminya

Kristofohi nɛ a jɔɔ a wami nɔ kɛ ha Yehowa a ngɔɔ a wami tsuo kɛ sɔmɔɔ lɛ. Akɛnɛ e sa nɛ Kristofohi nɛ a ‘ngɔ a nɔmlɔ tso ɔmɛ kɛ ha Mawu kaa afɔle nɛ ngɛ klɔuklɔu’ he je ɔ, e sa nɛ a hyɛ nɔ saminya. Nyɛɛ kane Roma Bi 12:​1, 2, nɛ nyɛ susu sane bimihi nɛ nyɛɛ se nɛ ɔmɛ a he:

• Mɛni lɛ e sa nɛ e wo mo he wami konɛ o hyɛ o nɔmlɔ tso mi he wami nami nɔ saminya?

• Mɛni blɔ komɛ a nɔ o ma nyɛ maa gu kɛ pee jã?

O ba kase níhi fuu kɛ kɔ Yehowa he kɛ gu Baiblo ɔ nɛ o ngɛ kasee ɔ nɔ. Eko ɔ, o pee tsakemi komɛ konɛ o kɛ níhi nɛ o kase ɔ nɛ tsu ní. Se eko ɔ, nɔ́ ko ngɛ mo blɔ tsie ngɛ o he nɔ nɛ o maa jɔɔ ha Yehowa nɛ a baptisi mo ɔ he. Ní kasemi nɛ ɔ tsɔɔ ní komɛ nɛ tsiɔ nihi blɔ ngɛ baptisimi he, kɛ blɔ nɔ nɛ o maa gu kɛ ye blɔ tsimi ní nɛ ɔmɛ a nɔ.

1. Jije e sa nɛ o kase Baiblo ɔ kɛ su loko a baptisi mo?

Loko a maa baptisi mo ɔ, e sa nɛ o “ná anɔkuale ɔ he nile nitsɛnitsɛ ɔ.” (1 Timoteo 2:4) Lɔ ɔ tsɔɔ we kaa ja o le Baiblo ɔ mi sane bimihi tsuo a heto loko a ma nyɛ maa baptisi mo. Kristofohi nɛ a baptisi mɛ be kɛkɛɛ ji nɛ ɔ po yaa nɔ nɛ a kaseɔ ní. (Kolose Bi 1:​9, 10) Se e he hia nɛ o nu Baiblo ɔ sisije tsɔɔmi ɔmɛ a sisi. Asafo mi nikɔtɔma amɛ maa ye bua mo nɛ o le ke ji nile nɛ o ná a ya hɛ mi bɔ nɛ sa.

2. Mɛni ji ní komɛ nɛ e sa nɛ o pee loko a baptisi mo?

E sa nɛ o ‘tsake o tsui nɛ o kpale o se’ loko a ma nyɛ maa baptisi mo. (Kane Ní Tsumi 3:​19.) Mɛni enɛ ɔ tsɔɔ? Enɛ ɔ tsɔɔ kaa o ma pia o he ngɛ yayamihi nɛ o pee ɔmɛ a he, nɛ o ma bi Yehowa nɛ e kɛ ke mo. Jehanɛ hu ɔ, o maa fia o pɛɛ si kaa o ma kua je mi bami yayami, nɛ o maa pee níhi nɛ sa Mawu hɛ mi ngɛ o si himi mi. Ní kpahi nɛ o maa pee kɛ piɛɛ he ji, o maa ya asafo mi kpehi, nɛ o maa piɛɛ asafo ɔ he kɛ ya fiɛɛmi.

3. Mɛni he je nɛ e sɛ nɛ o ye gbeye kaa o ma ha nɛ a baptisi mo ɔ?

Ni komɛ yeɔ gbeye kaa a be nyɛe maa ye si nɛ a wo Yehowa a nɔ. Ngɛ anɔkuale mi ɔ, be komɛ ɔ, o ma tɔ̃, kaa bɔ nɛ e ba ngɛ nyumuhi kɛ yihi anɔkualetsɛmɛ nɛ a wo a biɛ ta ngɛ Baiblo ɔ mi ɔ po a blɔ fa mi ɔ. Yehowa le kaa e sɔmɔli be nyɛe maa pee nɔ́ nɛ da kɛ pi si. (Kane La 103:​13, 14.) Yehowa bua jɔɔ ke o je o tsui mi tsuo kɛ sɔmɔ lɛ! E maa ye bua mo. Ngɛ anɔkuale mi ɔ, Yehowa wo wɔ si kaa nɔ́ ko ‘be nyɛe ma je wɔ kɛ je e suɔmi ɔ’ he kɔkɔɔkɔ.​—Kane Roma Bi 8:​38, 39.

MOO KASE BABAUU

4. Moo le Yehowa saminya

Kɛ e sa nɛ o le Yehowa ha kɛɛ loko a ma nyɛ maa baptisi mo? E sa nɛ o le lɛ saminya konɛ o suɔ lɛ, nɛ́ o pee níhi nɛ tsɔɔ kaa o suɔ nɛ o sa e hɛ mi. Mo je VIDEO ɔ nɛ o hyɛ bɔ nɛ nihi nɛ a ngɛ Baiblo ɔ kasee ngɛ je kɛ wɛ ɔ nyɛ nɛ a su baptisimi he ha. Lɔ ɔ se ɔ, nyɛ susu sane bimi nɛ nyɛɛ se ɔ he.

VIDEO: Nɔ́ Nɛ O Maa Pee Konɛ O He Nɛ Su Kɛ Ha Baptisimi (3:56)

• Ngɛ video ɔ mi ɔ, mɛni ye bua ni komɛ nɛ a he su kɛ ha baptisimi?

Nyɛɛ kane Roma Bi 12:​2, nɛ nyɛ susu sane bimihi nɛ nyɛɛ se nɛ ɔmɛ a he:

• Anɛ o yi mi peeɔ mo enyɔɔnyɔ ngɛ níhi nɛ Baiblo ɔ tsɔɔ ɔ he lo? Anɛ e peeɔ mo kaa Yehowa Odasefo ɔmɛ tsɔɔ we anɔkuale ɔ lo?

• Ke jã a, lɛɛ mɛni o ma nyɛ maa pee ngɛ he?

5. Moo ye níhi nɛ ma nyɛ maa tsi mo blɔ ngɛ baptisimi he ɔ nɔ

Wɔ tsuo waa kɛ nyagbahi kpeɔ ke wa ma wa juɛmi nya si kaa wa maa jɔɔ wa he nɔ ha Yehowa nɛ a baptisi wɔ. Ke o ngɛ hlae nɛ o na enɛ ɔ he nɔ hyɛmi nɔ́ ɔ, mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.

VIDEO: Suɔmi Nɛ Wa Ngɛ Kɛ Ha Yehowa a Yeɔ Bua Wɔ Nɛ Wa Nyɛɔ Yeɔ Blɔ Tsimi Níhi A Nɔ (5:22)

• Ngɛ video ɔ mi ɔ, mɛni blɔ tsimi níhi nɛ e ba biɔ nɛ Narangerel nɛ ye a nɔ konɛ e nyɛ nɛ e sɔmɔ Yehowa?

• Mɛni blɔ nɔ nɛ suɔmi nɛ e ngɛ kɛ ha Yehowa a ye bua lɛ nɛ e ye blɔ tsimi ní nɛ ɔmɛ a nɔ?

Nyɛɛ kane Abɛ 29:​25 kɛ 2 Timoteo 1:​7, nɛ nyɛ susu sane bimi nɛ ɔ he:

• Mɛni woɔ wɔ he wami nɛ wa nyɛɔ yeɔ blɔ tsimi níhi a nɔ?

6. Mo ná nɔ mi mami kaa Yehowa maa ye bua mo

Yehowa maa ye bua mo nɛ o pee e suɔmi nya ní. Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.

VIDEO: Yehowa Maa Ye Bua Mo (2:50)

• Ngɛ video ɔ mi ɔ, mɛni he je nɛ e he wa ha Baiblo kaselɔ ɔ kaa e ma ha nɛ a baptisi lɛ ɔ?

• Mɛni e kase nɛ́ lɔ ɔ ha nɛ hɛ kɛ nɔ fɔmi nɛ e ngɛ ngɛ Yehowa mi ɔ mi wa?

Nyɛɛ kane Yesaya 41:​10, 13, nɛ nyɛ susu sane bimi nɛ ɔ he:

• Mɛni he je nɛ o ma nyɛ ma ná nɔ mi mami kaa o ma nyɛ maa ye si nɛ o wo Yehowa benɛ o jɔɔ o he nɔ kɛ ha lɛ ɔ nɔ?

7. O bua nɛ jɔ suɔmi nɛ Yehowa ngɛ kɛ ha mo ɔ he wawɛɛ

Ke o ya nɔ nɛ o susu bɔ nɛ Yehowa suɔ mo ha a he ɔ, hɛsa nɛ o ngɛ kɛ ha lɛ ɔ mi maa wa, nɛ o maa suɔ kaa o ma sɔmɔ lɛ kɛ ya neneene. Nyɛɛ kane La 40:​5, nɛ nyɛ susu sane bimi nɛ ɔ he:

• Mɛni jɔɔmihi nɛ́ je Yehowa ngɔ lɛ o bua jɔ he wawɛɛ?

Gbalɔ Yeremia suɔ Yehowa, nɛ e suɔ e munyu ɔ hulɔ. E bua jɔ he blɔ nɛ e ná kaa Yehowa biɛ ɔ ngɛ e nɔ ɔ he wawɛɛ nitsɛ. E de ke: ‘Yehowa Tabohiatsɛ Mawu, o nɔ́ ji mi [o biɛ ngɛ ye nɔ, NW], nɛ enɛ ɔ he je ɔ, o munyu ɔ ha nɛ i ná bua jɔmi kɛ be nɔ.’ (Yeremia 15:​16) Nyɛ susu sane bimi nɛ ɔmɛ a he:

• Mɛni he je nɛ Yehowa Odasefo no nɛ o maa pee ɔ ji he blɔ nɛ se be ɔ?

• Anɛ o suɔ kaa a baptisi mo kaa Yehowa Odasefo ɔmɛ a kpɛti nɔ kake lo?

• Anɛ nɔ́ ko ngɛ mo blɔ tsie ngɛ jã nɛ o maa pee ɔ he lo?

• Mɛni o susu kaa e he maa hia nɛ o pee konɛ o su baptisimi he?

NYA MWƆMI

Yehowa maa ye bua mo nɛ o ma nyɛ ye níhi nɛ maa tsi mo blɔ ngɛ baptisimi he ɔ a nɔ.

Mi Nylɔmi

• Ní enyɛmɛ e sa nɛ o le ngɛ Baiblo ɔ mi loko a ma nyɛ maa baptisi mo?

• Mɛni tsakemihi nɛ e he maa hia nɛ́ o pee loko a ma nyɛ maa baptisi mo?

• Mɛni he je nɛ e sɛ nɛ o ye gbeye kaa o ma ha nɛ a baptisi mo ɔ?

NÍ KPAHI NƐ MAA YE BUA MO

Moo hyɛ nɔ́ nɛ e sa kaa o da nɔ kɛ ma o juɛmi nya si kaa o ma ha nɛ a baptisi mo.

“Anɛ O Pee Klaalo Kaa O Ma Ha Nɛ A Baptisi Mo Lo?” (Hwɔɔmi Mɔ, March 2020)

Moo kase blɔ nɔ nɛ o maa gu kɛ tsu nyagba pɔtɛɛ komɛ nɛ ma nyɛ maa tsi mo blɔ ngɛ baptisimi he ɔ a he ní.

“Mɛni Tsiɔ Ye Baptisimi Nya?” (Hwɔɔmi Mɔ, March 2019)

Moo hyɛ bɔ nɛ nyumu ko nyɛ ye blɔ tsimi ní ngua komɛ a nɔ ha, nɛ e ha nɛ a baptisi lɛ.

‘Mɛni He Je Nɛ O Ngɛ Tsle Toe Kaa O Ma Ha Nɛ A Baptisi Mo?’ (1:10)

Sisije ɔ, nyumu ko nɛ a tsɛɛ lɛ Ataa gbla e nane si kaa e ma ha nɛ a baptisi lɛ. Moo hyɛ nɔ́ nɛ ye bua lɛ nɛ́ e ha nɛ a baptisi lɛ.

Lɔ ɔ Imi Lɛ I Ná Jɔɔmi Nɛ ɔ Lo? (7:21)