• Moo Kase Ní Kɛ Je Yesu Nyɛminyumu Wayoo ɔ Ngɔ
    Hwɔɔmi Mɔ (Nɔ́ Nɛ A Maa Kase)—2022 | January

    • YAA NƆ NƐ O BA O HE SI KAA YAKOBO

      Yakobo ngɛ ní tsue kaa kapitɛ be mi nɛ Yesu nɛ a tle lɛ si ɔ kɛ lɛ ngɛ munyu tue ɔ.

      Benɛ Yesu je e he kpo kɛ tsɔɔ Yakobo ɔ, Yakobo je he si bami mi kɛ kplɛɛ nɔ kaa Yesu ji Mesia a nɛ, nɛ kɛ je lɔ ɔ se ɔ, Yakobo ba pee Kristo kaselɔ nɛ yeɔ anɔkuale (Hyɛ kuku 5-7)

      5. Benɛ a tle Yesu si nɛ e je e he kpo kɛ tsɔɔ Yakobo ɔ, kɛ Yakobo pee e ní ha kɛɛ?

      5 Mɛni be Yakobo ba pee Yesu se nyɛɛlɔ nɛ yeɔ anɔkuale? Benɛ a tle Yesu si kɛ je gbeje ɔ, “e je e he kpo ngɔ tsɔɔ Yakobo, nɛ lɔ ɔ se ɔ, kɛ tsɔɔ bɔfo ɔmɛ tsuo.” (1 Kor. 15:7) Yakobo ba pee Yesu kaseli ɔmɛ a kpɛti nɔ kake benɛ e kɛ Yesu kpe ɔ se. E piɛɛ bɔfo ɔmɛ a he ngɛ Yerusalem ngɛ hiɔwe tsu ko mi nɛ a ngɛ mlɛe nɛ a ná mumi klɔuklɔu ɔ. (Níts. 1:13, 14) Pee se ɔ, Yakobo ná he blɔ kɛ sɔmɔ kaa Blɔ Tsɔɔmi Ajla Toli ɔmɛ a kpɛti nɔ kake ngɛ kaseli ɔmɛ a be ɔ mi. (Níts. 15:6, 13-22; Gal. 2:9) Mumi klɔuklɔu ɔ wo lɛ he wami nɛ e ngma sɛ womi kɛ ya ha Kristofohi nɛ a pɔ mɛ nu ɔ loko e su jeha 62. Jamɛ a sɛ womi ɔ yeɔ bua wɔ mwɔnɛ ɔ ke wa ngɛ hɛ nɔ kami kaa wa maa ya hiɔwe jio wa maa hi zugba a nɔ jio. (Yak. 1:1) Yuda bi ɔmɛ a yi nɔ sane womi ngmalɔ ko nɛ a tsɛɛ lɛ ke Josephus ɔ ngma ke: Osɔfo Nɔkɔtɔma Anania nɛ ji Anas binyumu ɔ lɛ fã kaa a gbe Yakobo. Yakobo ye Yehowa anɔkuale kɛ ya si benɛ e gbe e zugba a nɔ ní tsumi ɔ nya.