Ngɛ je ɔ mi tsuo ɔ, nihi hɛɛ susumi ekpaekpa ngɛ dã he. Ni komɛ suɔ kaa a kɛ a huɛmɛ ma bla kɛ nu dã be komɛ. Ni komɛ hu mwɔ a yi mi kpɔ kaa a be dã nue kulaa. Se ni komɛ hu lɛɛ, a nuɔ hluu kɛ ya siɔ a deɔ. Mɛni ji nɔ́ nɛ Baiblo ɔ de ngɛ dã he?

1. Anɛ e ji tɔmi kaa nɔ ko maa nu dã nɛ nya wa lo?

Baiblo ɔ tsi we dã numi nya. Se mohu ɔ, benɛ e ngɛ ní kpakpahi nɛ Mawu kɛ ha adesahi ɔ a he munyu tue ɔ, e de kɛ piɛɛ he kaa, Mawu “haa lɛ dã nɛ ma ha lɛ bua jɔmi.” (La 104:​14, 15) Baiblo ɔ ha nɛ wa le kaa nyumuhi kɛ yihi anɔkualetsɛmɛ komɛ nɛ a hi si blema a nu wai.​—1 Timoteo 5:23.

2. Mɛni ga womi nɛ Baiblo ɔ kɛ ha nihi nɛ a suɔ kaa a maa nu dã a?

Yehowa tu munyu kɛ si dã fuu numi, kɛ dã demi. (Galatia Bi 5:​21) Baiblo ɔ de ke: ‘Ko ya piɛɛ nihi nɛ nuu wai fuu tsɔ ɔ a he.’ (Abɛ 23:​20) Ke wa hla kaa waa kɛ nihi ma bla kɛ nu dã aloo wɔ pɛ wa maa nu dã a, e sɛ nɛ waa nu kɛ be nɔ, ejakaa e be hae nɛ wa susu níhi a he saminya, loo waa hyɛ wa munyu tutui, wa ní peepee, kɛ wa nɔmlɔ tso ɔ nɔ saminya. Ke wa be nyɛe maa ye wa he nɔ ɔ, lɛɛ e maa hi kaa wa ma kpa dã numi kulaa.

3. Mɛni wa ma nyɛ maa pee kɛ tsɔɔ kaa wa buɔ yi mi kpɔhi nɛ nihi mwɔɔ ngɛ dã he ɔ?

E sa nɛ wa ti nɔ fɛɛ nɔ nɛ mwɔ e yi mi kpɔ ke ji e maa nu dã nɛ nya wa aloo e be nue. Ke nɔ ko hla kaa e maa nu dã bɔɔ ɔ, e sɛ nɛ waa kojo lɛ, nɛ ke nɔ ko hu hla kaa e be dã nue ɔ, e sɛ nɛ waa nyɛ e nɔ kaa e nu. (Roma Bi 14:​10) Ke dã nɛ wa maa nu ɔ ma gba ni kpahi a nya a, wa maa wa juɛmi nya si kaa wa be nue. (Kane Roma Bi 14:​21.) Wa hlaa ‘nɔ́ nɛ maa hi kɛ ha ni kpahi, se pi kɛ ha [wɔ nitsɛmɛ wa] he.’​—Kane 1 Korinto Bi 10:​23, 24.

MOO KASE BABAUU

4. Moo mwɔ o yi mi kpɔ ke ji o maa nu dã aloo o be nue

Kɛ Yesu na dã numi ha kɛɛ? Kekleekle nyakpɛ nɔ́ nɛ e pee ɔ maa ye bua mo nɛ o na heto ɔ. Nyɛɛ kane Yohane 2:​1-​11, nɛ nyɛ susu sane bimihi nɛ nyɛɛ se nɛ ɔmɛ a he:

• Ngɛ nyakpɛ nɔ́ nɛ ɔ mi ɔ, mɛni wa ma nyɛ maa kase ngɛ bɔ nɛ Yesu naa dã ha, kɛ bɔ nɛ e naa nihi nɛ a nuɔ dã ha a mi?

• Akɛnɛ Yesu tsi we dã numi nya he je ɔ, kɛ e sa nɛ Kristofo no nɛ na nɔ ko nɛ suɔ kaa e maa nu dã a ha kɛɛ?

Se kɛ̃ ɔ, he blɔ nɛ Kristofo no ko ngɛ kaa e ma nyɛ maa nu dã a tsɔɔ we kaa be fɛɛ be ɔ, nile ngɛ mi kaa e maa pee jã. Nyɛɛ kane Abɛ 22:​3, nɛ nyɛ susu he ke ji e sa nɛ nɔ ko nɛ nu dã ngɛ si fɔfɔɛhi nɛ nyɛɛ se nɛ ɔmɛ a mi aloo e ko nu:

• O yaa hɛɛ lɔle aloo o kɛ klama ko yaa tsu ní.

• Ke yo hɛɛ hɔ.

• Dɔkita de mo ke o ko nu dã.

• O nyɛ we o he nɔ yemi ngɛ dã numi he.

• Mlaa ngmɛ́ mo blɔ kaa o nu dã.

• O kɛ nɔ ko ngɛ nɛ e ma e juɛmi nya si kaa e be dã nue ejakaa e he wa ha lɛ kaa e ma kpa dã numi be ko nɛ be ɔ.

Ke o ngɛ yo kpeemi loo he nya buami kpa ko he blɔ nya toe ɔ, anɛ e sa nɛ o gba dãhi nɛ a nya wa ngɛ sisi lo? Bɔ nɛ pee nɛ o na níhi nɛ maa ye bua mo nɛ o mwɔ yi mi kpɔ ngɛ sane nɛ ɔ he ɔ, mo je VIDEO ɔ.

VIDEO: Anɛ E Sa Kaa Ma Gba Dã Ngɛ He Nya Buami Ko Sisi Lo? (2:41)

Nyɛɛ kane Roma Bi 13:13 kɛ 1 Korinto Bi 10:31, 32. Ke nyɛ kane ngmami ɔ eko fɛɛ eko ta a, nyɛ susu sane bimi nɛ ɔ he:

• Kɛ sisi tomi mlaa nɛ ɔ maa ye bua mo ha kɛɛ konɛ o mwɔ yi mi kpɔ nɛ maa sa Yehowa hɛ mi?

5. Moo ma o juɛmi nya si ngɛ dã abɔ nɛ o maa nu ɔ he

Ke o hla kaa o maa nu dã nɛ nya wa a, mo kai kaa, e ngɛ mi kaa Yehowa de we ke wa ko nu dã mohu lɛɛ, se e de ke e ji tɔmi kaa nɔ ko maa nu dã fuu. Mɛni he je? Nyɛɛ kane Hosea 4:​11, 18, nɛ nyɛ susu sane bimi nɛ ɔ he:

• Mɛni ma nyɛ maa ba ke nɔ ko nu dã fuu?

Mɛni ma nyɛ maa ye bua wɔ konɛ wa ko nu dã fuu? Ke wa maa nu dã a, e sa nɛ waa pee jã ngɛ blɔ nɛ tsɔɔ bumi nɔ, nɛ waa le wa gbɔjɔmihi. Nyɛɛ kane Abɛ 11:​2, nɛ nyɛ susu sane bimi nɛ ɔ he:

• Ke o hla kaa o maa nu dã a, mɛni he je nɛ nile ngɛ mi kaa o maa ma o juɛmi nya si ngɛ dã abɔ nɛ o maa nu ɔ he ɔ?

6. Mɛni maa ye bua nɔ ko konɛ e ko nu dã kɛ be nɔ?

VIDEO: ‘Si Himi Ba Gbe Ye Nya’ (6:32)

• Ngɛ video ɔ mi ɔ, kɛ Dmitry peeɔ e ní ha kɛɛ ke e de dã?

• Anɛ e nyɛ kpa dã numi ngɛ be kpiti mi lo?

• Mɛni ji nɔ́ nɛ ye bua lɛ nɛ nyagbenyagbe ɔ, e kpa dã numi?

Nyɛɛ kane 1 Korinto Bi 6:​10, 11, nɛ nyɛ susu sane bimihi nɛ nyɛɛ se nɛ ɔmɛ a he:

• Mɛni Baiblo ɔ de ngɛ dã demi he?

• Mɛni tsɔɔ kaa nɔ ko nɛ e nuɔ dã kɛ beɔ nɔ ɔ ma nyɛ ma tsake?

Nyɛɛ kane Mateo 5:​30, nɛ nyɛ susu sane bimi nɛ ɔ he:

• Nɔ ko nine nɛ e maa po ɔ tsɔɔ kaa nɔ ɔ kɛ níhi maa sã afɔle bɔ nɛ pee nɛ e sa Yehowa hɛ mi. Mɛni o ma nyɛ maa pee ke e he wa ha mo kaa o maa yu o he ngɛ dã nɛ a nuɔ kɛ beɔ nɔ ɔ he?a

Nyɛɛ kane 1 Korinto Bi 15:​33, nɛ nyɛ susu sane bimi nɛ ɔ he:

• Ke o kɛ nihi nɛ a suɔ dã fuu numi bɔɔ ɔ, kɛ lɔ ɔ ma ná o nɔ he wami ha kɛɛ?

NYA MWƆMI

Yehowa ha wɔ dã konɛ wa ná bua jɔmi. Se e de ke, e ji tɔmi kaa nɔ ko maa nu dã fuu loo e maa de dã.

Mi Nylɔmi

• Mɛni Baiblo ɔ de ngɛ dã he?

• Mɛni oslaahi lɛ ngɛ dã nɛ́ a nuɔ kɛ beɔ nɔ ɔ he?

• Mɛni wa maa pee kɛ tsɔɔ kaa wa buɔ yi mi kpɔhi nɛ ni kpahi mwɔɔ ngɛ dã numi he ɔ?

NÍ KPAHI NƐ MAA YE BUA MO

Mɛni blɔ nɔ nɛ nihewi kɛ yihewi maa gu kɛ mwɔ yi mi kpɔ nɛ da ngɛ dã he?

Susu Nɔ́ Nɛ Maa Je Dã Numi Mi Kɛ Ba a He (2:31)

Moo hyɛ nɔ́ nɛ o ma nyɛ maa pee ke o ngɛ dã numi he nyagba.

“Hyɛ Bɔ Nɛ O Kɛ Dã Ma Tsu Ní Ha a Saminya” (Hwɔɔmi Mɔ, January 1, 2010)

Anɛ e sa kaa Kristofohi nɛ a wo dã nɔ kɛ tsɔɔ a sibi loko a nu lo?

“Sane Bimihi Nɛ Je Ní Kaneli A Ngɔ” (Hwɔɔmi Mɔ, February 15, 2007)

Ngɛ munyu nɛ ji “I Nuɔ Dã Wawɛɛ Nitsɛ” ɔ mi ɔ, moo hyɛ nɔ́ nɛ ye bua nyumu ko nɛ e kpa dã numi.

“Baiblo ɔ Tsake ɔ Nihi A Si Himi” (Hwɔɔmi Mɔ, May 1, 2012)

Wɔ tsuo wa suɔ kaa wa maa hla tadehi nɛ wa maa wo kɛ bɔ nɛ wa ma dla wa he ha. Ke waa kɛ Baiblo sisi tomi mlaahi tsu ní ɔ, wa ma nyɛ maa hla tadehi nɛ wa suɔ kaa wa maa wo, se kɛ̃ ɔ, e maa sa Yehowa hɛ mi hulɔ. Nyɛ ha nɛ wa susu sisi tomi mlaa nɛ ɔmɛ ekomɛ a he.

1. Mɛni Baiblo sisi tomi mlaahi lɛ maa ye bua wɔ konɛ waa mwɔ wa yi mi kpɔ ngɛ tadehi nɛ wa maa wo, kɛ bɔ nɛ wa ma dla wa he ha a he?

E sa nɛ waa kɛ ‘humi peemi kɛ juɛmi nɛ mi tsɔ nɛ dla wa he bɔ nɛ sa,’ nɛ wa ha nɛ tadehi nɛ wa woɔ kɛ bɔ nɛ wa dlaa wa he ha a nɛ hi hɛngmɛ nɔ be fɛɛ be kɛ ‘tsɔɔ kaa wa ji nihi nɛ a jaa Mawu.’ (1 Timoteo 2:​9, 10) Ha nɛ wa susu sisi tomi mlaa eywiɛ nɛ ɔmɛ a he: (1) E sa nɛ tadehi nɛ wa maa wo ɔ nɛ hi “bɔ nɛ sa.” Kaa bɔ nɛ o na ngɛ Yehowa we bi a kpehi a sisi ɔ, wa ti nɔ fɛɛ nɔ dlaa e he ngɛ blɔ ekpaekpa nɔ. Se tadehi nɛ wa woɔ, kɛ bɔ nɛ wa sɛɛ wa yi ha loo wa peeɔ wa yi ha a tsɔɔ kaa wa ngɛ bumi kɛ ha wa Mawu ɔ. (2) “Humi peemi” nɛ waa kɛ ma dla wa he ɔ tsɔɔ kaa wa be tadehi nɛ ma tle bɔmi nami he akɔnɔ si ngɛ nihi a mi loo e maa gbla nihi a juɛmi kɛ ba wa nɔ tsɔ ɔ woe. (3) ke wa nyɛɛ we tadehi kɛ he dlami nɛ ba nɔ ɔ eko fɛɛ eko se ɔ, lɔ ɔ tsɔɔ kaa waa kɛ “juɛmi nɛ mi tsɔ” dlaa wa he. (4) E sa nɛ be fɛɛ be ɔ, wa he dlami nɛ “tsɔɔ kaa wa jaa Mawu,” konɛ nihi nɛ a na kaa anɔkuale Mawu ɔ wa ngɛ jae ɔ nɛ.​—1 Korinto Bi 10:31.

2. Kɛ tadehi nɛ wa woɔ kɛ bɔ nɛ wa dlaa wa he ha a ma nyɛ ma ha nɛ wa nyɛmimɛ nɛ a nu he ha kɛɛ?

E ngɛ mi kaa wa ngɛ he blɔ nɛ wa hlaa tade nɛ wa suɔ kaa wa maa wo mohu lɛɛ, se e sa nɛ wa susu bɔ nɛ ni kpahi maa nu he ha a he. Wa bɔɔ mɔde kaa wa be nɔ́ ko pee nɛ ma gba nɔ ko nya, mohu ɔ, wa peeɔ nɔ́ nɛ maa “sa [wa] nyɛmi hɛ mi konɛ e hi ha lɛ, nɛ e fia lɛ kɛ ma si.”​—Kane Roma Bi 15:​1, 2.

3. Mɛni blɔ nɔ nɛ bɔ nɛ wa dlaa wa he ha a ma nyɛ ma ha nɛ ni kpahi a bua nɛ jɔ he kaa a maa kase Yehowa he ní?

E ngɛ mi kaa wa bɔɔ mɔde kaa wa ma dla wa he saminya be fɛɛ be mohu lɛɛ, se ke wa yaa asafo mi kpe loo wa yaa fiɛɛmi ɔ, e sa nɛ waa hyɛ bɔ nɛ wa dlaa wa he ha a saminya. Wa sume nɛ wa he dlami nɛ je nihi a juɛmi kɛ je sɛ gbi nɛ wa fiɛɛɔ ɔ nɔ. Mohu ɔ, wa suɔ nɛ wa he dlami nɛ ha nɛ ni kpahi a bua nɛ jɔ he kaa a maa kase Mawu he ní, nɛ́ ‘wa Yi Wami Helɔ ɔ tsɔɔmi ɔ he nɛ pee fɛu.’​—Tito 2:​10.

MOO KASE BABAUU

4. Ke wa he dlami hi saminya a, e tsɔɔ kaa wa buɔ Yehowa

Mɛni yi mi tomi titli he je nɛ e sa nɛ wa ha nɛ wa he dlami nɛ hi hɛngmɛ nɔ ɔ? Nyɛɛ kane La 47:​2, nɛ́ nyɛ susu sane bimi nɛ ɔmɛ a he:

• Ke wa kai kaa bɔ nɛ wa dlaa wa he ha a saa bɔ nɛ nihi naa Yehowa ha a he ɔ, mɛni yi mi kpɔ nɛ lɔ ɔ maa ye bua wɔ nɛ waa mwɔ ngɛ wa he dlami he?

• Anɛ o susu kaa nile ngɛ mi kaa wa maa hyɛ bɔ nɛ wa dlaa wa he ha a saminya ke wa maa ya asafo mi kpe loo fiɛɛmi lo? Mɛni he je nɛ o de jã a?

5. Mɛni maa ye bua wɔ konɛ wa nyɛ nɛ waa mwɔ yi mi kpɔ nɛ da ngɛ tade nɛ wa maa wo kɛ bɔ nɛ wa ma dla wa he ha a he?

Mo je VIDEO ɔ.

VIDEO: “Nyɛɛ Pee Níhi Tsuo Kɛ Wo Mawu Hɛ Mi Nyami” (10:18)

Ke tade nɛ wa ngɛ ɔ he jua wa jio, e he jua wɛ jio, e sa nɛ e he nɛ tsɔ, nɛ́ e sa he nɛ wa maa wo kɛ ya a. Nyɛɛ kane 1 Korinto Bi 10:​24 kɛ 1 Timoteo 2:​9, 10. Lɔ ɔ se ɔ, nyɛ susu nɔ́ he je nɛ e sɛ nɛ waa wo tadehi nɛ nyɛɛ se nɛ ɔmɛ a he . . .

• tadehi nɛ a he tsɔ we loo a be hɛngmɛ nɔ.

• tadehi nɛ a miaa nɔ wawɛɛ loo a jeɔ nɔmlɔ tso ɔ he komɛ kpo loo a tleɔ bɔmi nami he akɔnɔ si ngɛ nihi a mi.

E ngɛ mi kaa Kristofohi be Mose Mlaa a sisi mohu lɛɛ, se e yeɔ bua wɔ nɛ wa leɔ Yehowa susumi. Nyɛɛ kane 5 Mose 22:​5, nɛ́ nyɛ susu sane bimi nɛ ɔ he:

• Mɛni he je nɛ e sa nɛ wa kua tadehi kɛ he dlamihi nɛ haa nɛ nyumuhi peeɔ kaa yihi aloo yihi peeɔ kaa nyumuhi ɔ?

Nyɛɛ kane 1 Korinto Bi 10:​32, 33, kɛ 1 Yohane 2:​15, 16, nɛ́ nyɛ susu sane bimi nɛ ɔmɛ a he:

• Mɛni he je nɛ e sa nɛ waa hyɛ ke ji wa he dlami gbaa nihi nɛ a ngɛ wa kpɔ ɔ mi loo asafo ɔ mi ɔ a nya a?

• Mɛni tadehi kɛ he dlamihi lɛ pɔ he ngɛ he nɛ o ngɛ ɔ?

• Ke o hyɛ ɔ, anɛ e sa kaa Kristofo no nɛ wo jamɛ a tade ɔmɛ aloo e dla e he jã lo? Mɛni he je nɛ o de jã a?

NYA MWƆMI

Ke wa mwɔ yi mi kpɔ nɛ da ngɛ tade nɛ wa maa wo kɛ bɔ nɛ wa ma dla wa he ha a he ɔ, wa tsɔɔ kaa wa ngɛ bumi kɛ ha Yehowa kɛ ni kpahi.

Mi Nylɔmi

• Mɛni he je nɛ tade nɛ wa maa wo, kɛ bɔ nɛ wa ma dla wa he ha a he hia Yehowa a?

• Mɛni sisi tomi mlaahi lɛ sa nɛ e kudɔ yi mi kpɔhi nɛ wa maa mwɔ ngɛ tade nɛ wa maa wo kɛ bɔ nɛ wa ma dla wa he ha a he?

• Kɛ tadehi nɛ wa woɔ kɛ bɔ nɛ wa dlaa wa he ha a maa sa bɔ nɛ nihi naa anɔkuale jami ha a he ha kɛɛ?

NÍ KPAHI NƐ MAA YE BUA MO

Moo hyɛ nɔ́ nɛ nihi ma susu ngɛ o he ke a na tadehi nɛ o woɔ ɔ.

“Kɛ Ye He Dlami Ngɛ Ha Kɛɛ?” (Munyu nɛ ɔ ngɛ Intanɛti ɔ nɔ)

Moo hyɛ nɔ́ he je nɛ e sa nɛ o susu níhi a he saminya loko o tatuu o he.

“Mɛni Baiblo ɔ De Kɛ Kɔ Tatuu He?” (Munyu nɛ ɔ ngɛ Intanɛti ɔ nɔ)

Moo hyɛ sisi tomi mlaa kpahi nɛ ma nyɛ ma kudɔ yi mi kpɔhi nɛ wa mwɔɔ ɔ.

“Anɛ O He Dlami Woɔ Mawu Hɛ Mi Nyami Lo?” (Hwɔɔmi Mɔ, September 2016)

Ngɛ mɛni blɔ nɔ nɛ yo ko nɛ e suɔ kaa e maa sa Mawu hɛ mi ɔ, ba ná juɛmi nɛ da ngɛ bɔ nɛ ni kpahi hla kaa a ma dla a he ha a he?

“He Dlami Ji Nɔ́ Nɛ Tsi Mi Blɔ” (O Hɛ Nɛ Tsɛ̃!, December 22, 2003)