6. (a) Kaa bɔ nɛ Paulo tsɔɔ mi ɔ, mɛni he je nɛ yemi kɛ buami ní tsumi ɔ ji wa jami ɔ fã a? (b) Moo tsɔɔ bɔ nɛ wa tsuɔ yemi kɛ buami ní tsumi ɔ ha mwɔnɛ ɔ ngɛ je kɛ wɛ. (Hyɛ daka nɛ ji, “Ke Oslaa Ba!”)

⁶ Paulo ye bua Korinto bi ɔmɛ nɛ a na nɔ́ he je nɛ yemi kɛ buami ní tsumi ɔ piɛɛ sɔmɔmi nɛ a kɛ haa Yehowa a he ɔ. Mo kadi bɔ nɛ e tsɔɔ mi ha a: akɛnɛ Kristofohi ‘peeɔ tue bumi kɛ haa sane kpakpa nɛ kɔɔ Kristo he ɔ’ he je ɔ, a yeɔ bua a nyɛmimɛ nɛ oslaa ná mɛ ɔ. (2 Kor. 9:13) Lɔ ɔ he ɔ, akɛnɛ Kristofohi suɔ nɛ a kɛ Kristo tsɔɔmihi nɛ tsu ní he je ɔ, e woɔ mɛ kã konɛ a ye bua a nyɛmimɛ. Paulo de hu kaa, kpakpa nɛ a pee kɛ ha a nyɛmimɛ he je ɔ, ‘Mawu hu je suɔmi agbo nɛ hí kalemi kpo ha mɛ.’ (2 Kor. 9:14; 1 Pet. 4:10) December 1, 1975 Blɛfo gbi Hwɔɔmi Mɔ ɔ de ngɛ wa nyɛmimɛ nɛ wa maa ye bua mɛ ngɛ fimi behi a mi ɔ he ke: “E sɛ nɛ wa yi mi nɛ pee wɔ enyɔɔnyɔ kaa Yehowa Mawu kɛ e Bi Yesu Kristo maa kplɛɛ sɔmɔmi ní tsumi nɛ ɔ nɔ loo a be nɔ kplɛɛe.” Ngɛ anɔkuale mi ɔ, yemi kɛ buami ní tsumi ɔ ji wa Mawu jami ɔ fã nɛ he hia.​—Rom. 12:1, 7; 2 Kor. 8:7; Heb. 13:16.

7, 8. Mɛni ji kekle yi mi tomi he je nɛ wa tsuɔ yemi kɛ buami ní tsumi ɔ? Moo tsɔɔ nya.

⁷ Mɛni he je nɛ wa yeɔ bua nihi ɔ? Paulo ha sane bimi nɛ ɔ heto ngɛ womi enyɔne nɛ e ngma kɛ ya ha Korinto bi ɔmɛ ɔ mi. (Kane 2 Korinto Bi 9:11-15.) Ngɛ kuku nɛ ɔmɛ a mi ɔ, Paulo tsɔɔ níhi etɛ nɛ wa náa ngɛ ‘ní tsumi nɛ wa ngɛ tsue,’ nɛ ji yemi kɛ buami ní tsumi ɔ mi. Nyɛ ha nɛ wa susu he kakaaka.

⁸ Kekleekle ɔ, yemi kɛ buami ní tsumi ɔ woɔ Yehowa hɛ mi nyami. Mo kadi si abɔ nɛ Paulo gbla nyɛmimɛ a juɛmi kɛ ya Yehowa Mawu nɔ ngɛ kukuhi enuɔ ɔmɛ a mi ha. Bɔfo Paulo kai Korinto bi ɔmɛ kaa a yemi kɛ buami ɔ ha nɛ nyɛmimɛ ɔmɛ “na Mawu si” nɛ “nihi babauu hu ngɛ Mawu si nae.” (Kuku 11, 12) E tsɔɔ bɔ nɛ yemi kɛ buami ní tsumihi haa nɛ Kristofohi ‘jeɔ Mawu yi,’ ejakaa “Mawu hu je suɔmi agbo nɛ hí kalemi kpo” ha mɛ. (Kuku 13, 14) Paulo mwɔ yemi kɛ buami ní tsumi he sane nɛ e kɛ nyɛmimɛ ɔmɛ susu he ɔ nya ke: “Waa na Mawu si.”​—Kuku 15; 1 Pet. 4:11.

9. Mɛni blɔ nɔ nɛ yemi kɛ buami ní tsumi ɔ ma nyɛ ma tsake nihi a susumi ngɛ? Mo ha enɛ ɔ he nɔ hyɛmi nɔ́.

⁹ Mawu sɔmɔli nɛ a ngɛ mwɔnɛ ɔ buu yemi kɛ buami ní tsumi ɔ kaa he blɔ nɛ a ná nɛ a kɛ maa wo Yehowa hɛ mi nyami konɛ a kɛ e tsɔɔmihi nɛ tsu ní kaa bɔ nɛ Paulo pee ɔ. (1 Kor. 10:31; Tito 2:10) Ngɛ anɔkuale mi ɔ, behi fuu ɔ, yemi kɛ buami nɛ waa kɛ haa ngɛ fimi behi a mi ɔ haa nɛ nihi nɛ a hɛɛ juɛmi nɛ dɛ ngɛ Yehowa kɛ e we Odasefohi a he ɔ tsakeɔ a juɛmi. Kaa nɔ hyɛmi nɔ́ ɔ: Yo ko nɛ ngɛ ma ko nɛ ahumi puɛ ní wawɛɛ ngɛ mi ɔ ngma kɛ mɛtɛ e sinya he ke: “Yehowa Odasefohi​—Nyɛ Ko Ba Hiɛ ɔ.” Se ligbi ko ɔ, e na nɛ ni komɛ ngɛ we ko dlae ngɛ gbɛjegbɛ nɛ ngɛ e we ɔ hɛ mi ɔ se. Be bɔɔ se ɔ, e na kaa ní tsuli ɔmɛ kɛ bua jɔmi ngɛ ní ɔ tsue, nɛ e ya bi mɛ nihi nɛ a ji. Benɛ e ná le kaa a ji Yehowa Odasefohi ɔ, e pee lɛ nyakpɛ, nɛ e de ke, “Jinɛ i sume nyɛ sane.” Mɛni je mi kɛ ba? E ya je ní nɛ e ngma kɛ mɛtɛ e sinya a he ɔ.