• Anɛ Gbijlɔ Yemihi Tsuo Lɛ Saa Mawu Hɛ Mi Lo?
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se

    • Nyɛɛ kane Efeso Bi 5:​10, nɛ nyɛ susu sane bimihi nɛ nyɛɛ se nɛ ɔmɛ a he:

      • Mɛni e sa nɛ waa bɔ mɔde nɛ waa le ke wa ngɛ yi mi kpɔ mwɔe kɛ kɔ gbijlɔ yemi ko he?

      • Mɛni gbijlɔhi lɛ a pɔ he ngɛ he nɛ o ngɛ ɔ?

      • Ke o hyɛ ɔ, anɛ jamɛ a gbijlɔ ɔmɛ saa Yehowa hɛ mi lo?

      Kaa nɔ hyɛmi nɔ́ ɔ, anɛ o susu bɔ nɛ Mawu naa fɔmi ligbi yemi haa he hyɛ lo? Baiblo ɔ de we hyɛ kaa Yehowa sɔmɔli ye a fɔmi ligbi. Se e tu nihi enyɔ nɛ a sɔmɔ we Yehowa nɛ a ye a fɔmi ligbi ɔ a he munyu. Nyɛɛ kane 1 Mose 40:​20-​22 kɛ Mateo 14:​6-​10. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he:

      • Mɛni lɛ je fɔmi ligbi yemi enyɔ nɛ ɔmɛ tsuo a mi kɛ ba?

      • Ngɛ níhi nɛ Baiblo ɔ bɔ he amaniɛ nɛ ɔmɛ a nya a, kɛ o susu kaa Yehowa naa fɔmi ligbi yemi ha kɛɛ?

      Se eko ɔ, o ma bi ke, ‘Ke i ye fɔmi ligbi aloo gbijlɔ kpa ko nɛ teɔ si kɛ woɔ Baiblo ɔ, anɛ e ma gba Yehowa nya lo?’ Nyɛɛ kane 2 Mose 32:​1-8. Lɔ ɔ se ɔ, mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.

      VIDEO: Gbijlɔ Yemihi Nɛ Sɛ Mawu Hɛ Mi (5:07)

      • Mɛni he je nɛ e sa nɛ waa bɔ mɔde nɛ wa yɔse níhi nɛ sa Yehowa hɛ mi ɔ?

      • Mɛni blɔ nɔ wa maa gu kɛ pee jã?

      Bɔ nɛ wa ma plɛ kɛ le ke ji gbijlɔ ko sɛ Mawu hɛ mi

      • Anɛ e teɔ si kɛ woɔ níhi nɛ Baiblo ɔ tsɔɔ ɔ lo? Bɔ nɛ pee nɛ o le ɔ, mo hla he nɛ jamɛ a gbijlɔ ɔ je.

      • Anɛ e woɔ adesahi, kuuhi aloo ma okadihi a hɛ mi nyami ngɛ blɔ nɛ sɛ nɔ lo? Waa kɛ hɛ mi nyami nɛ pe kulaa haa Yehowa, nɛ waa kɛ wa hɛ fɔɔ e nɔ kaa e ma tsu nyagbahi nɛ a ngɛ je ɔ mi ɔ he ní.

      • Anɛ ní peepeehi nɛ yaa nɔ ngɛ mi ɔ teɔ si kɛ siɔ mlaahi nɛ ngɛ Baiblo ɔ mi ɔ lo? E sa nɛ wa je mi bami he nɛ tsɔ be fɛɛ be.

  • Moo Hla Hɛja Jemihi Nɛ Sa Yehowa Hɛ Mi
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se
    • Ní Kasemi 53. Fɔli komɛ kɛ a biyo ngɛ popcorn yee nɛ a ngɛ TV hyɛe.

      NÍ KASEMI 53

      Moo Hla Hɛja Jemihi Nɛ Sa Yehowa Hɛ Mi

      Yehowa ji “bua jɔmi Mawu.” (1 Timoteo 1:​11) E suɔ nɛ wa bua nɛ jɔ wa he ngɛ si himi mi. Yehowa bua jɔɔ ke wa náa be kɛ jɔɔ wa he. Ngɛ ní kasemi nɛ ɔ mi ɔ, wa maa na bɔ nɛ waa kɛ be nɛ waa kɛ jɔɔ wa he ɔ ma tsu ní ha nɛ́ maa sa Yehowa hɛ mi, nɛ́ wa bua nɛ jɔ hulɔ.

      1. Mɛni lɛ e sa nɛ e hi wa juɛmi mi ke wa maa hla hɛja jemi ko?

      Mɛni o peeɔ ke o ngɛ o he jɔɔe? Ni komɛ suɔ kaa mɛ pɛ a maa hi we mi, nɛ́ a maa kane womi, loo a maa bu la tue, loo a maa hyɛ sini, loo a maa ya Intanɛti ɔ nɔ. Ni komɛ hu suɔ kaa a kɛ a huɛmɛ ma ya slaa si, loo a ma ya wu pa, loo a ma ya fia bɔɔlu. E sa nɛ wa ha nɛ níhi nɛ waa kɛ ma je wa hɛja a nɛ pee níhi nɛ “sa Nyɔmtsɛ ɔ hɛ mi.” (Efeso Bi 5:​10) E he hia nɛ waa pee jã ejakaa, níhi nɛ yaa nɔ ngɛ hɛja jemihi fuu a mi ɔ ji níhi nɛ Yehowa hiɔ. Ní nɛ ɔmɛ ekomɛ ji, yi wu tso níhi, ajuama bɔmi ní peepeehi, kɛ mumi yayami kɛ ní tsumi. (Kane La 11:5.) Mɛni maa ye bua wɔ konɛ waa kɛ nile nɛ hla níhi nɛ waa kɛ ma je wa hɛja a?

      Ke wa hla huɛmɛ nɛ a suɔ Yehowa a, a ma ná wa nɔ he wami ngɛ blɔ kpakpa nɔ, nɛ lɔ ɔ maa ye bua wɔ nɛ́ waa hla hɛja jemihi nɛ sa. Kaa bɔ nɛ wa kase ngɛ Ní Kasemi 48 ɔ mi ɔ, “nɔ nɛ kɛ ní leli nyɛɛɔ ɔ, e leɔ ní.” Se ke waa kɛ nihi nɛ a kɛ Mawu mlaa a tsu we ní ɔ bɔɔ ɔ, wa ma ‘ná haomi.’​—Abɛ 13:20.

      2. Mɛni he je nɛ e sa nɛ waa hyɛ be abɔ nɛ waa kɛ jeɔ wa hɛja a saminya a?

      Ke níhi nɛ waa kɛ jeɔ wa hɛja a sa Yehowa hɛ mi po ɔ, e sa nɛ waa hyɛ saminya nɛ wa ko puɛ be fuu ngɛ he. Ke pi jã a, wa be be fuu náe kɛ pee níhi nɛ a he hia a. Baiblo ɔ woɔ wɔ he wami kaa waa kɛ wa “be nɛ tsu ní ngɛ blɔ nɛ hi pe kulaa nɔ.”​—Kane Efeso Bi 5:​15, 16.

      MOO KASE BABAUU

      Moo hyɛ bɔ nɛ o maa pee ha kɛ mwɔ yi mi kpɔ nɛ da ngɛ hɛja jemi he.

      3. Mo kua hɛja jemi nɛ sɛ

      Mɛni he je nɛ e sa nɛ waa hyɛ saminya ke wa maa hla níhi nɛ waa kɛ ma je wa hɛja a? Mo je VIDEO ɔ, nɛ́ nyɛ susu sane bimihi nɛ nyɛɛ se nɛ ɔmɛ a he.

      VIDEO: Mɛni Hɛja Jemi E Sa Kaa Ma Hla? (4:39)

      • Ngɛ mɛni blɔ nɔ nɛ blema Roma bi ɔmɛ a fiɛmi ɔmɛ ngɛ kaa fiɛmi komɛ nɛ a ngɛ mwɔnɛ ɔ?

      • Ngɛ video ɔ mi ɔ, mɛni Danny kase ngɛ hɛja jemi he?

      Nyɛɛ kane Roma Bi 12:​9, nɛ́ nyɛ susu sane bimi nɛ ɔ he:

      • Ke o maa hla hɛja jemi ko ɔ, kɛ e sa kaa ngmami nɛ ɔ nɛ ye bua mo ha kɛɛ konɛ o hla nɔ́ nɛ sa?

      Mɛni ji ní komɛ nɛ Yehowa hiɔ? Nyɛɛ kane Abɛ 6:​16-19 kɛ Galatia Bi 5:​19-21. Ke nyɛ kane ngmami ɔ eko fɛɛ eko ta a, nyɛ susu sane bimi nɛ ɔ he:

      • Níhi nɛ a wo ta ngɛ ngmami ɔ mi ɔ, a kpɛti te nɛɛ lɛ e pɔ he ngɛ hɛja jemihi a mi mwɔnɛ ɔ?

      Sane bimihi nɛ maa ye bua mo nɛ́ o hla hɛja jemi nɛ sa

      Mo bi o he ke:

      • Mɛni ma kɛ je ye hɛja a? Anɛ nɔ́ ko ngɛ mi nɛ Yehowa sume lo?

      • Mɛni be ma je ye hɛja a? Anɛ hɛja jemi ɔ be hae nɛ ma ná be kɛ pee níhi nɛ a he hia wawɛɛ ɔ lo?

      • I kɛ mɛnɔmɛ nɛ wa ma je wa hɛja a? Anɛ e ma ha nɛ i kɛ nihi nɛ a sɔmɔ we Yehowa a nɛ bɔ gbagbanii lo?

      E hi kaa wa maa yu wa he kulaa kɛ je níhi nɛ a kɛ wɔ maa wo oslaa mi ɔ a he. Enɛ ɔ he je nɛ e sa kaa waa yu wa he ngɛ hɛja jemihi nɛ wa na kaa a ma nyɛ maa ye wɔ awi ɔ he ɔ nɛ

      Lɔle ko nɛ e ngɛ nyɛɛe ngɛ yoku ko he. Lɔle ɔ se ɔ je blɔ ɔ nɔ kulaa.

      4. Ngɔɔ o be kɛ tsu ní saminya

      Mo je VIDEO ɔ, nɛ́ nyɛ susu sane bimi nɛ nyɛɛ se ɔ he.

      VIDEO: Mɛni Lɛ Ngɔɔ O Be? (2:45)

      • Ngɛ video ɔ mi ɔ, e ngɛ mi kaa pi nɔ́ yaya ko nɛ nyɛminyumu ɔ ngɛ hyɛe mohu lɛɛ, se mɛni ji e nyagba a?

      Nyɛɛ kane Filipi Bi 1:​10, nɛ́ nyɛ susu sane bimi nɛ ɔ he:

      • Kɛ ngmami nɛ ɔ maa ye bua wɔ ha kɛɛ nɛ waa le be abɔ nɛ e sa kaa wa kɛ je wa hɛja?

      5. Moo hla hɛja jemi nɛ sa

      E ngɛ mi kaa hɛja jemi komɛ ngɛ nɛ a sɛ Yehowa hɛ mi mohu lɛɛ, se ní kpahi fuu ngɛ nɛ wa ma nyɛ ma kɛ je wa hɛja. Nyɛɛ kane Fiɛlɔ 8:​15 kɛ Filipi Bi 4:​8, nɛ́ nyɛ susu sane bimi nɛ ɔ he:

      • Mɛni hɛja jemi nɛ́ sa lɛ o bua jɔ he?

      Foni Ɔmɛ: Nihi nɛ e slo a jeha nɛ a kɛ a he ngɛ hɛja jemihi nɛ sa mi woe. 1. Yiheyo ko nɛ e ngɛ la tue bue nɛ e ngɛ ní tɛnie. 2. Nihewi etɛ komɛ nɛ a ngɛ bɔɔlu fiae. 3. Jokuɛ nyumuwi enyɔ nɛ a kuɔ baisikle. 4. Jokuɛ nyumuyo ko nɛ e ngɛ lɔle ko pee nɛ e kɛ ma fiɛ. 5. Nyumu ko nɛ e ngɛ do ko fiae. 6. Niheyo ko nɛ e kɛ e papaa ngɛ video nɔ fiɛmi ko fiɛe. 7. Yo ko nɛ e ngɛ foto sae.

      O ma nyɛ maa hla hɛja jemihi nɛ sa nɛ́ ma ha nɛ o bua nɛ jɔ

      NI KOMƐ DEƆ KE: “Tɔmi ko be he kaa ma hyɛ sini ko nɛ basabasa peemi, ajuama bɔmi, aloo mumi yayami ní peepee ngɛ mi, be abɔ nɛ imi nitsɛ i pee we jamɛ a ní ɔmɛ eko.”

      • Ke nɔ ko de jã a, mɛni o ma de?

      NYA MWƆMI

      Yehowa suɔ nɛ waa hla hɛja jemihi nɛ sa, nɛ ma ha nɛ wa bua nɛ jɔ.

      Mi Nylɔmi

      • Mɛni hɛja jemihi lɛ e sa kaa Kristofohi nɛ a kua?

      • Mɛni he je nɛ e sa nɛ waa hyɛ saminya ngɛ be abɔ nɛ waa kɛ jeɔ wa hɛja a he ɔ?

      • Mɛni he je nɛ o suɔ nɛ o hla hɛja jemihi nɛ sa Yehowa hɛ mi ɔ?

      Nɔ́ Nɛ O Ma Tsu He Ní

      NÍ KPAHI NƐ MAA YE BUA MO

      Mɛnɔ lɛ e sa kaa e hla nɔ́ nɛ o kɛ ma je o hɛja ha mo?

      “Anɛ Yehowa Odasefohi Tsiɔ A Jami ɔ Mi Bi A Nya Ngɛ Sini Komɛ A Hyɛmi, Womi Komɛ A Kanemi, Loo La Komɛ A Tue Bumi He Lo?” (Munyu nɛ ɔ ngɛ Intanɛti ɔ nɔ)

      Moo hyɛ blɔ nɔ nɛ o maa gu kɛ mwɔ yi mi kpɔ nɛ da ngɛ hɛja jemi he.

      “Anɛ Se Nami Ngɛ Níhi Nɛ O Kɛ Jeɔ O Hɛja a He Lo?” (Hwɔɔmi Mɔ, October 15, 2011)

      Moo kane munyu nɛ ji, “I Ná We Nihi A He Juɛmi Yaya Hu” ɔ, konɛ o na nɔ́ he je nɛ nyumu ko tsake níhi nɛ e kɛ jeɔ e hɛja a.

      “Baiblo ɔ Tsakeɔ Nihi A Si Himi” (Hwɔɔmi Mɔ, February 1, 2010)

      Moo hyɛ bɔ nɛ binyɛ ko mwɔ yi mi kpɔ nɛ da ngɛ hɛja jemihi nɛ mumi yayami ní peepeehi ngɛ mi ɔ he ha.

      Mo Kua Hɛja Jemi Nɛ Mumi Yayami Ní Peepeehi Ngɛ Mi (2:02)