• O Ma Nyɛ Maa Pee Yehowa Huɛ
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se

    • O Ma Nyɛ Maa Pee Yehowa Huɛ

      Yehowa suɔ kaa o le lɛ saminya. Mɛni he je? Ejakaa e suɔ nɛ o kɛ lɛ nɛ pee huɛ. Se loko o kɛ lɛ ma nyɛ maa pee huɛ ɔ, ja o kaseɔ e suhi, bɔ nɛ e peeɔ e ní ha, kɛ e yi mi tomihi a he ní. Ke o ya nɔ nɛ o kase Yehowa he ní ɔ, o bua maa jɔ kaa o kɛ lɛ maa pee huɛ. Se anɛ o kɛ Mawu ma nyɛ maa pee huɛ niinɛ lo? (Kane La 25:14.) Mɛni o ma nyɛ maa pee konɛ o nyɛ nɛ o pee e huɛ? Baiblo ɔ ha sane bimi nɛ ɔmɛ a heto. Jehanɛ se hu ɔ, e tsɔɔ nɔ́ he je nɛ Yehowa nɛ waa kɛ maa bɔ huɛ ɔ ji he blɔ ko nɛ se be ɔ.

      1. Mɛni nɛ Yehowa ngɛ mo nine fɔe kaa o pee?

      Baiblo ɔ de ke, “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.” (Yakobo 4:8) Mɛni munyu nɛ ɔ tsɔɔ? Yehowa ngɛ mo nine fɔe kaa o ba pee e huɛ. Ngɛ nihi fuu a blɔ fa mi ɔ, akɛnɛ a nɛ́ Mawu he je ɔ, a susuɔ kaa a kɛ lɛ be nyɛe maa pee huɛ. Se kɛ̃ ɔ, Yehowa gu e Munyu, nɛ ji Baiblo ɔ nɔ kɛ tsɔɔ wɔ su kpakpahi nɛ e ngɛ ɔ, bɔ nɛ pee nɛ́ wa nyɛ nɛ́ waa hɛ kɛ su e he, nɛ́ waa kɛ lɛ nɛ pee huɛ. E ngɛ mi kaa wa nɛ́ Mawu mohu lɛɛ, se ke wa ya nɔ nɛ wa kane e sɛ gbi nɛ ngɛ Baiblo ɔ mi ɔ, e ma ha nɛ huɛ bɔmi nɛ ngɛ waa kɛ Yehowa wa kpɛti ɔ mi maa wa.

      2. Mɛni he je nɛ Yehowa ji Huɛ nɛ se be nɛ o ma nyɛ ma ná a?

      Nɔ ko be nɛ e suɔ mo pe bɔ nɛ Yehowa suɔ mo ɔ. E suɔ nɛ o bua nɛ jɔ. Nɛ e pee klaalo kaa e maa ye bua mo be fɛɛ be nɛ́ o maa hia yemi kɛ buami. O ma nyɛ maa ngɔ ‘o yeyeeye peemi ɔmɛ tsuo ngɔ fɔ e nɔ, ejakaa e susuɔ o he.’ (1 Petro 5:7) Yehowa pee klaalo be fɛɛ be kaa e maa ye bua e huɛmɛ, e maa wo a bua, nɛ jehanɛ se hu e maa bu mɛ tue.​—Kane La 94:18, 19.

      3. Mɛni Yehowa suɔ nɛ́ waa pee konɛ wa nyɛ nɛ́ waa pee e huɛmɛ?

      Yehowa suɔ adesahi tsuo, ‘se nihi nɛ a peeɔ nɔ́ nɛ da a lɛ e kɛ bɔɔ gbagbanii.’ (Abɛ 3:32) Yehowa suɔ nɛ e huɛmɛ nɛ a pee níhi nɛ Baiblo ɔ tsɔɔ kaa a ji ní kpakpahi ɔ, nɛ́ a hiɔ níhi nɛ Baiblo ɔ tsɔɔ kaa a ji ní yayamihi ɔ. Ni komɛ susuɔ kaa a be nyɛe nɛ a pee níhi nɛ Yehowa suɔ kaa a pee ɔ, nɛ́ a hiɔ níhi nɛ e sume ɔ. Se kɛ̃ ɔ, Yehowa naa nɔ mɔbɔ, nɛ e nuɔ nɔ́ sisi hulɔ. Enɛ ɔ he ɔ, ke nɔ ko suɔ Yehowa, nɛ e bɔɔ mɔde kaa e maa pee e suɔmi nya ní ɔ, Yehowa bua jɔɔ jamɛatsɛ ɔ he.​—La 147:11; Ní Tsumi 10:34, 35.

      MOO KASE BABAUU

      Moo kase babauu kɛ kɔ blɔ nɔ nɛ o maa gu kɛ pee Yehowa huɛ ɔ he, nɛ́ o hyɛ nɔ́ he je nɛ e ji Huɛ nɛ se be nɛ o ma nyɛ ma ná a.

      4. Abraham ji Yehowa huɛ

      Abraham (nɛ a tsɛɛ lɛ hu ke Abram) he sane nɛ ngɛ Baiblo ɔ mi ɔ yeɔ bua wɔ nɛ wa naa nɔ́ nɛ Mawu huɛ nɛ nɔ ko maa pee ɔ tsɔɔ. Nyɛɛ Kane Abraham he sane ngɛ 1 Mose 12:1-4, nɛ nyɛ susu sane bimihi nɛ nyɛɛ se nɛ ɔmɛ a he:

      • Mɛni Yehowa de Abraham kaa e pee?

      • Mɛni si nɛ Yehowa wo Abraham?

      • Mɛni Abraham pee ngɛ blɔ tsɔɔmi nɛ Yehowa kɛ ha lɛ ɔ he?

      5. Mɛni Yehowa suɔ kaa e huɛmɛ nɛ a pee?

      Behi fuu ɔ, wa hyɛɛ blɔ kaa wa huɛmɛ nɛ a pee ní komɛ.

      • Mɛni ji ní komɛ nɛ o suɔ kaa o huɛmɛ nɛ a pee kɛ ha mo?

      Nyɛɛ kane 1 Yohane 5:3, nɛ nyɛ susu sane bimi nɛ ɔ he:

      • Mɛni Yehowa suɔ kaa e huɛmɛ nɛ a pee?

      Ja wa pee tsakemihi ngɛ wa subai kɛ wa je mi bami komɛ a mi loko wa ma nyɛ maa sa Yehowa hɛ mi. Nyɛɛ kane Yesaya 48:17, 18, nɛ nyɛ susu sane bimi nɛ ɔ he:

      • Mɛni he je nɛ Yehowa suɔ kaa e huɛmɛ nɛ a pee tsakemihi ngɛ a si himi mi ɔ?

      Tsu malɔ ko nɛ e ngɛ nɔ ko nɛ e kɛ tsuɔ ní pɛɛ hae konɛ e bu kɛ po e he piɛ.

      Huɛ kpakpa ma kai wɔ níhi nɛ ke wa pee ɔ, e maa ye bua wɔ, nɛ e maa po wa he piɛ. Jã nɔuu nɛ Yehowa hu peeɔ kɛ haa e huɛmɛ

      6. Mɛni nɛ Yehowa peeɔ kɛ yeɔ bua e huɛmɛ?

      Yehowa yeɔ bua e huɛmɛ konɛ a nyɛ nɛ a da nyagbahi a nya. Mo je VIDEO ɔ, nɛ nyɛ susu sane bimi nɛ ɔ he.

      VIDEO: Yehowa Ye Bua Mi Pe Bɔ Nɛ Ma Nyɛ Ma De (3:20)

      • Be fɛɛ be nɛ yo ɔ ma kai níhi nɛ ya nɔ ngɛ e si himi mi ɔ, kɛ Yehowa yeɔ bua lɛ ha kɛɛ?

      Nyɛɛ kane Yesaya 41:10, 13, nɛ nyɛ susu sane bimihi nɛ nyɛɛ se nɛ ɔmɛ a he:

      • Mɛni nɛ Yehowa wo si kaa e maa pee kɛ ha nihi tsuo nɛ a ji e huɛmɛ ɔ?

      • Anɛ o susu kaa Yehowa ji huɛ kpakpa lo? Mɛni he je nɛ o susu jã a?

      Foni ɔmɛ: Huɛmɛ nɛ a ngɛ a sibi ye buae. 1. Nyumu ko nɛ e ngɛ nyumu ko ye buae kɛ ngɛ okplɔɔ nɔ woe. 2. Yo ko nɛ e ngɛ yo ko e nyagba dee. 3. Nyumu ko nɛ e ngɛ nyumu ko ye buae konɛ e nyɛ nɛ e nyɛɛ.

      Ke o hia yemi kɛ buami ɔ, o huɛmɛ nɛ a suɔ mo ɔ yeɔ bua mo. Yehowa hu maa ye bua mo jã nɔuu

      7. Ní sɛɛmi he hia ngɛ waa kɛ Yehowa wa huɛ bɔmi ɔ mi

      Ke huɛmɛ kɛ a sibi sɛɛɔ ní ɔ, e haa nɛ a huɛ bɔmi ɔ mi waa. Nyɛɛ kane La 86:6, 11, nɛ nyɛ susu sane bimihi nɛ nyɛɛ se nɛ ɔmɛ a he:

      • Mɛni blɔ nɔ wa maa gu konɛ waa kɛ Yehowa nɛ sɛɛ ní?

      • Mɛni blɔ nɔ nɛ Yehowa guɔ nɛ e kɛ wɔ sɛɛɔ ní?

      Foni ɔmɛ: 1. Yo ko nɛ e ngɛ sɔlee. Arrow ɔ nɛ ngɛ e yi nɔ ɔ tsɔɔ hiɔwe. 2. Yo ko nɛ e ngɛ Baiblo ɔ kanee. Arrow ɔ nɛ ngɛ e yi nɔ ɔ tsɔɔ zugba.

      Waa kɛ Yehowa tuɔ munyu kɛ guɔ sɔlemi nɔ; nɛ lɛ hu e kɛ wɔ tuɔ munyu kɛ guɔ Baiblo ɔ nɔ

      NI KOMƐ DEƆ KE: “Waa kɛ Mawu be nyɛe maa pee huɛ.”

      • Mɛni ngmami nɛ o kɛ maa tsɔɔ nya kaa waa kɛ Yehowa ma nyɛ maa pee huɛ?

      NYA MWƆMI

      Yehowa suɔ kaa e maa pee o Huɛ, nɛ e suɔ kaa e maa ye bua mo konɛ o nyɛ nɛ o hɛ kɛ su e he.

      Mi Nylɔmi

      • Mɛni blɔ nɔ nɛ Yehowa guɔ kɛ yeɔ bua e huɛmɛ?

      • Mɛni he je nɛ Yehowa suɔ kaa e huɛmɛ nɛ a pee tsakemi ngɛ a si himi mi ɔ?

      • Anɛ o susu kaa níhi nɛ Yehowa ngɛ hlae nɛ e huɛmɛ nɛ a pee ɔ he wa tsɔ lo? Mɛni he je nɛ o de jã a?

      Nɔ́ Nɛ O Ma Tsu He Ní

      NÍ KPAHI NƐ MAA YE BUA MO

      Ke o kɛ Mawu pee huɛ ɔ, kɛ o ma ná he se ha kɛɛ?

      “Yehowa Ji Mawu Nɛ E Sa Kaa A Le Lɛ” (Hwɔɔmi Mɔ, February 15, 2003)

      Moo kase nɔ́ nɛ o maa pee konɛ o nyɛ nɛ o kɛ Mawu nɛ bɔ huɛ.

      “Mɛni Ma Pee Konɛ Ma Nyɛ Nɛ Ma Pee Mawu Huɛ?” (Sanehi Nɛ Nihewi Kɛ Yihewi Biɔ​—Hetohi Nɛ Yeɔ Bua, Kpo 2, yi 35)

      Moo hyɛ nɔ́ he je nɛ yo ko susu kaa huɛ nɛ e kɛ Yehowa bɔ ɔ lɛ ha nɛ e si himi pee kpakpa a.

      “I Sume Nɛ Ma Gbo!” (Hwɔɔmi Mɔ No. 1 2017)

      Moo hyɛ ní komɛ nɛ nihewi kɛ yihewi komɛ de kɛ kɔ bɔ nɛ a naa Yehowa ha a he.

      Mɛni Mawu Huɛ Nɛ Nɔ Ko Maa Pee ɔ Tsɔɔ? (1:46)