OKPƆNGƆ TSUTSU Ɔ NƆ HILƆ

‘Kɛkɛ nɛ okpɔngɔ kpa ba, nɛ lɛɛ e tsuɔ. Mawu ha okpɔngɔ nɔ hilɔ ɔ he blɔ nɛ e je tue mi jɔmi kɛ je zugba a nɔ, konɛ nimli nɛ gbe a he. A ha lɛ klaate gagaa ko.’​—Kpojemi 6:4.

Okpɔngɔ nɔ hilɔ nɛ ɔ daa si kɛ ha ta. Mo kadi kaa okpɔngɔ nɔ hilɔ nɛ ɔ ma je tue mi jɔmi kɛ je zugba a tsuo nɔ, se pi mahi komɛ pɛ a mi. Jeha 1914 ɔ ji kekleekle be nɛ a hwu ta ngɛ je ɔ mi tsuo. Lɔ ɔ se ɔ, a hwu je mi ta enyɔne nɛ mi wa pe kekle nɔ́ ɔ po. Akɔtaa bumi ko tsɔɔ kaa nihi nɛ gbo ngɛ ta mi kɛ je jeha 1914 kɛ ma nɛ ɔ hiɛ pe ayɔ 100! Nihi babauu hu plaa wawɛɛ.

Kɛ tahi pɔ he wawɛɛ ngɛ wa be nɛ ɔ mi ha kɛɛ? Mwɔnɛ ɔ, adesahi ya hɛ mi wawɛɛ ngɛ ta hwumi mi. A ma nyɛ ma kpata wami tsuo hɛ mi ngɛ be kpiti mi. Kuuhi nɛ a ngɛ mɔde bɔe kaa a maa ngɔ kake peemi kɛ ba je ɔ mi kaa Je Ma Amɛ A Kake Peemi Kuu ɔ po nyɛ we nɛ e tsi nɔ nɛ hii si ngɛ okpɔngɔ tsutsu ɔ nɔ ɔ nya.