Anɛ Adesahi Ma Kpata Zugba a Hɛ Mi Lo?

Baiblo ngmalɔ nɛ ɔ nɛ hi si blema a yɔse kaa adesa wami se kɛ we, se zugba a lɛɛ e ngɛ daa. Ngɛ anɔkuale mi ɔ, jeha akpehi abɔ ji nɛ ɔ, yi nɔhi ba, nɛ a be kɛ ho, se zugba a ngɛ, nɛ adesahi ngɛ nɔ kɛ ba si mwɔnɛ ɔ.

Je ɔ tsake kulaa kɛ je Je Mi Ta enyɔne ɔ se. Ngɛ jeha 70 loo nɔ́ ji nɛ ɔ, adesahi ya hɛ mi wawɛɛ ngɛ klamahi a he nile mi. A pee klamahi nɛ a kɛ hiaa blɔ, klamahi nɛ a kɛ sɛɛ ní, kɛ kɔmpiuta klama kpahi, nɛ enɛ ɔmɛ tsuo ha nɛ sika sanehi tsake kulaa. Níhi a mi hi ha nihi babauu. Jehanɛ hu, e piɛɛ bɔɔ nɛ adesahi a yibɔ maa bɔ he totoe etɛ.

Se hɛ mi yami nɛ ɔ tsuo ha nɛ a puɛ níhi fuu ngɛ zugba a nɔ. Adesahi a ní peepee ngɛ zugba a puɛe, nɛ lɔ ɔ ma ha nɛ e be kɛe nɛ níhi nɛ haa nɛ wami nyɛɔ hii zugba a nɔ ɔ be ní tsue saminya. Je mi si kpali komɛ susu kaa, maa pee jeha lafa ji nɛ ɔ, adesahi a ní peepee ha nɛ zugba a tsake kulaa.

Baiblo ɔ gba kɛ fɔ si kaa be maa ba nɛ adesahi ma ‘kpata zugba a hɛ mi.’ (Kpojemi 11:18) Nihi hlaa kaa a maa le ke ji wa ngɛ jamɛ a be ɔ mi. Jije níhi ma puɛ kɛ ya su? Anɛ nɔ́ ko be hie peemi ngɛ he lo? Ngɛ anɔkuale mi ɔ, anɛ adesahi ma kpata zugba a hɛ mi lo?

ANƐ NƆ́ KO BE HIE PEEMI NGƐ HE LO?

Anɛ zugba a ma puɛ nɛ e be hie dlami lo? Je mi si kpali komɛ susu kaa e he maa wa kaa a maa tsɔɔ nɔ́ nɛ maa je kɔɔhiɔ mi tsakemi mi kɛ ba. Enɛ ɔ he ɔ, a ngɛ gbeye yee kaa kɔɔhiɔ mi tsakemi nɛ a hyɛ we blɔ ɔ ma ha nɛ oslaahi maa ba.

Kaa nɔ hyɛmi nɔ́ ɔ, mo susu ais nɛ ha wo ɔ hɛ mi ngɛ hehi komɛ ɔ he nɛ o hyɛ. Ni komɛ he ye kaa bɔ nɛ je mi ngɛ la dɔe ha a ma ha nɛ ais ɔ maa sile, nɛ nɔ́ ko be hie peemi ngɛ he. Ais ɔ ha we nɛ pu la a nɛ saa woɔ hehi nɛ ais ɔ ngɛ ɔ. Se bɔ nɛ e ngɛ silee ha a ma ha nɛ pu la a ma ná wo ɔ tɛɛ. Enɛ ɔ ma ha nɛ nyu nɛ ngɛ ais ɔ sisi maa dɔla, nɛ lɔ ɔ ma ha nɛ ais ɔ maa sile mlamlaamla. Nɔ́ ko be hie peemi ngɛ bɔ nɛ ais ɔ ngɛ silee ha a he. Ke ais ɔ tsuo sile ɔ, wo ɔ ma hyi, nɛ lɔ ɔ kɛ oslaa maa ba nihi babauu a nɔ.