Bebe huɛ ko nɛ tu munyu nɛ sɛ hlami ɔ kɛ tsɔɔ lɛ ɔ nɛ. Bebe suɔ e papaa wawɛɛ. Enɛ ɔ he ɔ, nɔ́ nɛ nɔ ɔ de ɔ hao lɛ. Nɔ́ nɛ Bebe pɔɔ demi ji, “E sɛ nɛ papaa ko gbo.” Jeha babauu be, se Bebe kpa we e papaa gbenɔ ɔ he aywilɛho yemi. E ngma womi ko nɛ e tu nɔ́ nɛ ba e papaa nɔ ɔ he munyu ngɛ mi.

Bebe ba na kaa ke nɔ ko suɔlɔ gbo ɔ, e se ma nyɛ maa kɛ loko nɔ ɔ ma kpa aywilɛho yemi. Enɛ ɔ he ɔ, e da kaa Baiblo ɔ tsɛ gbenɔ ke “nyagbe he nyɛlɔ.” (1 Korinto Bi 15:26) Behi fuu ɔ, ke gbenɔ ma a, e wui nɔ ko si. E ba woɔ wa suɔli kɛ jeɔ, nɛ wa nyɛ we nɛ waa pee nɔ́ ko ngɛ he. Wa ti nɔ ko be nyɛe maa tu nyagbahi nɛ gbenɔ kɛ baa a nya fo. Enɛ ɔ he ɔ, ke e ba kaa wa suɔlɔ ko gbo ɔ, wa ti nihi fuu li bɔ nɛ wa maa pee ha.

Eko ɔ, o ma bi ke: ‘Ke ye suɔlɔ ko gbo ɔ, mɛni be ma kpa aywilɛho yemi? Kɛ ma pee kɛɛ? Mɛni ma nyɛ ma pee kɛ wo nihi nɛ a suɔli gbo ɔ a bua? Anɛ wa ma nyɛ maa na wa suɔli nɛ a gbo ɔ ekohu lo?’

Anɛ hiɔ ko fia mo hyɛ lo? Eko ɔ, o ná he wami mla nɛ o hɛ je níhi nɛ o gblee mi ɔ nɔ. Se aywilɛho yemi be jã. Dr. Alan Wolfelt ngma ngɛ e womi nɛ ji Healing a Spouse’s Grieving Heart ɔ mi ke: “Nɔ ko be nɛ e ma nyɛ ma ‘kpa aywilɛho yemi.’ Se ke nihi ya nɔ nɛ a wo wa bua a, aywilɛho ɔ nya baa si.”

Kaa nɔ hyɛmi nɔ́ ɔ, mo susu blematsɛ Abraham he nɛ o hyɛ. Benɛ e yo ɔ gbo ɔ, Baiblo ɔ de ke, “Abraham ye Sara kɔmɔ, nɛ e nyɛ ya ha lɛ.” Eko ɔ, e maa pee kaa Abraham ye aywilɛho jeha babauu.a Yakob hu ye aywilɛho wawɛɛ benɛ a sisi lɛ kaa lohwe awi yelɔ ko tsɔtslɔɔ e bi Yosef mi ɔ. E ye aywilɛho “ligbi babauu.” E bimɛ ɔmɛ bɔ mɔde kaa a maa wo e bua, se e bua hí womi. Jeha babauu be, se e ya nɔ nɛ e ye Yosef he kɔmɔ.​—1 Mose 23:2; 37:34, 35; 42:36; 45:28.

Mwɔnɛ ɔ hu ke wa suɔlɔ ko gbo ɔ, wa yeɔ aywilɛho wawɛɛ. Mo susu nɔ hyɛmi níhi enyɔ nɛ nyɛɛ se ɔ he nɛ o hyɛ.

• “Ye huno Robert gbo ngɛ July 9, 2008. Ye hɛ ji níhi nɛ ya nɔ ligbi nɛ e ná lɔle oslaa nɛ e gbo ɔ nɔ gblegbleegble. Jamɛ a ligbi ɔ mɔtu loko e maa je kɛ ho ní tsumi ya a, wa ye ní, e fua mi, nɛ e fiɔ ye nya he. Kɛkɛ nɛ e de mi ke, e suɔ mi, nɛ imi hu i de lɛ ke, i suɔ lɛ. Jeha ekpa ji nɛ ɔ nɛ ye huno ɔ gbo, se loloolo ɔ, i yeɔ aywilɛho. I he we yi kaa ye hɛ ma nyɛ maa je Rob nɔ.”—Gail, e ye jeha 60.

• “Jeha 18 kɛ se ji nɛ ɔ nɛ ye yo ɔ si, se loloolo ɔ, ye hɛ jaa ngɛ e he nɛ i yeɔ aywilɛho. Be fɛɛ be nɛ ma na adebɔ nɔ́ ko nɛ ngɛ fɛu ɔ, i kaiɔ lɛ nɛ i susuɔ kaa ke e ngɛ wami mi ɔ, jinɛ e bua ko jɔ he.”​—Etienne, e ye jeha 84.

Enɛ ɔ tsɔɔ heii kaa ke wa suɔlɔ ko gbo ɔ, e ma nyɛ maa dɔ wɔ wawɛɛ, nɛ e se maa kɛ loko dɔdɔɛ ɔ maa ba si. E slo bɔ nɛ nɔ fɛɛ nɔ yeɔ aywilɛho ha, enɛ ɔ he ɔ, nile be mi kaa wa maa tu bɔ nɛ nɔ ko yeɔ aywilɛho ha a he munyu yaya. Ke e peeɔ wɔ kaa wa ngɛ aywilɛho yee tsɔ po ɔ, e sɛ nɛ e hao wɔ kaa wa nyɛ we nɛ waa ye wa he nɔ. Se kɛ̃ ɔ, kɛ wa maa pee kɛɛ?

Nihi fuu tsɔɔ a juɛmi ngɛ munyu nɛ ɔ he. Se pi nɔ́ nɛ a de ɔ tsuo nɛ maa ye bua mo. Kaa nɔ hyɛmi nɔ́ ɔ, eko ɔ, nɔ ko ma de mo ke o ko fo ya aloo o ko ye aywilɛho tsɔ. Ni kpahi hu ma de mo ke, mo fo bɔ nɛ o ma nyɛ loo mo fo ya nɛ dɔdɔɛ ɔ nɛ je o mi. Se Baiblo ɔ tsɔɔ nɔ́ nɛ hi pe kulaa nɛ o ma nyɛ maa pee. Níhi a mi hlami hu tsɔɔ kaa nɔ́ nɛ Baiblo ɔ de ɔ ji anɔkuale.

Ngɛ ma komɛ a nɔ ɔ, a deɔ ke nyumu fo we ya. Se anɛ e sa kaa e pee mo zo kaa o ma fo ya ngɛ nihi a hɛ mi lo? Dɔkitahi tsɔɔ kaa behi fuu ɔ, ke nɔ ko ngɛ e suɔlɔ ko gbenɔ he aywilɛho yee ɔ, e foɔ ya. Ke o ngɛ aywilɛho yee nɛ o fo ya a, bɔɔbɔɔbɔɔ ɔ, dɔdɔɛ ɔ nya maa ba si. Se ke o fo we ya a, e ma nyɛ maa ye mo awi. Baiblo ɔ tsɔɔ we kaa e sɛ nɛ nyumu nɛ fo ya. Mo susu nɔ́ nɛ Yesu pee be ko ɔ he nɛ o hyɛ. Benɛ Yesu huɛ Lazaro gbo ɔ, e ngɛ mi kaa e ngɛ he wami nɛ e kɛ ma tle Lazaro si mohu lɛɛ, se e fo ya ngɛ nihi a hɛ mi nɛ e pee we lɛ zo!​—Yohane 11:33-35.

Ke o suɔlɔ ko gbo tlukaa, nɛ o ngɛ aywilɛho yee ɔ, o mi mi ma nyɛ ma fu po. Níhi fuu ngɛ nɛ ma nyɛ ma ha nɛ o mi mi ma fu. Kaa nɔ hyɛmi nɔ́ ɔ, ke nɔ ko nɛ o buu lɛ wawɛɛ tu munyu ko nɛ sɛ ɔ, e ma nyɛ maa wo o mi mi la. Nyumu ko nɛ e ngɛ South Africa nɛ a tsɛɛ lɛ ke Mike ɔ de ke: “Benɛ ye papaa gbo ɔ, i ye jeha 14 pɛ. Anglikan osɔfo ko de ngɛ ye papaa ya a sisi ke, Mawu hia nimli kpakpahi ngɛ hiɔwe, enɛ ɔ he ɔ, e ba ngɔɔ mɛ mla.a Enɛ ɔ wo ye mi mi la wawɛɛ ejakaa wa hia wa papaa yemi kɛ buami nitsɛ. Amlɔ nɛ ɔ, i ye jeha 63, se loloolo ɔ, nɔ́ nɛ e de ɔ dɔɔ mi.”

Nɛ ke o ngɛ o he piae hu nɛɛ? Be komɛ ɔ, ke nɔ ko gbo tlukaa a, nɔ nɛ ngɛ aywilɛho yee ɔ deɔ ke, ‘Kaa i pee kikɛ ɔ jinɛ e ko gbo we.’ Aloo eko ɔ, o kɛ nɔ ɔ sã nya loko e gbo. Enɛ ɔ ma nyɛ ma ha nɛ o pia o he wawɛɛ.

Ke o mi mi fu o he, aloo o ngɛ o he piae kaa nɔ́ ko nɛ o pee he je nɛ nɔ ɔ gbo ɔ, e sa nɛ o bɔ mɔde nɛ o je jamɛ a susumi ɔ ngɛ o mi. O ma nyɛ nɛ o kɛ o huɛ kpakpa ko nɛ sɛɛ he ní. E maa ye bua mo konɛ o na kaa pi mo pɛ nɛ e peeɔ mo jã. Baiblo ɔ de ke: ‘Huɛmɛ suɔ a he be tsuaa be, haomi be mi tete po a si we a sibi.’​—Abɛ 17:17.

Yehowa Mawu nɛ ji wa Bɔlɔ ɔ ji Huɛ nɛ pe kulaa nɛ o ma nyɛ ma ná. Moo sɔle nɛ o de Yehowa o nyagba amɛ tsuo ejakaa ‘lɛ nɛ e hyɛɛ o nɔ.’ (1 Petro 5:7) Mawu wo si kaa nihi nɛ a peeɔ jã a, “Mawu he jɔmi nɛ pã adesa juɛmi tsuo” ɔ maa to a tsui nɔ nine. (Filipi Bi 4:6, 7) Moo ngmɛ Mawu blɔ nɛ e ngɔ e Munyu nɛ woɔ nɔ bua a kɛ ye bua mo. Moo ngma ngmamihi nɛ woɔ nɔ bua a kɛ fɔ si. (Hyɛ daka nɛ ngɛ sisi ɔ.) O ma nyɛ maa ngɔ ngmami ɔmɛ ekomɛ kɛ wo o yi mi. Ke o nyɛ we nɛ o hwɔ mahe nyɔ mi po ɔ, jamɛ a ngmami ɔmɛ a he nɛ o ma susu ɔ maa ye bua mo.​—Yesaya 57:15.

Lingmi nɛ ɔ, nyumu ko nɛ e ye jeha 40 nɛ a tsɛɛ lɛ Jack yo ná kansa nɛ e gbo. Jack tsɔɔ kaa be komɛ ɔ, e hɛ jaa ngɛ e yo ɔ he wawɛɛ. Se e na kaa sɔlemi yeɔ bua lɛ. E de ke: “Ke i sɔle ɔ, e haa nɛ i naa kaa Yehowa piɛɛ ye he. Ke ye hɛ tsɛ nyɔ mi ɔ, i nyɛ we mahe hwɔmi hu. Ke e ba jã a, i kaneɔ bua womi munyuhi ngɛ Ngmami ɔ mi, nɛ i pueɔ ye yi mi tɛ ngɛ he. Lɔ ɔ se ɔ, i deɔ Yehowa nɔ́ nɛ ngɛ ye tsui mi. Ke i pee jã a, ye tsui nɔɔ ye mi, ye he mi jɔɔ mi, nɛ i nyɛɛ nɛ i hwɔɔ mahe saminya.”

Yiheyo ko nɛ a tsɛɛ lɛ Vanessa hu tsɔɔ bɔ nɛ sɔlemi ye bua lɛ ha. Vanessa yayo ba nu hiɔ nɛ e gbo. Vanessa de ke: “Ke i kɛ si fɔfɔɛhi nɛ a mi wa kpe ɔ, i tsɛɛ Mawu nɛ i foɔ ya. Yehowa buɔ mi tue, nɛ e haa mi he wami nɛ ma kɛ da haomi ɔ nya.”

Ga woli komɛ tsɔɔ kaa nihi nɛ a yeɔ aywilɛho wawɛɛ ɔ ma nyɛ maa ye bua ni kpahi loo a ngɔ a be kɛ ye bua nihi ngɛ a kpɔ ɔ mi konɛ a ná bua jɔmi. Enɛ ɔ ma ha nɛ aywilɛho ɔ nya maa ba si. (Bɔfo Ɔmɛ A Ní Tsumi 20:35) Kristofohi komɛ nɛ a suɔli gbo ɔ bɔ mɔde kaa a maa ye bua nihi mohu. Jã nɛ a pee ɔ wo a bua.​—2 Korinto Bi 1:3, 4.

Anɛ o huɛ ko suɔlɔ ko gbo, nɛ o li bɔ nɛ o maa pee ha kɛ wo e bua lo? Be komɛ ɔ, wa li nɔ́ nɛ wa ma de aloo nɔ́ nɛ wa maa pee kɛ ye bua nɔ ɔ. Ke e ba jã a, wa de we wa huɛ ɔ nɔ́ ko, nɛ wa pee we nɔ́ ko hu kɛ yi bua lɛ. Se ní komɛ ngɛ nɛ ma nyɛ maa ye bua mo ngɛ si fɔfɔɛhi kaa jã mi.

Behi fuu ɔ, nɔ́ nɛ he hia ji kaa o maa ya o huɛ ɔ ngɔ nɛ o de lɛ ke, “Ye nyɛmi, kpo mo.” Ngɛ ma komɛ hu a nɔ ɔ, a ma nyɛ maa fua nɔ ɔ, aloo a ma nyɛ maa ngɔ a nine kɛ fɔ e konɔ kɛ tsɔɔ kaa a susuɔ e he. Ke o huɛ ɔ ngɛ munyu tue ɔ, moo bu lɛ tue saminya. Nɔ́ nɛ he hia pe kulaa ji kaa o maa pee nɔ́ ko kɛ ye bua weku ɔ. Eko ɔ, o ma nyɛ maa ye bua mɛ kɛ ní hoomi, bimɛ tsɔwi a nɔ hyɛmi, aloo o ma nyɛ maa ye bua mɛ kɛ to ya a he blɔ nya. Níhi kaa jã a maa ye bua mɛ wawɛɛ po pe bua womi munyu nɛ o maa tu ɔ.

Ngɛ be nɛ sa mi ɔ, o ma nyɛ maa tu ní kpakpahi nɛ nɔ nɛ gbo ɔ pee benɛ e ngɛ je mi ɔ he munyu. Ní sɛɛmi kaa jã ma nyɛ ma ha nɛ nɔ nɛ e nɔ gbo ɔ bua maa jɔ. Kaa nɔ hyɛmi nɔ́ ɔ, Pam huno Ian gbo jeha ekpa ji nɛ ɔ. Pam de ke: “Nihi deɔ mi ní kpakpahi nɛ Ian pee nɛ imi nitsɛ po i li. Ke i nu níhi kaa jã a, e haa nɛ ye bua jɔɔ.”

Níhi a mi hlali tsɔɔ kaa behi fuu ɔ, ke nɔ ko suɔlɔ gbo ɔ, sisije ɔ, e huɛmɛ yeɔ bua lɛ wawɛɛ. Se ke be pue mi bɔɔ ɔ, kɛkɛ a hɛ je e nɔ kaa nɔ́ nɛ nɔ́ ko bɛ. Enɛ ɔ he ɔ, moo bɔ mɔde nɛ o pɔ nihi nɛ a nɔ gbo ɔ slaami.a Nihi nɛ a suɔli gbo nɛ a ngɛ aywilɛho yee loloolo ɔ bua maa jɔ he kaa nihi maa ya nɔ nɛ a wo a bua.

Yiheyo ko nɛ e ngɛ Japan nɛ a tsɛɛ lɛ ke Kaori ɔ ná enɛ ɔ mi níhi a si kpami. Benɛ e yayo gbo ɔ, maa pee jeha kake kɛ se nɛ e nyɛmiyo nɔkɔtɔma hu gbo. Enɛ ɔ ha nɛ e ye aywilɛho wawɛɛ. Se e huɛmɛ ya nɔ nɛ a ye bua lɛ. Yo nɔkɔtɔma ko nɛ a tsɛɛ lɛ ke Ritsuko de Kaori ke e suɔ nɛ e kɛ lɛ nɛ bɔ huɛ. Kaori de ke: “Ngɛ anɔkuale mi ɔ, jinɛ i sume nɛ i kɛ lɛ nɛ pee huɛ. I sume nɛ ma ngɔ nɔ kpa kɛ pee ye yayo. Se bɔ nɛ Mama Ritsuko pee mi ha a ha nɛ i ba suɔ e sane. Daa otsi ɔ, wa ya fiɛɛɔ Mawu Matsɛ Yemi ɔ he sane kpakpa a, nɛ wa yaa asafo mi kpe kɛ blaa. E tsɛ mi ní yemi ngɛ e we ɔ mi, e hoo ní kɛ ba ha mi, nɛ e ngma mi sɛ womihi hulɔ. Juɛmi kpakpa nɛ Mama Ritsuko ngɛ ɔ ye bua mi nitsɛ.”

Jeha nyɔngma kɛ enyɔ ji nɛ ɔ nɛ Kaori yayo gbo. Amlɔ nɛ ɔ, e kɛ e huno ngɔɔ a be tsuo kɛ fiɛɛɔ sane kpakpa a. Kaori de ke: “Loloolo ɔ, Mama Ritsuko jeɔ suɔmi kpo kɛ tsɔɔ mi. Be fɛɛ be nɛ ma ya we mi ɔ, i ya slaa lɛ nɛ e woɔ mi he wami.”

Yiheyo ko nɛ a tsɛɛ ke Poli hu tsɔɔ bɔ nɛ e huɛmɛ ye bua lɛ ha. Poli ji Yehowa Odasefo no ngɛ Cyprus. A tsɛɛ Poli huno ɔ ke Sozos. E ji Kristofo no nɛ e mi mi jɔ. E ngɔɔ yalɔyihi kɛ awusahi kɛ yaa e we mi nɛ a yeɔ ní, nɛ a jeɔ a hɛja. (Yakobo 1:27) Aywilɛho sane ji kaa benɛ Sozos ye jeha 53 ɔ, nɔ́ fu e yi mi nɛ e gbo. Poli de ke: “I kɛ ye huno ɔ hi si jeha 33.”

Benɛ a gbe ya a nya a, Poli kɛ e bi Daniel nɛ e ye jeha 15 ɔ hia kɛ ho Canada ya. Benɛ a ya su ɔ, a kɛ Yehowa Odasefohi a we asafo ko bɔni bɔmi ngɛ lejɛ ɔ. Poli de ke: “Huɛmɛ nɛ wa ya ná ngɛ asafo ehe nɛ ɔ mi ɔ li nyagbahi nɛ waa kɛ kpe ɔ he nɔ́ ko. Se nyɛmimɛ nɛ ɔmɛ ya nɔ nɛ a wo wa bua nɛ a ye bua wɔ ngɛ blɔhi fuu a nɔ. Wa bua jɔ yemi kɛ buami nɛ ɔ he wawɛɛ, titli ye bi ɔ, ejakaa e hɛ ja ngɛ e papaa he wawɛɛ! Asafo mi nikɔtɔma amɛ hu ye bua ye bi Daniel wawɛɛ, a ngɔ lɛ kaa a bi. Nikɔtɔma amɛ a kpɛti nɔ kake kɛ Daniel pɔɔ kpo jemi, e kɛ lɛ piɛɛɔ e he kɛ ya fiaa bɔɔlu po.” Mwɔnɛ ɔ, Poli kɛ e bi Daniel ngɛ bua jɔmi nitsɛ.

Blɔhi fuu ngɛ nɛ wa ma nyɛ maa gu nɔ kɛ ye bua nihi nɛ a ngɛ aywilɛho yee ɔ. Baiblo ɔ mi munyu ɔmɛ hu woɔ wa bua, nɛ e haa nɛ wa náa hɛ nɔ kami kaa si himi ɔ maa pee kpakpa hwɔɔ se.

O ma kai kaa Gail nɛ a tu e he munyu kɛ sɛ hlami ɔ de ke e be nyɛe nɛ e kpa e huno Rob gbenɔ ɔ he aywilɛho yemi gblegbleegble. Se kɛ̃ ɔ, e ngɛ blɔ hyɛe kaa e maa na lɛ ekohu ngɛ je ehe nɛ Mawu wo he si ɔ mi. Gail de ke: “Ngmami nɛ i bua jɔ he wawɛɛ ji Kpojemi 21:3, 4.” Ngmami ɔ de ke: “Mawu nitsɛ kɛ mɛ maa hi si, nɛ e maa pee a Mawu. Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ a se po.”

Gail de ke: “Si womi nɛ ɔ ha nɛ nɔ́ fɛɛ nɔ́ mi tɛ̃ ha mi. Nihi nɛ a suɔli gbo nɛ a be hɛ nɔ kami kaa a maa na a suɔli ɔmɛ ekohu ɔ a he peeɔ mi mɔbɔ wawɛɛ.” Akɛnɛ Gail ngɛ hemi kɛ yemi he je ɔ, e fiɛɛ gbogboehi a si temi ɔ he hɛ nɔ kami ɔ kɛ tsɔɔ e kpɔ mi bi ɔmɛ. E tsɔɔ mɛ kaa be maa ba nɛ “nɔ ko be gboe hu.”

Eko ɔ, o ma bi ke, niinɛ lo? Se mo susu nyumu ko nɛ a tsɛɛ lɛ Hiob ɔ he nɛ o hyɛ. Hiob ba nu hiɔ wawɛɛ. (Hiob 2:7) Hiob ná nɛ e gbo, se loloolo ɔ, e ngɛ hemi kɛ yemi kaa Mawu ma tle ni gbogboehi si kɛ ba wami mi. E kɛ kã de ke: “I na nɛ o ngɔ mi ya laa ngɛ gbeje . . . O ma tsɛ mi, nɛ ma he nɔ, nɛ o ma na imi, nɔmlɔ nɛ o bɔ ɔ, ye he bua jɔmi.” (Hiob 14:13, 15) Hiob ngɛ hɛ kɛ nɔ fɔmi kaa Mawu hɛ ma ja ngɛ e he, nɛ e ma tle lɛ si kɛ ba wami mi ekohu.

E be kɛe nɛ Mawu ma tle Hiob kɛ ni kpahi nɛ a gbo ɔ si kɛ ba wami mi ekohu ngɛ paradeiso ɔ mi. (Luka 23:42, 43) Baiblo ɔ de ngɛ Bɔfo Ɔmɛ A Ní Tsumi 24:15 ke: “Adesahi tsuo maa te si kɛ je gbeje hwɔɔ se.” Yesu de ke, “Nyɛ hɛ mi kó pee nyɛ yaa kaa be maa su nɛ gbogboehi tsuo maa nu Mawu Bi ɔ gbi, nɛ a maa je kpo kɛ je a yɔkɔ ɔmɛ a mi.” (Yohane 5:28, 29) Hiob maa na si womi nɛ ɔ kɛ e hɛngmɛ. E le kaa hwɔɔ se ko ɔ, “e ma tsake maa pee niheyo ekohu, nɛ e he womi nɔ maa pee tlotlootlo kaa jokuɛyo he womi.” (Hiob 33:24, 25) Mawu ma ha nɛ nihi nɛ a buɔ lɛ tue mwɔnɛ ɔ hu maa na a suɔli nɛ a gbo ɔ.

Ke o suɔlɔ ko gbo ɔ, munyu nɛ wa susu he kɛ sɛ hlami ɔ be hae nɛ o kpa aywilɛho yemi. Se ke o susu Mawu si womihi nɛ ngɛ Baiblo ɔ mi ɔ a he ɔ, o maa na bua womi munyuhi nɛ maa ye bua mo konɛ o da haomi ɔ nya.​—1 Tesalonika Bi 4:13.

Anɛ o suɔ kaa o maa le ní kpahi nɛ maa ye bua nɔ ko nɛ e suɔlɔ gbo lo? Anɛ o ngɛ sane bimi ko kaa “Mɛni he je nɛ Mawu ngmɛ yayami kɛ nɔ́ nami blɔ” heto hlae lo? Lɛɛ wa kpa mo pɛɛ nɛ o ya Intanɛti ɔ nɔ ngɛ jw.org konɛ o na ga womi kpakpahi, kɛ bua womi munyuhi nɛ ngɛ Baiblo ɔ mi ɔ.