Wa naa munyu nɛ ɔmɛ ngɛ Sane Kpakpa eywiɛ nɛ ngɛ Kristofohi A Hela Ngmami nɛ a pɔɔ lɛ tsɛmi ke Somi He ɔ mi. Anɛ sane nɛ ɔmɛ ya nɔ niinɛ lo? E ji sane bimi nɛ he hia wawɛɛ. Ke ní nɛ ɔmɛ yɛ nɔ niinɛ ɔ, lɛɛ hemi kɛ yemi nɛ anɔkuale Kristofohi ngɛ kaa a maa hi si ngɛ Paradeiso kɛ ya neneene ɔ ji nlami. (1 Korinto Bi 15:14) Se ke ní nɛ ɔmɛ ya nɔ niinɛ ɔ, lɛɛ adesahi tsuo ngɛ hwɔɔ se he hɛ nɔ kami kpakpa, nɛ mo hu o ma nyɛ ma ná eko. Lɔ ɔ he ɔ, anɛ Sane Kpakpa amɛ a mi munyu ɔmɛ ji anɔkuale aloo nyazia?

ODASE NƐ NGƐ

Sane Kpakpa a mi munyu ɔmɛ pí nyazia, mohu ɔ, a ji níhi nɛ ya nɔ nitsɛnitsɛ nɛ́ nihi to a tsui si kɛ ngma fitsofitso. Kaa nɔ hyɛmi nɔ́ ɔ, a tu ma slɔɔtohi a he munyu. Mwɔnɛ ɔ po ɔ, wa ma nyɛ ma ya slaa si ngɛ ma nɛ ɔmɛ ekomɛ a nɔ. Yi nɔ sane ngmali ma nɔ mi kaa nihi nɛ a ngma Sane Kpakpa a ji nihi nɛ a hi si nitsɛnitsɛ.​—Luka 3:1, 2, 23.

Yi nɔ sane ngmali nɛ a hi si ngɛ Yesu be ɔ mi, kɛ nihi nɛ a hi si ngɛ e gbenɔ se ɔ po ngma Yesu he sane.a Kaa bɔ nɛ Sane Kpakpa ngmali ɔmɛ tsɔɔ mi ɔ, blɔ nɔ nɛ Roma bi ɔmɛ gblaa nihi a tue ɔ kɛ bɔ nɛ a pee Yesu ɔ kɔ. Jehanɛ hu ɔ, a ngma níhi nɛ ya nɔ ɔ pɛpɛɛpɛ. A tu Yesu kaseli ɔmɛ a gbɔjɔmi komɛ po he munyu. (Mateo 26:56; Luka 22:24-26; Yohane 18:10, 11) Oti nɛ ɔmɛ tsuo tsɔɔ kaa níhi nɛ Sane Kpakpa ngmali ɔmɛ ngma ngɛ Yesu he ɔ ji anɔkuale.

NƐ YESU SI TEMI Ɔ HU NƐƐ?

Nihi fuu kplɛɛ nɔ kaa Yesu ba hi si kaa adesa nɛ e gbo, se ni komɛ he we yi kaa a tle Yesu si. Benɛ Yesu kaseli ɔmɛ nu kaa Yesu te si ɔ, sisije ɔ, a he we yi. (Luka 24:11) Se benɛ Yesu je e he kpo kɛ tsɔɔ mɛ ngɛ si fɔfɔɛ slɔɔtohi a mi ɔ, a he ye. Be ko po ɔ, nihi 500 kɛ a hɛngmɛ na Yesu nɛ a tle lɛ si ɔ.​—1 Korinto Bi 15:6.

Yesu kaseli ɔmɛ kɛ kã tu Yesu si temi ɔ he munyu kɛ tsɔɔ nihi fuu. A tu Yesu he munyu kɛ tsɔɔ nihi nɛ a gbe lɛ ɔ po. (Bɔfo Ɔmɛ A Ní Tsumi 4:1-3, 10, 19, 20; 5:27-32) Yesu kaseli fuu kɛ kã tu Yesu he munyu kɛ tsɔɔ ni kpahi. Ke kaseli nɛ ɔmɛ be nɔ mi mami kaa a tle Yesu si niinɛ ɔ, jinɛ a ma nyɛ maa fiɛɛ kaa a tle Yesu si lo? Ngɛ anɔkuale mi ɔ, Yesu si temi ɔ ji nɔ́ titli nɛ ha nɛ Kristofohi a jami ɔ he si ngɛ je ɔ mi tsuo.

Yesu gbenɔ kɛ e si temi ɔ nɛ a ngma ngɛ Sane Kpakpa amɛ a mi ɔ ji odase nɛ tsɔɔ kaa munyu nɛ ɔ ji anɔkuale. Ke o to o tsui si kɛ kane munyu nɛ ɔmɛ ɔ, e ma ha nɛ o ma he ye kaa ní nɛ ɔmɛ ya nɔ niinɛ. Ke o le nɔ́ he je nɛ ní nɛ ɔmɛ ya nɔ ɔ, e ma ha nɛ o hemi kɛ yemi ɔ mi maa wa. Munyu nɛ nyɛɛ se ɔ maa tsɔɔ mi.

Anɛ o suɔ nɛ o hi si daa lo? Eko ɔ, nihi fuu ma ha heto ke ee, se a susuɔ hu kaa e be hie. A deɔ ke a bɔ gbenɔ kɛ to wa he.

Se ngɔɔ lɛ kaa a bi mo ke, “Anɛ o suɔ nɛ o gbo lo?” Behi fuu ɔ, nihi haa heto ke, dɛbi. Mɛni he je? Ngɛ nyagbahi kɛ haomihi nɛ waa kɛ ngɛ kpee ɔ tsuo se ɔ, wa suɔ nɛ waa hi wami mi. Baiblo ɔ tsɔɔ kaa Mawu bɔ adesahi kaa a hi si kɛ ya neneene. Baiblo ɔ de ke: ‘E ngɔ neneene si himi kɛ wo a tsui mi.’​—Fiɛlɔ 3:11.

Se ngɛ anɔkuale mi ɔ, adesa wami se kɛ we kulaa. Kɛ e ba lɛ kɛɛ? Anɛ Mawu pee nɔ́ ko konɛ e kɛ po nɔ́ nami kɛ gbenɔ se lo? Baiblo ɔ tsɔɔ nɔ́ he je nɛ Yesu na nɔ́ nɛ e gbo ɔ. Nɔ́ nɛ Baiblo ɔ de ɔ ngɛ bua jɔmi.

KƐ E BA LƐ KƐƐ?

Mose kekleekle womi ɔ yi kake kɛ ya si yi etɛ ɔ ha nɛ wa le kaa Mawu ha Adam kɛ Hawa neneene wami he hɛ nɔ kami, nɛ e tsɔɔ mɛ nɔ́ nɛ e sa nɛ a pee konɛ a nyɛ nɛ a hi wami mi. Lɔ ɔ se ɔ, Baiblo ɔ tsɔɔ bɔ nɛ a gbo Mawu nɔ tue ha, nɛ lɔ ɔ ha he blɔ nɛ ɔ je a dɛ ɔ. Akɛnɛ pi nɔ́ fɛɛ nɔ́ nɛ Baiblo ɔ tu he munyu fitsofitso he je ɔ, ni komɛ susuɔ kaa e ji nyazia kɛkɛ. Se kaa bɔ nɛ e ji ngɛ Sane Kpakpa amɛ a mi ɔ, Mose kekleekle womi ɔ mi munyu ɔmɛ hu ji anɔkuale.a

Mɛni je Adam tue gbomi ɔ mi kɛ ba? Baiblo ɔ ha heto ke: “Nɔ kake lɛ pee yayami, nɛ yayami kɛ gbenɔ ba. Enɛ ɔ ha gbenɔ sã nimli tsuo, ejakaa nɔ tsuaa nɔ pee yayami.” (Roma Bi 5:12) Adam pee yayami kɛ si Mawu. Enɛ ɔ he ɔ, neneene wami he hɛ nɔ kami nɛ e ngɛ ɔ bɔ lɛ, nɛ nyagbenyagbe ɔ, e gbo. Akɛnɛ wa ji e sisi bimɛ he je ɔ, e ngɔ yayami kɛ fɔ wɔ. Lɔ ɔ he ɔ, wa nuɔ hiɔ, wa bwɔɔ, nɛ wa gboɔ. Kaa bɔ nɛ fɔli kɛ su komɛ fɔɔ a bimɛ ɔ, jã nɔuu nɛ Adam hu ngɔ gbenɔ kɛ yayami kɛ fɔ wɔ. Se anɛ Mawu pee nɔ́ ko ngɛ nyagba nɛ ɔ he lo?

NƆ́ NƐ MAWU PEE

Niinɛ, Mawu to blɔ nya konɛ e kpale ngɔ neneene wami he hɛ nɔ kami nɛ je Adam dɛ ɔ kɛ ha e sisi bimɛ. Mɛni blɔ nɔ nɛ Mawu gu kɛ tsu sane nɛ ɔ he ní?

Roma Bi 6:23 ɔ de ke: “Yayami he hiɔwo ji gbenɔ.” Enɛ ɔ tsɔɔ kaa yayami ngɔ gbenɔ kɛ ba. Adam tɔmi ɔ he je nɛ e gbo ɔ nɛ. Akɛnɛ wɔ hu wa pee yayami he je ɔ, wa be nyɛe maa tu gbenɔ nya fo. E ngɛ mi kaa a fɔ wɔ ngɛ yayami mi mohu lɛɛ, se pi wɔ nɛ wa ha nɛ e ba jã. Lɔ ɔ he ɔ, Mawu je e suɔmi mi nɛ e ngɔ e Bi, nɛ ji Yesu kɛ ha, konɛ e kɛ wo wa ‘yayami ɔmɛ a he hiɔ.’ Mɛni blɔ nɔ e gu kɛ pee jã?

Nɔmlɔ kake nɛ ye mluku nɛ ji Adam tue gbomi ɔ lɛ ha nɛ yayami kɛ gbenɔ sã adesahi tsuo. Enɛ ɔ he ɔ, ja nɔmlɔ kake nɛ ye mluku bu Mawu tue kɛ ya su gbenɔ mi loko a ma nyɛ ma kpɔ wɔ kɛ je yayami kɛ gbenɔ dɛ mi. Baiblo ɔ tsɔɔ nya kaa: “Kaa bɔ nɛ nihi babauu ba pee yayami peeli ngɛ nɔ kake tue gbomi he ɔ, jã kɛ̃ Yesu Kristo nɔ kake e tue nɛ e bu ɔ he ɔ, Mawu maa bu nihi tsuo dali.” (Roma Bi 5:19) “Nɔ kake” ɔ nɛ a tu e he munyu ɔ ji Yesu. E je hiɔwe kɛ ba zugba a nɔ kaa adesa nɛ ye mlukub, nɛ e ba gbo kɛ ha wɔ. Jã nɛ e pee ɔ bli blɔ kɛ ha wɔ konɛ huɛ bɔmi kpakpa nɛ hi waa kɛ Mawu wa kpɛti, nɛ wa ná neneene wami hwɔɔ se.

NƆ́ HE JE NƐ YESU NA NƆ́, NƐ E GBO

Mɛni he je nɛ e he ba hia nɛ Yesu nɛ gbo kɛ kpɔ wɔ ɔ? Tse jinɛ Mawu Ope ɔ ma nyɛ ma fã kaa Adam sisi bimɛ nɛ a hi si daa nɛ e he be hiae kaa Yesu nɛ gbo? Ngɛ anɔkuale mi ɔ, Mawu ma nyɛ maa pee jã. Se ke e pee jã a, lɔ ɔ maa tsɔɔ kaa e kɛ mlaa nɛ lɛ nitsɛ e wo kaa yayami he hiɔwo ji gbenɔ ɔ tsu we ní. Mlaa nɛ ɔ, pi mlaa ko nɛ e ma nyɛ ma tsake kɛkɛ. Mawu yeɔ anɔkuale, lɔ ɔ he ɔ, e sa nɛ e ye jamɛ a mlaa a nɔ.​—La 37:28.

Kaa Mawu yi dami sane ngɛ si fɔfɔɛ nɛ ɔ mi ɔ, jinɛ nihi ma susu kaa e be dami sane yee ngɛ ní kpahi hu a mi. Kaa nɔ hyɛmi nɔ́ ɔ, anɛ Mawu kɛ anɔkuale yemi ma nyɛ maa tsɔɔ Adam sisi bimɛ nɛ e sa kaa a ná neneene wami lo? Ke o hyɛ ɔ, wa ma nyɛ ma ná nɔ mi mami ngɛ Mawu mi kaa e maa ye e si womi ɔmɛ a nɔ lo? Mawu ye dami sane konɛ e kɛ he wa yi wami. Enɛ ɔ haa wa naa kaa e maa pee nɔ́ nɛ da be fɛɛ be.

Mawu gu Yesu wami nɛ e kɛ sã afɔle ɔ nɔ kɛ bli blɔ kɛ ha wɔ konɛ waa hi si kɛ ya neneene ngɛ Paradeiso mi ngɛ zugba a nɔ. Yesu de ngɛ Yohane 3:16 ke: “Mawu suɔ je ɔ saminya, nɛ e ngɔ e Bi kake ɔ ngɔ ha, konɛ nɔ tsuaa nɔ nɛ heɔ lɛ yeɔ ɔ, e hɛ mi ko kpata, se mohu e na neneene wami.” Yesu gbenɔ ɔ ha nɛ wa na kaa Mawu yeɔ dami sane. Jehanɛ hu ɔ, e haa nɛ wa naa kaa Mawu suɔ adesahi wawɛɛ.

Se kɛ̃ ɔ, mɛni he je nɛ e he ba hia nɛ Yesu nɛ na nɔ́ nɛ e gbo kaa bɔ nɛ a tu he munyu ngɛ Sane Kpakpa amɛ a mi ɔ? Abosiami de kaa ke adesahi kɛ ka nɛ nya wa ko kpe ɔ, a be Mawu anɔkuale yee. Se anɔkuale nɛ Yesu ye ngɛ kahi nɛ e kɛ kpe ɔ mi ɔ tsɔɔ kaa Abosiami nya pomi ɔ ji lakpa. (Hiob 2:4, 5) Eko ɔ, akɛnɛ Abosiami sisi Adam nɛ e gbo Mawu nɔ tue he je ɔ, nɔ ko ma susu kaa nɔ́ nɛ Abosiami de ɔ ji anɔkuale. Yesu kɛ Adam tsuo ye mluku, se ngɛ kahi nɛ Yesu kɛ kpe ɔ tsuo se ɔ, e ye Mawu anɔkuale. (1 Korinto Bi 15:45) Anɔkuale nɛ Yesu ye kɛ pi si ɔ tsɔɔ kaa jinɛ Adam hu ma nyɛ maa pee Mawu suɔmi nya ní. Yesu pee jã kɛ pee nɔ hyɛmi nɔ́ kɛ ha wɔ konɛ waa kase. (1 Petro 2:21) Mawu dloo Yesu mumi mi nɔmlɔ tso nɛ gbo we kɛ tsɔɔ kaa e bua jɔ anɔkuale nɛ e ye ɔ he.

BƆ NƐ O MA NÁ HE SE HA

Yesu gbenɔ ɔ ji nɔ́ ko nɛ ya nɔ nitsɛnitsɛ, nɛ lɔ ɔ bli blɔ ha wɔ konɛ waa hi si kɛ ya neneene. Anɛ o suɔ nɛ o hi si kɛ ya neneene lo? Yesu tsɔɔ nɔ́ nɛ e sa nɛ waa pee. E de ke: “Ke a na le kaa mo ji anɔkuale Mawu ɔ, nɛ a le Yesu Kristo, nɔ nɛ o tsɔ ɔ, a ma ná neneene wami.”​—Yohane 17:3.

Nimli nɛ a pee womi tɛtlɛɛ nɛ ɔ ngɛ mo nine fɔe nɛ o kase Yehowa nɛ ji anɔkuale Mawu ɔ, kɛ e Bi Yesu Kristo he ní babauu. Yehowa Odasefohi nɛ a ngɛ o kpɔ ɔ mi ɔ maa suɔ kaa a maa ye bua mo. O maa na munyu kpahi nɛ maa ye bua mo ngɛ wa wɛbsaiti ɔ nɔ ngɛ www.jw.org/ada.