Tatu Nya He Kpa a

Loko lohwe tsɔwihi ma nya ma te, a kuɔ nɔ́ aloo a nu nɔ́ he saminya a, ja a he tsɔ. Kaa nɔ hyɛmi nɔ́ ɔ, ke tatuhi a nya he kpa a he sɛ mu ɔ, a be nyɛe nɛ a nyɛɛ saminya, nɛ ke nɔ́ ngɛ fu jee loo e ngɛ via jee ɔ, a be nue kpakpa ko, nɛ a kɛ a sibi be nyɛe maa sɛɛ ní. Nyumu ko nɛ e kase ɔ lohwehi a he ní nɛ a tsɛɛ lɛ ke Alexander Hackman de ke, o be lohwe tsɔwihi nae nɛ a he sɛ mu kɔkɔɔkɔ. Ke he ko nɛ a ngɛ ɔ sɛ mu ɔ, a le bɔ nɛ a peeɔ ha kɛ daa nya.

Mo Susu He Nɛ O Hyɛ: Hackman kɛ nihi nɛ a piɛɛ e he ɔ bɔ mɔde kaa a maa kase blɔ nɔ nɛ tatu he nɔ ko nɛ a tsɛɛ lɛ ke Camponotus rufifemur guɔ ɔ kɛ tsuɔ ɔ e nya he kpa a he ha. Níhi a mi hlami nɛ a pee tsɔɔ kaa ke tatu nɛ ɔ ma je mu slɔɔtohi ngɛ e nya he kpa a he ɔ, e kɔɔ e nane ɔ mi nɛ e kɛ e nya he kpa a woɔ kpɛ kɛkɛ e gbla e nya he kpa a. Bwɔmi nɛ a ti ɔmɛ jeɔ muhi nɛ a kle ɔmɛ. Lɔ ɔ se ɔ, bwɔmihi nɛ a ti we, nɛ blɔ nɛ ngɛ a kpɛ ɔ ngɛ kaa bwɔmihi nɛ ngɛ e nya he kpa a he ɔ timi ɔ jeɔ muhi nɛ a kle we kpakpa ko ɔ. Nyagbe ɔ, bwɔmi tsɔwitsɔwi nɛ a ngɛ e nane he ɔ jeɔ muhi nɛ a kle we kulaa nɛ adesa be nyɛe maa na amɛ.

Moo hyɛ tatu nɛ ngɛ e nya he kpa a he tsue

Hackman kɛ nihi nɛ a piɛɛ e he ɔ he ye kaa blɔ nɔ nɛ tatuhi guɔ nɛ a haa nɛ a nya he kpa a he tsɔ ɔ ma nyɛ maa ye bua ngɛ níhi a peemi he. Kaa nɔ hyɛmi nɔ ɔ, a ma nyɛ maa gu blɔ nɛ ɔ nɔuu nɔ ke a ngɛ klamahi nɛ a kɛ oslabai he wami tsuɔ ní nɛ ke nɔ́ ko sa a he nɛ a ma nyɛ maa pue kɛ níhi nɛ oslabai he wami gbleɔ a mi pee ɔ konɛ a he nɛ tsɔ ejakaa ke mu nyafii ko sɛ a he ɔ, e ma nyɛ ma pue mɛ.

Kɛ o susu kɛɛ: Anɛ blɔ nɔ nɛ tatu guɔ kɛ tsuɔ e nya he kpa a he saminya ha a ba gu aloo nɔ ko lɛ bɔ?