Mo Tsɔse O Bimɛ Ɔmɛ Nɛ A Ba Plɛ Mawu Sɔmɔli
1. Mɛni ji nɔ́ nɛ La 148:12, 13 ɔ woɔ fɔli nɛ a ji Kristofoli he wami kaa a pee?
1 Yehowa de nihewi kɛ yihewi kaa a je e yi. (La 148:12, 13) Enɛ ɔ he ɔ, pi Baiblo ɔ mi anɔkualehi kɛ je mi bami he mlaahi nɛ Mawu wo ɔ pɛ kɛkɛ nɛ fɔli nɛ a ji Kristofoli ɔ tsɔɔ a bimɛ. A tsɔseɔ a bimɛ ɔmɛ konɛ a ba plɛ sane kpakpa a fiɛɛli hulɔ. Mɛni blɔ nɔ a maa gu kɛ pee enɛ ɔ bɔɔbɔɔbɔɔ?
2. Mɛni blɔ nɔ lɛ nɔ hyɛmi nɔ́ kpakpa nɛ fɔlɔ ko maa pee ɔ maa ye bua e bimɛ ngɛ?
2 Nɔ Hyɛmi Nɔ́ Kpakpa: Manyadalɔ Gideon de nyumuhi 300 nɛ piɛɛ e he ɔ ke: “Nyɛɛ hyɛ mi.” (Many. 7:17) Jokuɛwi hyɛɛ a fɔli nɛ a kaseɔ mɛ. Tsɛ ko tsuɔ ní nyɔ mi, se ke e kpa kɛ ba we mi Hɔ mɔtu nɛ pɔ tɔ e he nɛ e sa nɛ e hwɔ si ɔ, e kɛ e bimɛ ɔmɛ yaa fiɛɛmi mohu. E ngɛ mi kaa e kɛ e nya de we mohu lɛɛ, se e ngɔ e ní peepee ɔ kɛ ngɛ e bimɛ ɔmɛ dee kaa fiɛɛmi nítsumi ɔ he hia wawɛɛ. (Mat. 6:33) Anɛ o bimɛ ɔmɛ naa kaa o ngɔɔ o he kɛ woɔ Mawu jami mi ní peemi slɔɔto ɔmɛ nɛ ekomɛ ji, sɔlemi, Baiblo ɔ kanemi, munyu heto hami ngɛ nikasemi, kɛ fiɛɛmi yami ɔ mi lo? Ngɛ anɔkuale mi ɔ, nyɛ be nyɛe maa pee nɔ hyɛmi nɔ́ nɛ ye mluku kɛ ha nyɛ bimɛ ɔmɛ mohu lɛɛ, se ke nyɛ bimɛ ɔmɛ na kaa nyɛ sɔmɔɔ Yehowa kɛ kã a, lɔɔ ma ha nɛ mɛ hu a maa pee jã.—5 Mose 6:6, 7; Rom. 2:21, 22.
3. Mɛni Mawu jami mi otihi nɛ́ jokuɛwi ma nyɛ maa su a he bɔɔbɔɔbɔɔ lɛ e sa kaa fɔli nɛ a kɛ ma a bimɛ ɔmɛ a hɛ mi nɛ a ye bua mɛ nɛ a su he?
3 Otihi Nɛ A Ma Nyɛ Maa Su A He Bɔɔbɔɔbɔɔ: Fɔli gboɔ dengme kɛ tsɔɔ a bimɛ nyɛɛmi, kɛ munyu tumi, kɛ he dlami, kɛ ní kpahi. Ke jokuɛwi ɔmɛ wa kɛ su he ko ɔ, fɔli ɔmɛ ngɔɔ oti ehehi kɛ maa a bimɛ ɔmɛ a hɛ mi. Ke fɔli ɔmɛ ji Kristofoli ɔ, a daa jeha nɛ a bimɛ ɔmɛ ye ɔ nɔ nɛ a yeɔ bua mɛ konɛ a ngɔ Mawu jami mi otihi hu kɛ ma a hɛ mi. (1 Kor. 9:26) Anɛ o ngɛ o bimɛ ɔmɛ ye buae konɛ a da bɔnɛ a nu níhi a sisi ha a nɔ kɛ ha sanehi a heto, nɛ́ mɛ nitsɛmɛ nɛ a to nítsumi nɛ a ná ngɛ Teokrase Sɔmɔmi Sukuu ɔ mi ɔ he blɔ nya lo? (La 35:18) Anɛ o ngɛ mɛ tsɔsee konɛ a nyɛ nɛ a ngɔ a he kɛ wo sɔmɔmi nítsumi ɔ mimi slɔɔto ɔmɛ a mi lo? Anɛ o ha nɛ a ngɔ baptisimi kɛ be tsuo sɔmɔmi nítsumi ɔ kɛ ma a hɛ mi lo? Anɛ o haa nɛ a kɛ nihi nɛ a tsuɔ fiɛɛmi nítsumi ɔ kɛ bua jɔmi nɛ a ma nyɛ maa wo mɛ he wami ɔ bɔɔ lo?—Abɛ 13:20.
4. Ke fɔli je sisi nɛ a tsɔse a bimɛ kɛ je a jokuɛwi a si konɛ a ba plɛ Mawu sɔmɔli ɔ, kɛ jokuɛwi ɔmɛ náa he se ha kɛɛ?
4 La polɔ ɔ de ke: “Mawu, kɛ je ye nihe mi tɔ̃ɔ nɛ o tsɔɔ mi ní, nɛ amlɔ nɛ ɔ hu i ngɛ o nyakpɛ nítsumi ɔmɛ a he odase yee.” (La 71:17) Moo je sisi nɛ o tsɔse o bimɛ ɔmɛ kɛ je a jokuɛwi a si konɛ a ba plɛ Mawu sɔmɔli. Bɔ tsuaa bɔ nɛ ji ɔ, a ma ná Mawu jami mi tsɔsemi nɛ o kɛ ngɛ mɛ hae ɔ he se kɛ ya si a wami si!—Abɛ 22:6.