Blema Kɔkɔ Bɔmi Ko

Yehowa be kplɛɛe nɛ nimli yayamihi nɛ́ puɛ Paradeiso ɔ. E huɛmɛ pɛ nɛ a maa hi lejɛ ɔ. Mɛni maa ba yayami peeli a nɔ? Bɔnɛ pee nɛ waa le heto ɔ, ha nɛ wa susu Noa he sane ɔ nɛ́ ba mi nitsɛ ɔ he. Noa hi si jeha akpehi abɔ nɛ be. E ji nɔmlɔ kpakpa nɛ́ bɔɔ mɔde kaa e pee Yehowa suɔmi nya ní. Se ni kpahi nɛ ngɛ zugba a nɔ ɔ peeɔ ní yayamihi. Enɛ ɔ heje ɔ, Yehowa de Noa ke E ma ha nyu afua ma ba kpata nimli yayami ɔmɛ tsuo a hɛ mi. E de Noa ke e kpɛ lɛ konɛ ke Nyu Afua a ba a, e kɛ baa e kɛ weku ɔ yi konɛ a ko gbo.—1 Mose 6:9-18.

Noa kɛ e weku ɔ kpɛ lɛ ɔ. Noa bɔ nihi kɔkɔ kaa Nyu Afua a ma, se a bui lɛ tue. A ya nɔ nɛ a pee ní yayamihi. Benɛ a kpɛ lɛ ɔ ta a, Noa ngɔ lohwehi kɛ wo mi, nɛ e kɛ e weku ɔ hu ya sɛ lɛ ɔ mi. Kɛkɛ nɛ Yehowa ha hiɔmi nɛ wawɛɛ. Hiɔmi ɔ nɛ nyɔnyɔɔnyɔ kɛ piapiaapia ligbi 40. Nyu babauu ha zugba a nɔ tsuo.—1 Mose 7:7-12.

Nimli yayami ɔmɛ a hɛ mi kpata, se a baa Noa kɛ e weku ɔ yi. Yehowa kpaka mɛ kɛ gu Nyu Afua a mi kɛ ba zugba nɛ a je yayami peeli kɛ je nɔ ɔ nɔ. (1 Mose 7:22, 23) Baiblo ɔ de ke be maa ba nɛ́ Yehowa ma kpata nihi nɛ́ kua nɔ́ dadɛ peemi ɔ a hɛ mi. A be nimli kpakpahi a hɛ mi kpatae. A maa hi si ngɛ Paradeiso zugba a nɔ kɛ ya neneene.—2 Petro 2:5, 6, 9.

Mwɔnɛ ɔ, nihi fuu peeɔ ní yayamihi. Haomihi hyi je ɔ mi tɔ. Yehowa tsɔ e we Odasefoli ɔmɛ nɛ a ngɛ nimli kɔkɔ bɔe si abɔ, se a ti nihi babauu sume kaa a maa bu Yehowa munyu tue. A sume kaa a ma tsake a jemiba. A sume nɛ a kplɛɛ nɔ́ nɛ Mawu de kɛ kɔ nɔ́ dadɛ kɛ nɔ́ nɛ́ dɛ ɔ hu he ɔ nɔ. Mɛni maa ba nimli nɛ ɔmɛ a nɔ? Anɛ a ma tsake ligbi ko lo? A ti nihi fuu be tsakee gblegbleegble. Be ɔ ma nɛ a ma kpata nimli yayamihi a hɛ mi nɛ a be si hie hu.—La 92:7.

A be zugba a hɛ mi kpatae; a ma tsake lɛ kɛ pee paradeiso. Nihi nɛ maa pee Mawu huɛmɛ maa hi Paradeiso zugba a nɔ kɛ ya neneene.—La 37:29.