Anɛ Kikɛ Ji Mawu Yi Mi Tomi Lo?

MOO kane adafi fiami womi saisaa ko. Hyɛ tiivi, aloo bu hleedio tue. O maa na, loo o maa nu yi wu tso ní peepeehi, ta, kɛ awi yemi he amaniɛ bɔmihi fuu! Mo susu mo nitsɛ o haomihi a he nɛ o hyɛ. Eko ɔ, hiɔ aloo o suɔlɔ ko gbenɔ ha nɛ o hao wawɛɛ. Eko ɔ, o sane ɔ ngɛ kaa anɔkualetsɛ Hiob nɔ́ ɔ. E de ke, “haomi kɛ zo ha we nɛ ma nyɛ ma wo ye yi nɔ.”—Hiob 10:15.

Mo bi o he ke:

Anɛ kikɛ ji bɔ nɛ Mawu to ha imi kɛ adesahi tsuo lo?
Jije ma ná yemi kɛ buami kɛ je nɛ ma kɛ da ye haomi ɔmɛ a nya?
Anɛ hɛ nɔ kami ko ngɛ kaa tue mi jɔmi maa ba zugba a nɔ ligbi ko lo?

Sane bimi nɛ ɔmɛ a hetohi nɛ woɔ nɔ bua ngɛ Baiblo ɔ mi.

BAIBLO Ɔ TSƆƆ KAA MAWU MAA NGƆ TSAKEMI NƐ ƆMƐ KƐ BA ZUGBA A NƆ.

“Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu.”—Kpojemi 21:4

‘Obubuafohi maa tuu kaa odabɔ loo afugbɛ.’—Yesaya 35:6

“Hɛ yuyuili maa hyɛ nɔ́ ekohu.”—Yesaya 35:5

‘Nihi tsuo nɛ ngɛ yɔkɔ ɔmɛ a mi ɔ maa . . . je kpo.’—Yohane 5:28, 29

“Nihi nɛ ngɛ zugba a nɔ ɔ, a ti nɔ ko nɔ ko be dee hu ke, ‘I be he wami.’”—Yesaya 33:24

‘Zugba a maa ba ní saminya, nɛ a ma ná blɛfo babauu.’—La 72:16

Zugba a ba pee kaa bɔ nɛ Mawu to ɔ: Nihi nɛ a bwɔ maa pee nihewi kɛ yihewi, a ma tsa hiɔtsɛmɛ, nɛ hɛ yuyuili a hɛngmɛ ma bli, a ma tle gbogboehi a si, niye ní babauu maa ba

MO NÁ NƆ́ NƐ BAIBLO Ɔ TSƆƆ Ɔ HE SE

O kɛ oya yemi nɛ ko kua níhi nɛ a ngma kɛ sɛ hlami ɔ kaa a ji nlamihi kɛkɛ. Mawu wo si kaa e ma ha ní nɛ ɔmɛ tsuo maa ba mi, nɛ Baiblo ɔ tsɔɔ blɔ nɔ nɛ e maa gu kɛ pee jã.

Nyumuhi enyɔ nɛ a kɛ Baiblo Tsɔɔmi womi ɔ ngɛ Baiblo ɔ kasee

Se Baiblo ɔ he ngɛ se nami ngɛ blɔ kpahi fuu a nɔ. E maa tsɔɔ mo bɔ nɛ o maa pee kɛ ná bua jɔmi nitsɛ ngɛ si himi mi amlɔ nɛ ɔ po. Mo susu mo nitsɛ o haomi ɔmɛ a he be kpiti nɛ o hyɛ. Eko ɔ, ohia, loo weku mi nyagbahi, loo hiɔ ngɛ mo haoe, loo eko ɔ, o nɔ ko gbo. Baiblo ɔ ma nyɛ maa ye bua mo nɛ o tsu o haomi ɔmɛ a he ní, nɛ e ma nyɛ ma ha sane bimi nɛ nyɛɛ se nɛ ɔmɛ a heto nɛ o tsui maa nɔ o mi. Lɔ ɔ mɛ ji:

Mɛni he je wa naa nɔ́?
Mɛni blɔ nɔ wa maa gu kɛ da si himi ɔ mi haomi ɔmɛ a nya?
Mɛni wa maa pee konɛ wa weku si himi nɛ pee bua jɔmi?
Ke nɔmlɔ gbo ɔ, mɛni si fɔfɔɛ mi e ya jee?
Anɛ wa maa na wa suɔli nɛ a gbo ɔ ekohu lo?
Kɛ wa maa pee kɛ ná nɔ mi mami kaa Mawu si womi nɛ kɔɔ hwɔɔ se he ɔ maa ba mi kɛɛ?

Womi nɛ ɔ nɛ o ngɛ kanee ɔ tsɔɔ kaa o suɔ nɛ o le nɔ́ nɛ Baiblo ɔ tsɔɔ. Womi nɛ ɔ maa ye bua mo. Mo kadi kaa kuku ɔmɛ tsuo ngɛ sane bimihi. Nimli ayɔhi abɔ bua jɔ sane bimi kɛ heto hami nɛ Yehowa Odasefohi kɛ tsuɔ ní ke a kɛ mɛ ngɛ Baiblo ɔ kasee ɔ he. Wa heɔ yeɔ kaa mo hu o bua maa jɔ he. Mawu nɛ jɔɔ mo ngɛ nɔ́ tutuutu nɛ Baiblo ɔ tsɔɔ nɛ haa nɔ tsui nɔɔ e mi nɛ o bɔni kasemi nɛ ɔ he!