“Nyɛɛ Kɛ Nɔ Tsuaa Nɔ Nɛ Hi Si Ngɛ He Jɔmi Mi”
1. Mɛni Baiblo mi ga womi nɛ e sa kaa wa kɛ tsu ní ke waa kɛ wetsɛ ko nɛ mi mi fu kpe?
1 Yehowa webi suɔ tue mi jɔmi, nɛ wa sɔmɔmi nítsumi ɔ hu haa nɔ tue mi jɔmi. (Yes. 52:7) Se be komɛ ɔ, nihi nɛ wa yaa a ngɔ ɔ a mi mi fuɔ kaa wa ba a we mi. Mɛni maa ye bua wɔ konɛ waa tsɔɔ kaa wa suɔ tue mi jɔmi ngɛ si fɔfɔɛ nɛ ɔmɛ a mi?—Rom. 12:18.
2. Mɛni heje nɛ e he hia kaa wa ná nɔ́ se kɔmi ɔ?
2 O Kɛ Nɔ́ Se Kɔmi Nɛ Tsu Ní: E ngɛ mi kaa anɔkuale ɔ nɛ ni komɛ sume ɔ haa nɛ a mi mi fuɔ, se ni komɛ hu a mi mi fuɔ ngɛ ní kpahi a heje. Eko ɔ, be nɛ waa kɛ ya a ngɔ ɔ hí ha mɛ. E ma nyɛ maa ba lɛ kaa wetsɛ ɔ nitsɛ e haomi komɛ lɛ ha nɛ e mi mi fu ɔ nɛ. Ke sane kpakpa a he nɛ e mi mi fu ngɛ po ɔ, e sa nɛ wa kai kaa eko ɔ, sisimi nɛ a sisi lɛ ɔ heje nɛ e ngɛ e ní pee jã a nɛ. (2 Kor. 4:4) Nɔ́ se kɔmi maa ye bua wɔ nɛ waa to wa tsui si, konɛ waa ngɔ lɛ kaa pi wɔ nɛ e mi mi fu ɔ.—Abɛ 19:11.
3. Mɛni blɔ nɔ wa ma nyɛ maa je bumi kpo kɛ ha wetsɛmɛ ɔmɛ ngɛ?
3 Mo Je Bumi Kpo: Nihi fuu ngɛ wa zugba kpɔ ɔ mi nɛ a kplɛɛ we a hemi kɛ yemi he nɔ́. (2 Kor. 10:4) A ngɛ he blɔ kaa a maa hla keji a maa bu wɔ tue loo a be wɔ tue bue. E sɛ nɛ wa gbeɔ nɔ́ nɛ wetsɛmɛ ɔmɛ heɔ yeɔ he guɛ loo wa peeɔ wa he kaa wa le Baiblo mi pe mɛ. Ke e de wɔ ke waa je ɔ, e sa nɛ waa je ngɛ bumi mi.
4. Ke a ke wa nya mi munyu nɛ ngɔ ɔ, mɛni e tsɔɔ?
4 Mo Ha O Munyu Tumi Nɛ Ngɔ: Ke nihi jɛ wɔ po ɔ, e sa nɛ wa ha mɛ heto ngɛ he si bami mi konɛ munyu nɛ maa je wa nya mi ɔ nɛ ngɔ. (Kol. 4:6; 1 Pet. 2:23) E sa kaa waa bɔ mɔde nɛ wa de mɛ nɔ́ ko nɛ a kɛ wɔ ma kpa gbi ngɛ he pe nɛ waa kɛ mɛ maa je atsinyɛ. Eko ɔ, wa ma nyɛ maa je mi mi himi mi kɛ bi wetsɛ ɔ nɔ́ heje nɛ e sume kaa e maa bu wɔ tue ɔ. Bɔnɛ pee nɛ wa ko ha nɛ nɔ ɔ mi mi nɛ fu ɔ, behi fuu ɔ, e hi wawɛɛ kaa wa maa po munyu ɔ nɔ.—Abɛ 9:7; 17:14.
5. Ke wa di tue mi jɔmi se ngɛ fiɛɛmi nítsumi ɔ mi ɔ, mɛni se wa ma ná?
5 Ke wa di tue mi jɔmi se ɔ, eko ɔ, wetsɛ ɔ ma kai bɔnɛ wa pee wa ní ha a nɛ e maa bu munyu ɔ tue be kpa nɛ nɔ ko ma ya ye lɛ odase ɔ. (Rom. 12:20, 21) Ke e te si kɛ wo wɔ wawɛɛ po ɔ, e ma nyɛ ma ba pee wa nyɛmi hwɔɔ se. (Gal. 1:13, 14) Ke e ma ba ná anɔkuale ɔ he bua jɔmi hwɔɔ se jio, e be nae jio ɔ, wa maa ya nɔ nɛ waa ye wa he nɔ, nɛ́ waa tsɔɔ kaa wa suɔ tue mi jɔmi konɛ wa kɛ wo Yehowa kɛ e tsɔɔmi ɔ hɛ mi nyami.—2 Kor. 6:3.