Anɛ O Hyɛɛ He Nɛ A Ngɔɔ Adafi Fiami Womihi Kɛ Mɛtɛɛ ɔ Daa Lo?

Asafo mi nikɔtɔmahi, asafo mi sɔmɔli kɛ nihi nɛ a kɛ blɔ nya nítsumi ko wo a dɛ ngɛ asafo ɔ mi ɔ pɔɔ he nɛ a ngɔɔ adafi fiami womihi kɛ mɛtɛɛ ɔ hyɛmi konɛ a le be nɛ a ma tsu nítsumi nɛ a kɛ wo a dɛ ɔ. Se kɛ̃ ɔ, nihi tsuo ngɛ asafo ɔ mi ɔ maa na munyuhi nɛ a he hia ngɛ lejɛ ɔ. Anɛ o le be nɛ nyɛ ma dla Matsɛ Yemi Asa a nɔ lo? Anɛ kpokpa nɔ hyɛlɔ ɔ loo asafo ɔ nítsumi he kɔni ɔ mane nyɛ asafo ɔ sɛ womi ko nɛ e he hia lo? Anɛ o le magbɛ nɔ munyu nɛ a maa tu otsi nɛ ɔ munyuyi ɔ konɛ o kɛ fɔ o Baiblo mi nikaseli nine lo? Anɛ a pee tsakemi ngɛ be nɛ nyɛɛ kɛ yaa nikasemi loo ngɛ be nɛ nyɛ fiɛɛmi yami kuu ɔ kɛ kpeɔ ɔ he lo? A fiɛ ní nɛ ɔmɛ a he adafi hu be mi nɛ kpe ɔ ngɛ nɔ yae, nɛ asafo mi nikɔtɔma amɛ a be nyɛe maa de fiɛɛli ɔmɛ tsuo kakaaka. Enɛ ɔ he ɔ, e sa nɛ waa hyɛ he nɛ a ngɔɔ asafo ɔ adafi fiami womihi kɛ mɛtɛɛ ɔ daa. Ke wa hyɛɛ he nɛ a ngɔɔ asafo ɔ adafi fiami womihi kɛ mɛtɛɛ ɔ be tsuaa be ɔ, nɔ́ tsuaa nɔ́ maa ya nɔ “bɔ nɛ sa ngɛ blɔ nya tomi nya.”—1 Kor. 14:40.