A PƆƐ mumi mi adebɔ nɛ a tsɛɛ ke Mikael ɔ tã womi ngɛ Baiblo ɔ mi. Se be tsuaa be nɛ a maa wo e tã a, e kɛ hɛdɔ ngɛ nɔ́ ko tsue. Ngɛ Daniel womi ɔ mi ɔ, Mikael kɛ bɔfo yayamihi komɛ ngɛ ta hwue; ngɛ Yuda womi ɔ mi ɔ, e kɛ Satan ngɛ nya sãe; nɛ ngɛ Kpojemi womi ɔ mi hu ɔ, e hia ta kɛ wo Abosiami kɛ e daimonio ɔmɛ. Mikael peeɔ e ní kaa bɔ nɛ e biɛ ɔ sisi tsɔɔ ɔ, nɛ ji “Mɛnɔ Ngɛ Kaa Mawu?” E peeɔ enɛ ɔ kɛ gu Yehowa nɔ yemi se nɛ e fĩɔ kɛ Mawu he nyɛli ɔmɛ nɛ e kɛ hwuɔ ta a nɔ. Se mɛnɔ ji Mikael ɔ?

Ni komɛ ngɛ nɛ a hɛɛ biɛ nɛ pe kake. Kaa nɔ hyɛmi nɔ́ ɔ, a tsɛɛ blematsɛ Yakob ke Israel, nɛ a tsɛɛ bɔfo Petro hu ke Simon. (1 Mose 49:1, 2; Mateo 10:2) Jã nɔuu Baiblo ɔ tsɔɔ kaa Mikael ji biɛ kpa nɛ a kɛ tsɛɛ Yesu Kristo loko e ba zugba a nɔ, kɛ benɛ e kpale kɛ ho hiɔwe ya. Mo ha nɛ wa susu Baiblo mi ngmamihi nɛ wa da a nɔ kɛ muɔ sane ɔ nya jã a he nɛ waa hyɛ.

Bɔfo Nɔkɔtɔma. Mawu Munyu ɔ tsɛɛ Mikael ke “bɔfo nɔkɔtɔma.” (Yuda 9) Mo kadi kaa a tsɛɛ Mikael ke bɔfo nɔkɔtɔma. Enɛ ɔ tsɔɔ kaa bɔfo kake pɛ a tsɛɛ jã a nɛ. Ngɛ anɔkuale mi ɔ, munyu “bɔfo nɔkɔtɔma” a ji kpo ngɛ Baiblo ɔ mi kaa bɔfo nikɔtɔmahi gblee. Jehanɛ hu, a tu Yesu he munyu kaa bɔfo nɔkɔtɔma. A tu Nyɔmtsɛ Yesu Kristo nɛ a tle lɛ si ɔ he munyu ngɛ 1 Tesalonika Bi 4:16 ke: “Ejakaa Nyɔmtsɛ ɔ nitsɛ ma kple si kɛ je hiɔwe kɛ ba kɛ ose nɛ nya wa. Bɔfo nɔkɔtɔma a maa wo gbi, nɛ Mawu titimati ɔ maa pɛ.” Lɔ ɔ he ɔ, a kale Yesu gbi kaa bɔfo nɔkɔtɔma gbi. Ngɛ hiɛ ɔ, ngmami ɔ ngɛ tsɔɔe kaa Yesu nitsɛ ji bɔfo nɔkɔtɔma Mikael ɔ nɛ.

Tatsɛ Kpanaa. Baiblo ɔ de ke, ‘bɔfo ngua a nɛ a tsɛɛ lɛ Mikael ɔ, kɛ e bɔfo ɔmɛ ya tua sinɔ ngua a kɛ lɛ hu e bɔfo ɔmɛ.’ (Kpojemi 12:7) Lɔ ɔ he ɔ, Mikael ji bɔfo anɔkualetsɛmɛ ɔmɛ a tabo ɔ Nyatsɛ. Kpojemi womi ɔ hu kale Yesu kaa e ji bɔfo anɔkualetsɛmɛ ɔmɛ a tabo ɔ Nyatsɛ. (Kpojemi 19:14-16) Bɔfo Paulo hu wo “Nyɔmtsɛ Yesu” kɛ “e bɔfo katsɛmɛ ɔmɛ” a tã. (2 Tesalonika Bi 1:7) Lɔ ɔ he ɔ, Baiblo ɔ tu Mikael kɛ ‘e bɔfohi’ kɛ Yesu kɛ ‘e bɔfohi’ a he munyu. (Mateo 13:41; 16:27; 24:31; 1 Petro 3:22) Akɛnɛ Mawu Munyu ɔ de we ngɛ he ko he ko kaa bɔfo anɔkualetsɛmɛ ɔmɛ a ta buli a kuu enyɔ lɛ ngɛ hiɔwe, nɛ Mikael ji kake nyatsɛ nɛ Yesu hu ji kake nyatsɛ he je ɔ, e da kaa wa ma de ke biɛ nɛ a kɛ tsɛɛ Yesu Kristo ngɛ hiɔwe ji Mikael.a

KPOJEMI womi ɔ tu munyuhi komɛ nɛ e sɛ nɛ waa ngɔ lɛ kaa bɔ nɛ a ngma a. Nɔ hyɛmi nɔ́ ji kaa, e wo yo ko nɛ a ngma ‘Babilon Ngua’ ngɛ e hɛ nya tã. A tu yo nɛ ɔ he munyu kaa e hii si ngɛ “nimli,” kɛ “je mahi” a nɔ. (Kpojemi 17:1, 5, 15) Akɛnɛ yo ko be jã nyɛe maa pee nitsɛnitsɛ he je ɔ, e sa nɛ ‘Babilon Ngua a’ nɛ pee foni peemi mi nɔ́ ko. Lɛɛ mɛni ji nɔ́ nɛ foni peemi mi yo ajuama nɛ ɔ daa si ha mɔ?

A kale yo nɛ ɔ nɔuu ngɛ Kpojemi 17:18 kaa ‘ma kpetekpleenyɛ nɛ yeɔ je ɔ mi matsɛmɛ ɔmɛ tsuo a nɔ.’ Biɛ nɛ ji “ma” a tsɔɔ nimli a kuu ko. Akɛnɛ “ma kpetekpleenyɛ” nɛ ɔ ‘yeɔ je ɔ mi matsɛmɛ ɔmɛ tsuo a nɔ’ he je ɔ, e ngɛ heii kaa yo nɛ a tsɛɛ lɛ Babilon Ngua a maa pee blɔ nya tomi ko nɛ ngɛ he wami ngɛ je ɔ mi ma amɛ tsuo a nɔ. E sa saminya kaa a tsɛ lɛ ke je ɔ blɔ nya tomi. Mɛni blɔ nya tomi? E ji jami blɔ nya tomi. Mo kadi bɔ nɛ ngmami komɛ nɛ ngɛ Kpojemi womi ɔ mi ɔ ha nɛ wa na kaa e ji jami blɔ nya tomi ha.

Blɔ nya tomi ma nyɛ maa pee ma kudɔmi, jua yemi, loo jami kuu. Se yo nɛ a tsɛɛ lɛ Babilon Ngua a pi ma kudɔmi blɔ nya tomi, ejakaa Mawu Munyu ɔ de ke, “matsɛmɛ ɔmɛ nɛ ngɛ je ɔ mi,” aloo je nɛ ɔ mi ma nɔ yeli ɔmɛ kɛ lɛ “bɔ ajuama.” Ajuama nɛ e bɔ ɔ tsɔɔ kake nɛ e kɛ nɔ yeli nɛ ngɛ zugba nɛ ɔ nɔ pee, nɛ lɔ ɔ he je nɛ a tsɛɛ lɛ ke “ajuama kpanaku” ɔ nɛ.​​—Kpojemi 17:1, 2; Yakobo 4:4.

Babilon Ngua a be nyɛe maa pee jua yemi blɔ nya tomi, ejakaa ‘jua yeli nɛ ngɛ zugba a nɔ’ maa ye aywilɛho be mi nɛ a ma kpata e hɛ mi ɔ. Ngɛ anɔkuale mi ɔ, a kale matsɛmɛ kɛ jua yeli ɔmɛ kaa a maa da “se lokoo” kɛ hyɛ Babilon Ngua a. (Kpojemi 18:3, 9, 10, 15-17) Enɛ ɔ he je ɔ, sisi numi ngɛ he kaa wa ma de ke Babilon Ngua a pi ma kudɔmi aloo jua yemi blɔ nya tomi, se mohu e ji jami blɔ nya tomi.

Munyu nɛ Kpojemi womi ɔ tu kaa Babilon Ngua a ngɔ e “kunya yemi” ɔ kɛ sisi jema amɛ tsuo ɔ, kpale ma sisi numi kaa Babilon Ngua a ji jami blɔ nya tomi ɔ nɔ mi. (Kpojemi 18:23) Akɛnɛ kunya yemihi tsuo je mumi yayamihi a dɛ mi, nɛ a kɛ jami hu ngɛ tsakpa he je ɔ, e be nyakpɛ kaa Baiblo ɔ tsɛ Babilon Ngua a ke “mumi yayamihi tsuo a si himi he.” (Kpojemi 18:2; 5 Mose 18:10-12) A kale blɔ nya tomi nɛ ɔ hu kaa, e teɔ si kɛ woɔ anɔkuale jami wawɛɛ, nɛ e waa “gbali” kɛ “ni klɔuklɔu ɔmɛ” yi mi. (Kpojemi 18:24) Niinɛ, ninyɛ nɛ Babilon Ngua a ngɛ ha anɔkuale jami ɔ nya wa saminya, nɛ lɔ ɔ he ɔ, e waa ‘nihi nɛ yeɔ Yesu he odase ɔ’ yi mi, nɛ e gbeɔ mɛ po. (Kpojemi 17:6) Enɛ ɔ he ɔ, e fɔɔ si pãa kaa, yo nɛ a tsɛɛ lɛ Babilon Ngua a daa si ha je ɔ lakpa jami blɔ nya tomi, nɛ jamihi tsuo nɛ teɔ si kɛ woɔ Yehowa Mawu ɔ piɛɛ he.