Mɛni he je nɛ nimli nɛ ɔmɛ a bua jɔ jã a? A ngɛ wa he nya buami ɔmɛ eko sisi. Kaa bɔ nɛ Mawu fã e sɔmɔli nɛ a hi si blema a kaa a bua a he nya si etɛ ngɛ jeha mi ɔ, wɔ hu wa hyɛɔ blɔ kaa wa ma bua wa he nya kaa kuu ngua. (5 Mose 16:16) Daa jeha a, wa ngɛ he nya buamihi etɛ nɛ wa peeɔ: waa kɛ ligbi kakaaka yaa kpɔ mi kpe si enyɔ, kɛ ligbi etɛ kpokpa nɔ kpe. Mɛni se wa náa ngɛ he nya buami nɛ ɔmɛ a mi?

A haa nɛ huɛ bɔmi nɛ ngɛ waa kɛ wa nyɛmimɛ Kristofohi wa kpɛti ɔ mi waa. Kaa bɔ nɛ ke Israel bi ɔmɛ ngɛ Yehowa yi jee ngɛ ‘nimli asafo a kpɛti’ nɛ a bua jɔɔ ɔ, jã kɛ̃ nɛ wɔ hu ke wa bua wa he nya ngɛ ní peemi klɛdɛɛhi a sisi kɛ ngɛ Yehowa jae ɔ, wa bua jɔɔ. (La 26:12; 111:1) Kɛ gu he nya buami nɛ ɔmɛ a nɔ ɔ, wa nyɛɔ nɛ waa kɛ Odasefohi nɛ a ngɛ asafo kpahi a mi loo ma kpahi a nɔ kpeɔ nɛ waa kɛ mɛ bɔɔ. Ke e su piani ɔ, wɔ tsuo wa yeɔ ní ngɛ he nɛ wa bua wa he nya ngɛ ɔ, nɛ enɛ ɔ haa huɛ bɔmi nɛ hiɔ wa kpɛti ngɛ he nya buami nɛ ɔmɛ nɛ waa kɛ jaa Mawu ɔ a sisi ɔ mi waa. (Bɔfo Ɔmɛ A Ní Tsumi 2:42) Ngɛ he nya buami nɛ ɔmɛ a sisi ɔ, wɔ nitsɛmɛ wa naa suɔmi nɛ peeɔ wa ‘nyɛmimɛ nɛ a ngɛ je kɛ wɛ ɔ tsuo’ kake ɔ.​—1 Petro 2:17.

A yeɔ bua wɔ nɛ wa he waa ngɛ Mawu jami mi. A tsɔɔ Israel bi ɔmɛ Ngmami ɔ sisi fitsofitso ngɛ a he nya buami ɔmɛ a sisi hulɔ, nɛ lɔ ɔ ha nɛ a “nu nɔ́ nɛ a kane ha mɛ ɔ sisi saminya.” (Nehemia 8:8, 12) Wɔ hu wa bua jɔɔ Baiblo mi blɔ tsɔɔmi nɛ a kɛ haa wɔ ngɛ wa he nya buamihi a sisi ɔ he. A kɛ blɔ nya tomi ɔ eko tsuaa eko daa Ngmami ɔ mi munyuyi ko nɔ. Munyu ngɔngɔɛhi kɛ munyuyihi nɛ a gba mi nɛ a tuɔ, kɛ níhi a si kpamihi a he peemi kɛ tsɔɔ yeɔ bua wɔ nɛ wa kaseɔ bɔ nɛ wa ma plɛ kɛ pee Mawu suɔmi nya ní ngɛ wa si himi mi ha. Ke wa nu nyɛmimɛ komɛ a níhi a si kpamihi nɛ kɔɔ bɔ nɛ a nyɛ da haomihi nɛ a kɛ kpe ngɛ Kristofohi nɛ a ji ɔ he ɔ nya ngɛ be nɛ mi wa nɛ ɔmɛ a mi ɔ, e woɔ wɔ he wami. Dramahi nɛ a peeɔ ngɛ kpokpa nɔ kpehi a sisi ɔ haa nɛ wa nuɔ Baiblo mi sanehi a sisi fitsofitso nɛ wa kaseɔ níhi kɛ jeɔ mi. A baptisiɔ nihi nɛ a suɔ kaa a maa pee a he nɔ nɛ́ a jɔɔ ha Mawu ɔ he okadi ɔ ngɛ wa he nya buami ɔmɛ eko tsuaa eko sisi.

• Mɛni ha nɛ wa náa bua jɔmi ngɛ wa he nya buami ɔmɛ a sisi?

• Mɛni blɔ nɔ o maa gu kɛ ná he nya buami ko nɛ o maa ya a he se?

Benɛ e piɛ bɔɔ nɛ Yesu ma gbo ɔ, e fia adafi ke: “Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ kɛ kpa je ɔ mi tsuo, bɔ nɛ pee nɛ je ma amɛ tsuo nɛ a nu; nɛ lɔ ɔ se loko nyagbe ɔ maa ba.” (Mateo 24:14) Se mɛni blɔ nɔ a maa gu kɛ fiɛɛ kɛ kpa je ɔ mi tsuo? A ma nyɛ maa pee jã kɛ gu Yesu nɔ hyɛmi nɔ́ ɔ se nɛ a maa nyɛɛ ɔ nɔ.​—Luka 8:1.

Wa bɔɔ mɔde kaa wa maa ya nihi a ngɔ ngɛ a wehi a mi. Yesu tsɔse e kaseli ɔmɛ konɛ a fiɛɛ sane kpakpa a ngɛ wehi a mi. (Mateo 10:11-13; Bɔfo Ɔmɛ A Ní Tsumi 5:42; 20:20) A ha blema sane kpakpa fiɛɛli ɔmɛ zugba kpɔhi pɔtɛɛ nɛ a fiɛɛ ngɛ mi. (Mateo 10:5, 6; 2 Korinto Bi 10:13) Jã nɔuu kɛ̃ nɛ mwɔnɛ ɔ hu ɔ, a to wa fiɛɛmi ní tsumi ɔ he blɔ nya saminya. A ha asafo tsuaa asafo zugba kpɔ nɛ e fiɛɛ ngɛ mi. Enɛ ɔ yeɔ bua wɔ nɛ wa nyɛɔ tsuɔ fami nɛ Yesu fã wɔ kaa waa ‘fiɛɛ sane kpakpa a ngɔ tsɔɔ nihi nɛ́ waa ye mɛ odase kɛ pi si’ ɔ he ní.​—Bɔfo Ɔmɛ A Ní Tsumi 10:42.

Wa bɔɔ mɔde kaa wa maa ya he tsuaa he nɛ nihi ngɛ. Yesu pee nɔ hyɛmi nɔ́ kɛ ha wɔ kɛ gu fiɛɛmi nɛ e fiɛɛ kɛ tsɔɔ nihi ngɛ magbɛhi a nɔ kaa wo nya, aloo vu nya a nɔ hulɔ. (Marko 4:1; Yohane 4:5-15) Wɔ hu waa kɛ nihi sɛɛɔ Baiblo ɔ he ní ngɛ he tsuaa he nɛ wa ma nyɛ maa pee jã ngɛ​—gbɛjegbɛhi a he, ní tsumi hehi, hɛja jemi hehi, aloo tɛlifoo nɔ. Jehanɛ se hu ɔ, ke wa ná he blɔ nɛ sa a, wa yeɔ nihi nɛ waa kɛ mɛ ngɛ kpɔ mi, nihi nɛ waa kɛ mɛ tsuɔ ní, nihi nɛ waa kɛ mɛ ngɛ sukuu tsu kake mi, kɛ wa weku li odase. Mɔde nɛ wa bɔɔ ngɛ blɔ nɛ ɔmɛ a nɔ ɔ ha nɛ nimli ayɔhi abɔ nɛ a ngɛ je kɛ wɛ ɔ nu ‘yi wami hemi sane kpakpa a’ he.​—La 96:2.

Anɛ o le ni komɛ nɛ o maa suɔ kaa o maa fiɛɛ Mawu Matsɛ Yemi sane kpakpa a kɛ tsɔɔ mɛ nɛ o tsɔɔ mɛ níhi nɛ Matsɛ Yemi ɔ maa pee ha mɛ hwɔɔ se lo? Koo pee mɛ sɛ gbi nɛ haa nɔ hɛ kɛ nɔ fɔmi nɛ ɔ he kpɛle. O kɛ mɛ nɛ sɛɛ he ní oya nɔuu!

• Mɛni “sane kpakpa” nɛ e sa kaa a fiɛɛ?

• Mɛni blɔ nɔ Yehowa Odasefohi guɔ kɛ kaseɔ bɔ nɛ Yesu fiɛɛ ha a?

Behi fuu ɔ, a tsɛɔ nɔ ko nɛ e gbaa blɔ kɛ yaa he ko nɛ́ nɔ ko yɛ lejɛ ɔ hyɛ nɛ́ ni kpahi hu nyɛɛɔ e se ɔ ke “blɔ gbalɔ.” Yesu ngɛ kaa blɔ gbalɔ, ejakaa a tsɔ lɛ kɛ ba zugba a nɔ nɛ e ba tsu yi wami hemi sɔmɔmi ní tsumi, nɛ e kɛ bli blɔ ha adesahi konɛ a ná kpɔmi. (Mateo 20:28) Mwɔnɛ ɔ, e se nyɛɛli ɔmɛ hu ngɛ lɛ kasee nɛ a kɛ be fuu ngɛ ‘nihi kaseli pee.’ (Mateo 28:19, 20) A ti ni komɛ nyɛ ngɛ nɔ́ nɛ wa tsɛɛ ke blɔ gbami ní tsumi ɔ tsue.

Blɔ gbalɔ ji nɔ ko nɛ e kɛ e be tsuo fiɛɛɔ. Yehowa Odasefohi tsuo fiɛɛɔ sane kpakpa a. Se a kpɛti ni komɛ to a si himi he blɔ nya konɛ a sɔmɔ kaa daa blɔ gbali nɛ́ a kɛ ngmlɛfia 70 nɛ fiɛɛ daa nyɔhiɔ. Nihi fuu kpa he lo nya ní tsumihi nɛ a kɛ a be tsuo tsuɔ ɔ tsumi nɛ a hla he lo nya ní tsumi nɛ a kɛ be bɔɔ pɛ tsuɔ. A hlaa ni komɛ hu konɛ a ya sɔmɔ kaa blɔ gbali klɛdɛɛ ngɛ hehi nɛ Matsɛ Yemi fiɛɛli fuu a he hia ngɛ nɛ a kɛ ngmlɛfia 130 loo nɔ́ nɛ hiɛ pe jã fiɛɛɔ daa nyɔhiɔ. Blɔ gbali ɔmɛ a bua jɔ kaa a maa pee a si himi hlɛhlɛɛhlɛ, nɛ a ngɛ hɛ kɛ nɔ fɔmi ngɛ Yehowa mi kaa e ma ha mɛ a si himi mi hiami níhi. (Mateo 6:31-33; 1 Timoteo 6:6-8) Ke nihi nɛ a be nyɛe ma sɔmɔ kaa daa blɔ gbali loo blɔ gbali klɛdɛɛ ɔ ma nyɛ ɔ, a sɔmɔɔ kaa blɔ gbali a wali nɛ a kɛ ngmlɛfia 30 loo 50 fiɛɛɔ ngɛ nyɔhiɔ ko mi.

Nɔ́ nɛ woɔ blɔ gbalɔ he wami ji suɔmi nɛ e ngɛ kɛ ha Mawu kɛ nihi. Kaa bɔ nɛ Yesu yɔse ɔ, wɔ hu wa yɔse kaa mwɔnɛ ɔ, nihi babauu ngɛ hlae wawɛɛ kaa a maa le Mawu kɛ e yi mi tomihi a he ní. (Marko 6:34) Wa ngɛ nile nɛ ma nyɛ maa ye bua mɛ amlɔ nɛ ɔ, nɛ ma ha nɛ a ná hɛ kɛ nɔ fɔmi nitsɛnitsɛ kɛ ha hwɔɔ se. Suɔmi nɛ blɔ gbalɔ ko ngɛ ɔ woɔ lɛ he wami nɛ e jeɔ e tsui mi nɛ e kɛ e be, kɛ e he wami yeɔ bua nihi konɛ a le Mawu kɛ e yi mi tomihi. (Mateo 22:39; 1 Tesalonika Bi 2:8) Enɛ ɔ haa e hemi kɛ yemi mi waa, e hɛɛ lɛ kɛ suɔ Mawu he, nɛ e náa bua jɔmi fuu.​—Bɔfo Ɔmɛ A Ní Tsumi 20:35.

• Mɛnɔ ji blɔ gbalɔ?

• Mɛni woɔ ni komɛ he wami nɛ a sɔmɔɔ kaa daa blɔ gbali loo blɔ gbali klɛdɛɛ?