Wa Maa Je Draw Close To Jehovah Womi ɔ Kasemi Sisi Ngɛ January 6 Otsi ɔ Mi
1. Mɛni he blɔ wa ma ná kɛ hɛ wɔ kɛ su Yehowa he kɛ je January 6 otsi ɔ mi?
1 Yehowa suɔ kaa waa hɛ wɔ kɛ su e he. (Yak. 4:8) Bɔnɛ pee nɛ wa nyɛ nɛ waa pee jã a, wa maa kase Draw Close to Jehovah womi ɔ ngɛ Asafo Baiblo Mi Nikasemi ɔ mi kɛ je January 6 otsi ɔ mi. Womi ɔ nya blimi munyu ɔ tsɔɔ nɔ́ heje nɛ a pee womi ɔ, e tsɔɔ mi kaa: “Ke wa susu bɔnɛ Yehowa jeɔ e su ɔmɛ eko tsuaa eko kpo ha a he, nɛ wa hyɛ bɔnɛ Yesu Kristo je su ɔmɛ kpo pɛpɛɛpɛ ha, nɛ wa na bɔnɛ wa maa pee ha kɛ ná jamɛ a su ɔmɛ ɔ, e ma ha nɛ wa maa hɛ wɔ kɛ su Mawu he.” Wa kase womi nɛ ɔ ngɛ jeha 2004 kɛ 2005 ɔ mi. Se fiɛɛli ayɔ enyɔ kɛ se nɛ́ a ba asafo ɔ mi ngɛ lɔɔ se ɔ lɛɛ enɛ ɔ maa pee kekleekle be nɛ a maa susu Yehowa su kpakpa amɛ a he fitsofitso. Ngɛ nihi nɛ a kase womi nɛ ɔ momo ɔ a blɔ fa mi ɔ, e mi nɛ a ma nylɔ ɔ maa ye bua mɛ konɛ Yehowa su ɔmɛ a he hɛsa nɛ a ngɛ ɔ mi nɛ wa.—La 119:14.
2. Kɛ wa maa kase Draw Close to Jehovah womi ɔ ha kɛɛ?
2 Bɔnɛ Wa Maa Kase Womi ɔ Ha: Nɔ nɛ maa hyɛ ní kasemi ɔ nɔ ɔ maa tu munyu kake loo enyɔ kɛ bli ní kasemi ɔ nya. A tsɔɔ we ngmamihi nɛ e sa kaa a kane, lɔɔ he ɔ, ní kasemi ɔ nɔ hyɛlɔ ɔ maa hla ngmami oti ɔmɛ nɛ a maa kane. E ma nyɛ ma bi sane kake loo enyɔ ngɛ ní kasemi ɔ eko tsuaa eko nyagbe kɛ nylɔ ní kasemi ɔ mi. Ke daka nɛ ji, “Questions for Meditation” piɛɛ ní kasemi ɔ he ɔ, a maa ngɔ lɔɔ kɛ pee mi nylɔmi ɔ. Ke be ngɛ ɔ, ní kasemi ɔ nɔ hyɛlɔ ɔ ma nyɛ ma ha nɛ a kane ngmamihi nɛ ngɛ daka a mi ɔ ekomɛ, nɛ e bi sanehi ngɛ he.
3. Mɛni nɛ e sa kaa waa pee ke wa ngɛ womi ɔ kasee, nɛ mɛni heje?
3 Mo Ná He Se Kɛ Pi Si: Ke o kase womi nɛ ɔ hyɛ po ɔ, mo dla o he kɛ sɛ hlami. Mo ha munyuhi a heto, ejakaa ke o pee jã a, e maa ye bua mo nɛ o ma kai níhi nɛ o kase ɔ, nɛ nihi nɛ a ba asafo mi kpe ɔ hu ma ná he se, nɛ e maa wo Yehowa hɛ mi nyami. (La 35:18; Heb. 10:24, 25) Ke o ngɛ Yehowa su kpakpa amɛ a he susue ɔ, e ma ha nɛ o maa hɛ mo kɛ su e he. (La 77:11-13) Kɛkɛ ɔ, lɔɔ ma ha nɛ o maa ma o juɛmi nya si kaa o maa ye e mlaa amɛ a nɔ, nɛ lɔɔ maa wo mo he wami konɛ o tu e he munyu kɛ tsɔɔ ni kpahi.—La 150:1-6.