Bɔ Nɛ Wa Maa Tsɔɔ Nihi Ní Ha Nɛ E Maa Sɛ A Tsui Mi
1. Kɛ Yesu ní tsɔɔmi ɔ ná nihi nɛ a bu lɛ tue ɔ a nɔ he wami ha kɛɛ?
1 Yesu Kristo tsɔɔ nihi ní nɛ e sɛ a tsui mi. Be ko nɛ Yesu tsɔɔ e kaseli enyɔ komɛ Ngmami ɔmɛ a sisi ɔ, a “nɔ gbagba te.” (Luka 24:32) Akɛnɛ e sa nɛ waa je wa tsui mi kɛ bu Mawu tue he je ɔ, mɛni blɔ nɔ wa maa gu kɛ su nihi nɛ wa tsɔɔ mɛ ní ɔ a tsui he, konɛ a nyɛ nɛ a pee tsakemihi ngɛ a si himi mi?—Rom. 6:17.
2. Mɛni blɔ nɔ nɛ ga, kɛ nɔ́ se yomi yeɔ bua wɔ nɛ wa ní tsɔɔmi ɔ sɛɛ nihi a tsui mi?
2 O Kɛ Ga Kɛ Nɔ́ Se Yomi Nɛ Tsu Ní: Nihi fuu ngɛ nɛ ke wa tsɔɔ mɛ níhi nɛ da kɛ níhi nɛ dɛ ɔ, lɔ ɔ pɛ be hae nɛ a pee tsakemi ngɛ a si himi mi. Ke wa kane ngmamihi fuu kɛ gbe a hemi kɛ yemi ɔ he guɛ ɔ, lɔ ɔ be hae nɛ a bua nɛ jɔ kaa a kɛ wɔ maa kase ní. Loko wa ma nyɛ maa ye bua nɔ ko ɔ, ja wa le nɔ́ he je nɛ nɔ ɔ susu kaa níhi nɛ e he ye ɔ ji anɔkuale, kɛ nɔ́ he je nɛ e peeɔ e ní ngɛ blɔ ko nɔ́ ɔ. Ke wa gu ga blɔ nɔ kɛ bi sanehi nɛ ma ha nɛ nɔ ɔ nɛ je e juɛmi kpo ɔ, lɔ ɔ ma ha nɛ e ma de wɔ níhi nɛ ngɛ e tsui mi. (Abɛ 20:5) Ja wa pee jã loko wa maa le Ngmamihi nɛ ke waa kɛ tsu ní ɔ, e maa ta nɔ ɔ tsui he. Enɛ ɔ he ɔ, e sa nɛ wa ná nɔ ɔ he bua jɔmi nɛ waa to wa tsui si ha lɛ. (Abɛ 25:15) Mo kai kaa e slo nɔ tsuaa nɔ mɔde bɔmi. Moo ngmɛ Yehowa mumi klɔuklɔu ɔ blɔ nɛ e ná nɔ ɔ susumi, kɛ e ní peepee nɔ he wami.—Marko 4:26-29.
3. Kɛ wa maa pee kɛɛ kɛ ye bua nihi nɛ wa tsɔɔ mɛ ní ɔ konɛ a ná su kpakpahi?
3 Ye Bua Mɛ Nɛ A Ná Su Kpakpahi: Baiblo mi sanehi nɛ haa nɛ wa naa Yehowa kpakpa peemi, kɛ e suɔmi ɔ ma nyɛ maa ye bua nihi nɛ wa tsɔɔ mɛ ní ɔ konɛ a ná su kpakpahi. Wa ma nyɛ maa ngɔ ngmamihi kaa La 139:1-4 loo Luka 12:6, 7 kɛ tsɔɔ mɛ bɔ nɛ Mawu susuɔ wa he kakaaka ha a. Ke a bua jɔ Yehowa mi mi himi ɔ he ɔ, a ma ná suɔmi nɛ mi wa kɛ ha lɛ, nɛ a bua maa jɔ kaa a ma sɔmɔ lɛ. (Rom. 5:6-8; 1 Yoh. 4:19) Jehanɛ se hu ɔ, ke a le kaa a ní peepeehi ma nyɛ maa gbe Yehowa he guɛ, nɛ e ma nyɛ maa wo e hɛ mi nyami hulɔ ɔ, a maa suɔ kaa a maa pee níhi nɛ maa sa e hɛ mi.—La 78:40, 41; Abɛ 23:15.
4. Ke wa ngɛ nɔ ko ní tsɔɔe ɔ, mɛni wa maa pee kɛ tsɔɔ kaa wa ngɛ bu kɛ ha he blɔ nɛ nɔ ɔ ngɛ kaa e hlaa nɔ́ nɛ lɛ nitsɛ e suɔ ɔ?
4 Yehowa nyɛ we nɔ ko nɔ kaa e ye e mlaa amɛ a nɔ. Mohu ɔ, e tsɔɔ wɔ bɔ nɛ ke waa kɛ e mlaa amɛ tsu ní ɔ, wa ma ná he se ha. (Yes. 48:17, 18) Ke wa tsɔɔ nihi ní bɔ nɛ pee nɛ mɛ nitsɛmɛ a nyɛ nɛ a mwɔ a yi mi kpɔ ngɛ níhi a he ɔ, lɔ ɔ tsɔɔ kaa wa ngɛ Yehowa kasee. Ke nihi na kaa e sa nɛ a pee tsakemi ngɛ a si himi mi, nɛ a pee jã a, a kpale we kɛ yɛ a sa si himi ɔ he hu. (Rom. 12:2) E haa nɛ a hɛɛ kɛ suɔ Yehowa, nɛ e ‘hyɛɛ adesa tsui mi’ ɔ he.—Abɛ 17:3.