Anɛ Mawu Munyu ɔ Náa O Nɔ He Wami Daa Ligbi Lo?

Baiblo ɔ nɛ wa maa kane daa ligbi ɔ maa ye bua wɔ nɛ wa ‘nane maa pi si,’ nɛ ‘wa hemi kɛ yemi ɔ mi maa wa.’ (Kol. 2:6, 7) Se loko Baiblo ɔ ma ná wa nɔ he wami ɔ, ja wa susu he, nɛ waa kɛ sisi tomi mlaahi nɛ ngɛ mi ɔ tsu ní. (Heb. 4:12; Yak. 1:22-25) Yoshua 1:8 ɔ tsɔɔ blɔ etɛ komɛ a nɔ nɛ wa maa gu kɛ ná Baiblo kanemi he se: (1) Kane Mawu Munyu ɔ “daa” ligbi. (2) “Susu he nyɔ kɛ pia,” nɛ tsɔɔ kaa, wa maa to wa tsui si kɛ kane Baiblo ɔ konɛ wa nyɛ nɛ wa susu he, nɛ waa po nɔ́ nɛ wa kane ɔ he foni ngɛ wa juɛmi mi. (3) Moo bɔ mɔde nɛ o ye “nɔ́ tsuaa nɔ́ nɛ a ngma ngɛ mi ɔ nɔ.” Ke wa ngɔ ga womi nɛ ɔmɛ kɛ tsu ní ɔ, “níhi a mi maa hi” ha wɔ, nɛ wa “maa ye manye” ngɛ wa daa ligbi si himi mi.