NÍ KASEMI 11

Mɛni He Je Nɛ Wa Yaa He Nya Buami Nguahi?

Yehowa Odasefohi ngɛ kpokpa nɔ kpe ko sisi ngɛ Mexico — Mexico

A ngɛ womi ko kpo jee ngɛ Yehowa Odasefohi a kpokpa nɔ kpe ko sisi ngɛ Germany — Germany

Yehowa Odasefohi ngɛ kpokpa nɔ kpe ko sisi ngɛ Botswana — Botswana

Niheyo ko nɛ a ngɛ lɛ baptisie ngɛ Nicaragua — Nicaragua

A ngɛ drama pee ngɛ kpokpa nɔ kpe ko sisi ngɛ Italy — Italy

Mɛni he je nɛ nimli nɛ ɔmɛ a bua jɔ jã a? A ngɛ wa he nya buami ɔmɛ eko sisi. Kaa bɔ nɛ Mawu fã e sɔmɔli nɛ a hi si blema a kaa a bua a he nya si etɛ ngɛ jeha mi ɔ, wɔ hu wa hyɛɔ blɔ kaa wa ma bua wa he nya kaa kuu ngua. (5 Mose 16:16) Daa jeha a, wa ngɛ he nya buamihi etɛ nɛ wa peeɔ: waa kɛ ligbi kakaaka yaa kpɔ mi kpe si enyɔ, kɛ ligbi etɛ kpokpa nɔ kpe. Mɛni se wa náa ngɛ he nya buami nɛ ɔmɛ a mi?

A haa nɛ huɛ bɔmi nɛ ngɛ waa kɛ wa nyɛmimɛ Kristofohi wa kpɛti ɔ mi waa. Kaa bɔ nɛ ke Israel bi ɔmɛ ngɛ Yehowa yi jee ngɛ ‘nimli asafo a kpɛti’ nɛ a bua jɔɔ ɔ, jã kɛ̃ nɛ wɔ hu ke wa bua wa he nya ngɛ ní peemi klɛdɛɛhi a sisi kɛ ngɛ Yehowa jae ɔ, wa bua jɔɔ. (La 26:12; 111:1) Kɛ gu he nya buami nɛ ɔmɛ a nɔ ɔ, wa nyɛɔ nɛ waa kɛ Odasefohi nɛ a ngɛ asafo kpahi a mi loo ma kpahi a nɔ kpeɔ nɛ waa kɛ mɛ bɔɔ. Ke e su piani ɔ, wɔ tsuo wa yeɔ ní ngɛ he nɛ wa bua wa he nya ngɛ ɔ, nɛ enɛ ɔ haa huɛ bɔmi nɛ hiɔ wa kpɛti ngɛ he nya buami nɛ ɔmɛ nɛ waa kɛ jaa Mawu ɔ a sisi ɔ mi waa. (Bɔfo Ɔmɛ A Ní Tsumi 2:42) Ngɛ he nya buami nɛ ɔmɛ a sisi ɔ, wɔ nitsɛmɛ wa naa suɔmi nɛ peeɔ wa ‘nyɛmimɛ nɛ a ngɛ je kɛ wɛ ɔ tsuo’ kake ɔ.—1 Petro 2:17.

A yeɔ bua wɔ nɛ wa he waa ngɛ Mawu jami mi. A tsɔɔ Israel bi ɔmɛ Ngmami ɔ sisi fitsofitso ngɛ a he nya buami ɔmɛ a sisi hulɔ, nɛ lɔ ɔ ha nɛ a “nu nɔ́ nɛ a kane ha mɛ ɔ sisi saminya.” (Nehemia 8:8, 12) Wɔ hu wa bua jɔɔ Baiblo mi blɔ tsɔɔmi nɛ a kɛ haa wɔ ngɛ wa he nya buamihi a sisi ɔ he. A kɛ blɔ nya tomi ɔ eko tsuaa eko daa Ngmami ɔ mi munyuyi ko nɔ. Munyu ngɔngɔɛhi kɛ munyuyihi nɛ a gba mi nɛ a tuɔ, kɛ níhi a si kpamihi a he peemi kɛ tsɔɔ yeɔ bua wɔ nɛ wa kaseɔ bɔ nɛ wa ma plɛ kɛ pee Mawu suɔmi nya ní ngɛ wa si himi mi ha. Ke wa nu nyɛmimɛ komɛ a níhi a si kpamihi nɛ kɔɔ bɔ nɛ a nyɛ da haomihi nɛ a kɛ kpe ngɛ Kristofohi nɛ a ji ɔ he ɔ nya ngɛ be nɛ mi wa nɛ ɔmɛ a mi ɔ, e woɔ wɔ he wami. Dramahi nɛ a peeɔ ngɛ kpokpa nɔ kpehi a sisi ɔ haa nɛ wa nuɔ Baiblo mi sanehi a sisi fitsofitso nɛ wa kaseɔ níhi kɛ jeɔ mi. A baptisiɔ nihi nɛ a suɔ kaa a maa pee a he nɔ nɛ́ a jɔɔ ha Mawu ɔ he okadi ɔ ngɛ wa he nya buami ɔmɛ eko tsuaa eko sisi.

Mɛni ha nɛ wa náa bua jɔmi ngɛ wa he nya buami ɔmɛ a sisi?
Mɛni blɔ nɔ o maa gu kɛ ná he nya buami ko nɛ o maa ya a he se?