Kɛ je September kɛ yaa a, wa maa na munyu ehe ko nɛ wa ma nyɛ maa da nɔ kɛ ye nihi odase, ngɛ Si Himi Kɛ Sɔmɔmi Ní Tsumi Kpe ɔ He Ní Kasemi Womi ɔ mi. Munyu ɔ yi ji “Tsɔɔ Nihi Anɔkuale ɔ.” Enɛ ɔ maa ye bua wɔ konɛ waa ngɔ sane bimi kɛ ngmami ko kɛ tsu ní kɛ ma Baiblo mi anɔkuale ko nɔ mi kɛ ha nihi.

Ke wa na kaa nɔ ko bua jɔ munyu ɔ he ɔ, wa ma nyɛ ma ha lɛ womi aloo wa ma je video ko nɛ ngɛ jw.org nɔ ɔ kɛ tsɔɔ lɛ. E sa nɛ waa bɔ mɔde nɛ waa kpale ya slaa nihi nɛ a bua jɔ munyu ɔ he ɔ ngɛ ligbi bɔɔ komɛ a se. A ma je fiɛɛmi munyu nɛ ɔmɛ kɛ sukuu bi ɔmɛ a ní tsumi ɔmɛ kɛ je munyu otihi nɛ a ngma ngɛ yi fɛɛ yi nɛ ngɛ Mɛni Baiblo ɔ Ma Nyɛ Maa Tsɔɔ Wɔ? womi ɔ nyagbe ɔ mi. Sane bimihi kɛ ngmamihi fuu ngɛ lejɛ ɔ nɛ maa ye bua wɔ konɛ wa nyɛ nɛ waa ngɔ Baiblo ɔ pɛ kɛ tsu ní ke wa kpale ya slaa nɔ ko loo waa kɛ nɔ ko yaa pee Baiblo mi ní kasemi.

Blɔ kake pɛ nɛ e kɛ nɔ yaa wami mi. (Mat 7:13, 14) Akɛnɛ nihi nɛ waa kɛ mɛ sɛɛɔ ní ɔ ngɛ jami slɔɔtohi kɛ si himi slɔɔtohi a mi he je ɔ, e sa nɛ waa kɛ a ti nɔ tsuaa nɔ nɛ sɛɛ Baiblo ɔ mi munyuhi nɛ e bua maa jɔ he ɔ he ní. (1Tim 2:4) Ke wa le Baiblo mi munyu slɔɔtohi, nɛ wa nyɛɛ nɛ wa tsɔɔ nihi “anɔkuale munyu ɔ saminya” a, wa ma nyɛ maa ye bua nihi fuu, nɛ wa bua maa jɔ wawɛɛ.​—2Tim 2:15.

Nihi hia bua womi ngɛ je ɔ mi tsuo. (Fiɛlɔ 4:1) Ngɛ September nyɔhiɔ ɔ mi ɔ, wa ma gba Hwɔɔmi Mɔ ko nɛ e tu bua womi he munyu. Mo gba womi tɛtlɛɛ nɛ ɔ kɛ ha nihi fuu. Se wa sume nɛ wa si womi tɛtlɛɛ ɔmɛ ngɛ nihi nɛ a be we mi ɔ a tsu nya, ejakaa wa suɔ nɛ waa kɛ mɛ nitsɛmɛ nɛ sɛɛ ní nɛ waa wo a bua.

NƆ́ NƐ O MA DE

“Wɔ tsuo wa hia bua womi be komɛ. Se jije wa ma ná bua womi ngɛ? [Kane 2 Korinto Bi 1:3, 4.] A tsɔɔ bɔ nɛ Mawu woɔ wa bua ha a ngɛ Hwɔɔmi Mɔ nɛ ɔ mi.”

Ke nɔ ɔ bua jɔ munyu ɔ he nɛ e ngɔ womi tɛtlɛɛ ɔ, . . .

MO JE VIDEO NƐ JI MƐNI HE JE NƐ E SA KAA WAA KASE BAIBLO Ɔ? KƐ TSƆƆ LƐ

Mo de lɛ kaa o suɔ kaa o kɛ lɛ ma ba kase Baiblo ɔ.

MOO TSƆƆ WETSƐ Ɔ NƆ́ NƐ O KƐ LƐ MA BA KASE PEE SE

Bi lɛ sane ko nɛ o ma ba ha lɛ heto pee se. O ma nyɛ ma bi sane ko kaa “Mɛni he je nɛ Mawu ngmɛ nɔ́ nami blɔ?”