Yesu Tsɔɔ Nikodemo Ní Nyɔ Mi

Benɛ Yesu ya ye Hetsɔmi ɔ ngɛ Yerusalem ngɛ jeha 30 mi ɔ, e pee nyakpɛ níhi fuu ngɛ lejɛ ɔ, nɛ nihi babauu he lɛ ye. Yesu he pee Nikodemo nyakpɛ, nɛ e suɔ nɛ e maa kase níhi fuu ngɛ e ngɔ. Nikodemo nɛ ɔ, e ji Farisi no, nɛ e ji Yuda bi ɔmɛ a kojomi he ngua nɛ a tsɛɛ ke Sanhedrin ɔ hu mi no. E ya Yesu ngɔ nyɔ mi, ejakaa e ngɛ gbeye yee kaa eko ɔ, Yuda jami nya dali ɔmɛ maa na lɛ, nɛ a ma pue e hɛ mi si.

Nikodemo de lɛ ke: ‘Tsɔɔlɔ, wa le kaa tsɔɔlɔ nɛ Mawu tsɔ kɛ ba ji mo. Níhi tsuo nɛ o peeɔ kɛ toɔ okadi ɔ, nɔ ko nɔ ko be nyɛe maa pee, ja Mawu piɛɛ e he.’ Yesu de Nikodemo kaa ja ‘a fɔ nɔ ko ekohu’ loko e ma nyɛ maa sɛ Mawu Matsɛ Yemi ɔ mi.​​—Yohane 3:2, 3.

Kɛ e maa pee kɛɛ nɛ a ma nyɛ ma fɔ nɔ ko nɛ e wa ekohu? Nikodemo bi ke: ‘Anɛ nɔ ko ma nyɛ maa sɛ e nyɛ mi mi nɛ a kpale fɔ lɛ ekohu lo?’​—Yohane 3:4.

Dɛbi, pi jã nɛ e tsɔɔ. Yesu de ke: “Ke a ji nyu kɛ mumi mi fɔ we nɔ ko ɔ, e be nyɛe maa sɛ matsɛ yemi ɔ mi.” (Yohane 3:5) Benɛ a baptisi Yesu nɛ mumi klɔuklɔu ɔ ba e nɔ ɔ ji be nɛ a je “nyu kɛ mumi mi” fɔ lɛ. Jamɛ a be ɔ mi ɔ, gbi ko pɛ kɛ je hiɔwe, nɛ e de ke: “Imi nitsɛ ye bi nɛ i suɔ ji nɛ ɔ nɛ! Ee, i ngɛ e he bua jɔmi saminya.” (Mateo 3:16, 17) Mawu gu blɔ nɛ ɔ nɔ kɛ pee lɛ heii kaa e fɔ Yesu kaa e mumi mi bi, nɛ e ngɛ he blɔ kaa e maa sɛ hiɔwe Matsɛ Yemi ɔ mi. Pee se ngɛ Pentecoste 33 ngɛ Kristo fɔmi se ɔ, mumi klɔuklɔu ɔ ba nihi nɛ a baptisi mɛ ɔ a nɔ, nɛ mɛ hu a fɔ mɛ ekohu nɛ a ba pee Mawu mumi mi bimɛ.​—Bɔfo Ɔmɛ A Ní Tsumi 2:1-4.

Nikodemo nui nɔ́ nɛ Yesu ngɛ lɛ tsɔɔe ngɛ Matsɛ Yemi ɔ he ɔ sisi. Lɔ ɔ he ɔ, Yesu de Nikodemo níhi fuu kɛ kɔ he blɔ klɛdɛɛ nɛ lɛ Yesu ɔ e ngɛ kaa Mawu Bi ɔ he. Yesu de lɛ ke: “Bɔ nɛ Mose wo sinɔ ɔ nɔ ngɛ nga a nɔ ɔ, jã nɔuu nɛ e sa kaa a wo Nɔmlɔ Bi ɔ nɔ, konɛ nɔ tsuaa nɔ nɛ heɔ lɛ yeɔ ɔ, e ná neneene wami.”​—Yohane 3:14, 15.

Ngɛ Mose be ɔ mi ɔ, e he ba hia nɛ Israel bi nɛ sinɔhi kɔɔ mɛ ɔ nɛ a wo a yi nɔ nɛ a hyɛ akɔblee sinɔ ɔ konɛ a ko gbo. (4 Mose 21:9) Jã a kɛ̃ nɛ e sa nɛ adesahi tsuo nɛ a ná hemi kɛ yemi ngɛ Mawu Bi ɔ mi konɛ a ná neneene wami. Yesu ma bɔ nɛ Yehowa je suɔmi mi nɛ e to yi wami hemi nɛ ɔ he blɔ nya a nɔ mi kɛ tsɔɔ Nikodemo ke: “Mawu suɔ je ɔ saminya, nɛ e ngɔ e Bi kake ɔ ngɔ ha, konɛ nɔ tsuaa nɔ nɛ heɔ lɛ yeɔ ɔ, e hɛ mi ko kpata, se mohu e ná neneene wami.” (Yohane 3:16) Enɛ ɔ he ɔ, benɛ Yesu je e sɔmɔmi ní tsumi ɔ sisi ɔ, e ya Yerusalem ngɛ nyɔhiɔ ekpa se, nɛ e ya pee lɛ heii ngɛ lejɛ ɔ kaa e nɔ nɛ a maa gu kɛ he adesahi a yi wami.

Yesu de Nikodemo ke: “Mawu tsɔɛ e Bi ɔ kɛ bɛ je ɔ mi nɛ e ba kojo; se mohu e ba, konɛ e ba he nihi a yi wami.” Enɛ ɔ tsɔɔ we kaa e ma adesahi tsuo fɔ bumi nɛ a kpata a hɛ mi. Mohu ɔ, kaa bɔ nɛ Yesu de ɔ, a tsɔ lɛ kɛ ba je ɔ mi konɛ kɛ gu e nɔ ɔ, a “he nihi a yi wami.”​​—Yohane 3:17.

Yesu na kaa nimli a hɛ mi gbeye yemi he je nɛ Nikodemo ba e ngɔ nyɔ mi ɔ nɛ. Lɔ ɔ he ɔ, benɛ a ní sɛɛmi ɔ ma nyagbe ɔ, Yesu de lɛ ke: “Nɔ́ nɛ nɔ nɛ a da kɛ bu mɛ fɔ ji nɛ ɔ nɛ: la a [bɔ nɛ Yesu hi si ha, kɛ níhi nɛ e tsɔɔ] ba je ɔ mi, se adesa suɔ diblii ɔ mohu pe la a, ejakaa a peeɔ yayami. Nɔ tsuaa nɔ nɛ peeɔ yayami ɔ, e nyɛɔ la a; nɛ e sume nɛ e baa la a nya, ejakaa e sume nɛ a naa e ní yayami ɔmɛ. Se nɔ tsuaa nɔ nɛ nyɛɛɔ anɔkuale se ɔ, e baa la a nya, konɛ la a nɛ tsɔɔ kaa e peeɔ Mawu suɔmi nya ní.”​​—Yohane 3:19-21.

Yesu tsɔɔ Nikodemo nɛ e ji Farisi no ɔ nɔ́ nɛ lɛ Yesu ɔ ma tsu ngɛ Mawu yi mi tomi mi. Amlɔ nɛ ɔ, Yesu si munyu ɔ ha lɛ konɛ lɛ nitsɛ e susu he.