KRISTOFOHI A SI HIMI

Je Mi Bami Nɛ E He Tsɔ Kɛ Bumi Nɛ Mi Kuɔ Náa Nihi A Nɔ He Wami

Behi fuu ɔ, je mi bami kpakpa nɛ yigbayihi nɛ a ji Kristofohi jeɔ kpo ngɛ a gba si himi mi ɔ náa a hunomɛ a nɔ he wami nɛ a ba kaseɔ anɔkuale ɔ. Se kɛ̃ ɔ, enɛ ɔ ma bi nɛ o fĩ si ngɛ si fɔfɔɛhi nɛ a mi wa mi jehahi babauu. (1Pe 2:21-23; 3:1, 2) Ke o he piɛɛlɔ ɔ kɛ mo hí si saminya a, moo ya nɔ nɛ o ngɔ kpakpa kɛ ye yayami nɔ kunimi. (Ro 12:21) Nɔ hyɛmi nɔ́ kpakpa nɛ o maa pee ɔ ma ná e nɔ he wami pe munyuhi pɛ nɛ o maa tu.

Bɔɔ mɔde nɛ o nu o huno ɔ loo o yo ɔ sisi. (Flp 2:3, 4) Mo je mi mi sami kpo nɛ o bɔ mɔde kaa o ma tsu o blɔ nya ní tsumihi saminya. Ke o huno ɔ loo o yo ɔ ngɛ munyu tue ɔ, moo bu lɛ tue saminya. (Yak 1:19) Moo to o tsui si nɛ o ha nɛ o huno ɔ loo o yo ɔ nɛ le kaa o suɔ lɛ. Ke o jeɔ mi mi jɔmi kɛ bumi kpo kɛ tsɔɔ o yo ɔ loo o huno ɔ se lɛɛ e pee we jã po ɔ, o ma nyɛ ma ná nɔ mi mami kaa Yehowa bua jɔɔ anɔkuale nɛ o yeɔ he.—1Pe 2:19, 20.

NYƐƐ HYƐ VIDEO NƐ JI YEHOWA YEƆ BUA WƆ KƐ TLOOƆ WA TLOMI ƆMƐ, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

Benɛ Grace Li sɛ gba si himi mi be bɔɔ se ɔ, mɛni si fɔfɔɛhi nɛ e kɛ kpe?
Mɛni ha e bua jɔ Baiblo ɔ mi anɔkuale ɔ he ɔ?
Benɛ a baptisi Nyɛmiyo Li se ɔ, mɛni ye bua lɛ nɛ e nyɛ nɛ e da nyagbahi nɛ e kɛ kpe ɔmɛ a nya?
Mɛni Nyɛmiyo Li de ngɛ e sɔlemi ɔ mi kɛ kɔ e huno ɔ he?
Mɛni jɔɔmihi nɛ Nyɛmiyo Li ná ngɛ je mi bami nɛ e he tsɔ kɛ bumi nɛ mi kuɔ nɛ e je kpo ɔ he?

Sini ɔ mi fonihi: Níhi nɛ ya nɔ ngɛ video nɛ ji ‘Yehowa Yeɔ Bua Wɔ Kɛ Tlooɔ Wa Tlomi Ɔmɛ’ a mi nɛ tsɔɔ bɔ nɛ Grace Li ya e hɛ mi ha. 1. Grace nɛ e ngɛ ya foe ngɛ gbogbo enyɔ komɛ a kpɛ. 2. Nyɛmiyo ko nɛ e kɛ Grace ngɛ Baiblo ɔ kasee. 3. Grace kɛ e bimɛ ɔmɛ nɛ a ngɛ ní yemi he ɔ jee kɛ yaa asafo mi kpe. 4. Grace kɛ e weku mi bimɛ nɛɛ nɛ a ngɛ Matsɛ Yemi Asa ko nɔ. — Je mi bami nɛ e he tsɔ kɛ bumi nɛ mi kuɔ ɔ yeɔ bua wawɛɛ!