KRISTOFOHI A SI HIMI
Nɔ́ Nɛ O Maa Pee Konɛ O Gba Si Himi ɔ Nɛ Pee Gbugbuugbu
Abraham kɛ Sara je suɔmi kɛ bumi kpo kɛ tsɔɔ a sibi, nɛ enɛ ɔ ji nɔ hyɛmi nɔ́ kpakpa kɛ ha nihi nɛ a sɛ gba si himi mi. (1Mo 12:11-13; 1Pe 3:6) Se kɛ̃ ɔ, a gba si himi ɔ yi mluku, a kɛ nyagbahi kpe, se a da nya. Mɛni nɛ nihi nɛ a sɛ gba si himi mi ɔ ma nyɛ maa kase ngɛ Abraham kɛ Sara a nɔ hyɛmi nɔ́ ɔ mi?
Nyɛɛ kɛ nyɛ sibi nɛ sɛɛ ní. Ke o huno ɔ loo o yo ɔ hao nɛ lɔ ɔ ha nɛ e kɛ abofu tu munyu po ɔ, mo je bumi kpo nɛ o kɛ gbi blɛuu nɛ ha lɛ heto. (1Mo 16:5, 6) Nyɛ ná be kɛ ha nyɛ sibi. Ngɔɔ o munyu tutui kɛ o ní peepee kɛ tsɔɔ kaa o suɔ o yo ɔ loo o huno ɔ. Ngɛ nɔ́ fɛɛ nɔ́ mi ɔ, nyɛ ha nɛ huɛ bɔmi kpakpa nɛ hi nyɛɛ kɛ Yehowa nyɛ kpɛti kɛ gu e he ní nɛ nyɛ maa kase, sɔlemi nɛ nyɛ ma bla kɛ sɔle kɛ jehanɛ se hu, nɛ nyɛ ma bla kɛ ja lɛ ɔ nɔ. (Fiɛlɔ 4:12) Ke suɔmi nɛ mi wa ngɛ nɔ kɛ e yo a kpɛti ɔ, e woɔ Yehowa, nɛ ji gba si himi Sisi Tolɔ ɔ hɛ mi nyami.
NYƐƐ HYƐ VIDEO NƐ JI, NƆ́ NƐ O MAA PEE KONƐ SUƆMI NƐ NGƐ GBA SI HIMI Ɔ MI Ɔ MI NƐ WA, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:
Ngɛ video nɛ ɔ mi ɔ, mɛni ji ní komɛ nɛ tsɔɔ kaa suɔmi nɛ ngɛ Shaan kɛ Kiara a kpɛti ɔ nya ngɛ jɔe?
Mɛni he je nɛ e he hia kaa nihi nɛ a sɛ gba si himi mi ɔ nɛ a je a tsui mi kɛ sɛɛ ní ɔ?
Kɛ Abraham kɛ Sara a nɔ hyɛmi nɔ́ ɔ ye bua Shaan kɛ Kiara ha kɛɛ?
Mɛni ji ní komɛ nɛ Shaan kɛ Kiara pee nɛ ha nɛ a gba si himi ɔ ba pee gbugbuugbu?
Mɛni he je nɛ e sɛ kaa nihi nɛ a sɛ gba si himi mi ɔ nɛ a hyɛ blɔ kaa a gba si himi ɔ maa ye mluku ɔ?
O ma nyɛ ma ha nɛ o gba si himi ɔ nɛ pee gbugbuugbu!