Ngɔɔ Videohi Kɛ Tsɔɔ O Baiblo Mi Ní Kaseli Ní

Videohi kɛ fonihi yeɔ bua tue bulɔ ɔ nɛ e nuɔ nɔ́ nɛ e ngɛ kasee ɔ sisi saminya, nɛ e nyɛɔ nɛ e kaiɔ. Yehowa nɛ ji wa Tsɔɔlɔ Kpanaa ngɔɔ níhi nɛ a naa kɛ hɛ ngmɛ ɔ kɛ tsɔɔ ní. (1Mo 15:5; Yer 18:1-6) Yesu nɛ ji Tsɔɔlɔ Ngua a hu pee jã. (Mat 18:2-6; 22:19-21) Mwɔnɛ ɔ, ní nɛ ɔmɛ a kpɛti kake nɛ ngɛ ye buae wawɛɛ ji videohi. Anɛ o kɛ videohi tsuɔ ní saminya ke o ngɛ o Baiblo mi ní kaseli ní tsɔɔe lo?

A to videohi nyɔngma he blɔ nya konɛ wa kɛ tsu ní ke waa kɛ nihi ngɛ Sane Kpakpa Nɛ Je Mawu Ngɔ! womiyo ɔ kasee. Ngɛ anɔkuale mi ɔ, video ɔ fɛɛ ko munyuyi ɔ kɛ sane bimi nɛ a ngma lɛ agboagbo ngɛ womiyo ɔ mi ɔ kake kɔ. A tsɔɔ video ɔmɛ a kpɛti nɔ́ nɛ sa kaa a je ngɛ ní kasemi ɔmɛ ekomɛ a nyagbe ngɛ womiyo ɔ mi ngɛ jw.org/ada. Jehanɛ se hu ɔ, video kpahi ngɛ nɛ wa ma nyɛ ma je ke waa kɛ nɔ ko ngɛ ní kasee.

Anɛ, nyɛ ngɛ nɔ́ ko kasee ngɛ Baiblo ɔ mi, nɛ e sisi numi ngɛ yee ha ní kaselɔ ɔ lo? Aloo o Baiblo mi ní kaselɔ ɔ kɛ ka pɔtɛɛ ko ngɛ kpee? Moo hyɛ jw.org/ada wɛbsaiti ɔ kɛ JW Brɔɔdkastin wɛbsaiti ɔ nɔ nɛ o hla video nɛ ma nyɛ maa ye bua lɛ. O kɛ o Baiblo mi ní kaselɔ ɔ ma nyɛ maa bla kɛ hyɛ video ɔ kake nɛ nyɛ susu he.

Daa nyɔhiɔ ɔ, video ehehi baa. Ke o ngɛ video nɛ ɔmɛ hyɛe ɔ, mo susu bɔ nɛ o kɛ ma tsu ní ke o ngɛ ni kpahi ní tsɔɔe ɔ he.