Fiɛɛ Sane Kpakpa Nɛ Tsɔɔ Kaa Je Kpakpa Ko Su Si Ta a!

Ngɛ November nyɔhiɔ ɔ mi ɔ, wa maa bɔ mɔde fɛɛ nɛ wa ma nyɛ kɛ fiɛɛ sane kpakpa kaa je ehe ko su si ta. (La 37:10, 11; Kpj 21:3-5) Moo to o be he blɔ nya konɛ o nyɛ nɛ o ngɔ o he kɛ wo fiɛɛmi klɛdɛɛ nɛ ɔ mi kɛ pi si. Ke o suɔ nɛ o sɔmɔ kaa blɔ gbali a walɔ ngɛ nyɔhiɔ nɛ ɔ mi ɔ, o ma nyɛ maa ngɔ ngmlɛfia 30 aloo 50 kɛ tsu ní.

Bɔɔ mɔde nɛ o kɛ nihi fuu nɛ susu ngmami ko nɛ kɔɔ je ehe ɔ he. Ke o maa hla ngmami ko nɛ o kɛ nihi nɛ a ngɛ o zugba kpɔ ɔ mi ɔ ma susu he ɔ, moo hyɛ nɔ́ nɛ nihi fuu a bua maa jɔ he. Ke nɔ ko nɛ o ya na lɛ kekle ligbi ɔ bua jɔ munyu ɔ he ɔ, ha lɛ ma bi a Hwɔɔmi Mɔ ɔ No. 2 2021 ɔ eko. Lɔ ɔ se ɔ, moo kpale ya slaa lɛ nɔuu nɛ o bɔ mɔde nɛ o kɛ lɛ nɛ je Baiblo mi ní kasemi sisi ngɛ O Ma Nyɛ Ma Ná Bua Jɔmi Kɛ Ya Neneene! womiyo ɔ mi. Hyɛ bɔ nɛ e ngɛ bua jɔmi ha kaa wa maa fiɛɛ “manye munyu” aloo ní kpakpahi a he sane kpakpa a kɛ pi si!—Yes 52:7.

NYƐƐ HYƐ LA FIAMI VIDEO NƐ JI, JE EHE NƐ MAA BA A, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni hwɔɔ se be kpakpa nɛ jokuɛ yoyo ɔ ngɛ he foni poe?

• Mɛni ní komɛ lɛ o ngɛ blɔ hyɛe kaa o nine maa su nɔ ngɛ je ehe ɔ mi?

• Kɛ o hwɔɔ se he hɛ nɔ kami ɔ he nɛ o ma susu ɔ ma dla mo ha kɛɛ konɛ o nyɛ nɛ o ngɔ o he kɛ wo November fiɛɛmi klɛdɛɛ ɔ mi kɛ pi si?—Luk 6:45